Marko 6 - Osotua Ng'ejuk

¹ Nepuku te ina alo nebaia engang' e menye lenye, nesuj laiteng'enuok lenyena ninye.

² Ore peaku engolong' naeng'ieng'areki, neiter aiteng'enisho tiatua engaji Engai. Ore ilkumok looning' ena, neing'asia nejo: Kaji einotie ele kuna? Kaa ng'eno ena naishooki ele? O kuna kitobirat engolon naaku too ngaik enyena?

³ Mera ninye olagwetani, Oinoti le Maria o olalashe le Yakobos o le Yoses o le Yudas o le Simon? Metii baiki nganashera enyena ene atua yook? Nerikareki ninje ninye.

⁴ Nejoki Yesus ninje: Melau olayolounoni enkitook neme tiatua olosho le menye o tiatua iltung'anak lʼenkishomi enye o tiatua engaji enye.

⁵ Neitu eidim ninye aitobira enkitobirata engolon o nabo te ina alo neme ake eiteleikio ngaik loomoiyaa kuti neishiunye ninje.

⁶ Neiputukuny ninye, tiaraki neitu eiruk ninje. Nemanaa tiatua ngang'itie too mbat pookin, eiteng'enisho.

⁷ Neipot ninye kulo tomon o are neiter airriwaa ninje are are, neisho ninje engolon too lmumuan duruk,

⁸ neitanap ninje, pemenap toki tʼengoitoi neme eng'udi ake, me olmkate, me olbene, me mpesai tiatua enyorret;

⁹ kake njeenikino namuka, pemeishop ilkilani are.

¹⁰ Nejoki ninje: Ore engaji pookin nijing'ijing'i, entobik tiatua metabana nipukuku te ine wueji.

¹¹ Ore lemeng'amu ndai, entupukutu te ina alo, nimpiripirooro enterit tiabori oo nkejek inyi, peaku enjakenishu too ninje. Japa, aliki ndai: Eiteleleki Sodom o Gomora tʼengolong' enkigwena nelang' ina ang'.

¹² Ore peidip ninje aatupukutu, neinosu ninje, peala iltung'anak

¹³ nemir ninje ilmumuan duruk kumok neel loomoiyaa kumok tʼeilata neishiunye ninje.

¹⁴ Nening' olkarsis Herodes mbaak enyena, amu eibale engarna enye, nejo: Etopiwuo Yohanes Olaibatisani too lootuata, onaa eitobirisho nkyasin enkidimata tiatua ninye.

¹⁵ Nejo ilkulekai: Era ninye Eliya; nejo ilkulekai: Era ninye olayolounoni arashu obo too layolounok.

¹⁶ Ore pening' Herodes kuna, nejo: Etopiwuo Yohanes latudung'o elukunya, too lootuata.

¹⁷ Amu eirriwaiye Herodes openy neibung' Yohanes neen ninye tʼengaji eenata tʼolbae le Herodias, eng'oroyoni olalashe lenye Filipos; amu eamaiye ninye.

¹⁸ Amu etiaka Yohanes Herodes: Me sidai te iye, teni iata eng'oroyoni olalashe lino.

¹⁹ Akae, eibaiye Herodias ninye neyeu near ninye metua, neitu eidim.

²⁰ Amu eturia Herodes Yohanes, tiaraki natayolo, ajo era ninye oltung'ani supat naa sinyati; negolie ninye; ore pening' ninye, neitobir nkumok too nona, neinining' ninye tʼeng'ida.

²¹ Ore peaku engolong' sidai, neitobiraki Herodes tʼengolong' eiunoto enye ilkituak lenyena o ilkigeluni o laigwenak le Galilaya endaa kitok.

²² Nejing'aki entito e ina Herodias neiguran neiting'id Herodes o kulo oototonitio o ninye. Nejoki olkarsis entito: Toomonuoki eniyeu ake, naalaisho iye;

²³ neiturujaki ninye: Ore enikiomonu ake, naalaisho iye, baiki ematua enkarsishu ai.

²⁴ Nepuku entito nejoki ng'otonye enye: Kainyo aomonu? Nejoki ninye: Elukunya e Yohanes Olaibatisani.

²⁵ Nejing' asioki enetii olkarsis neomonu ninye ejo: Ayeu nikinjo taata nji tʼengirra elukunya e Yohanes Olaibatisani.

²⁶ Neilish olkarsis naleng', kake tʼolbae lʼenkiturujata o tʼolbae loo kulo oototonitio tʼendaa, neitu eyeu neany ninye.

²⁷ Neirriwaa nabokata olkarsis olarani neitanapu, peauni elukunya enye tiatua engaji eenata.

²⁸ Neau elukunya enye tʼengirra neisho entito, neisho entito ninye ng'otonye enye.

²⁹ Ore peidip aatoning' laiteng'enuok lenyena nena, nepuonu nenap empopong' enye, nenuk ninye tʼenkurare.

³⁰ Neiturrurrokino lairriwak Yesus neinosaki ninye mbaak pookin naaitobira ninje o naaiteng'enutua.

³¹ Nejoki ninye ninje: Ewotu ndai oopeny ewueji ang' nemetii oltung'ani, pieng'ieng'ang'a peno. Amu etii kumok loopuonu o loopuo; neitu eata ninje baiki erishata nadaare.

³² Nepuo ninje tʼengalawa ewueji enye openy nemetii iltung'anak.

³³ Neduaia ilkumok ninje epuoito neyolou ninye, nepuo aasioio ina alo too nkejek, eing'ua ngang'itie pookin, neituruk ninje aabaia neiturrurro.

³⁴ Ore pepuku Yesus nedol olorere, neibung'aki ninye engoshoke nanana ninje, amu etanyanyukie ninje ntare nemeata olairritani, neiter aiteng'en ninje too nkumok.

³⁵ Ore peaku namutu, nepuonu laiteng'enuok lenyena enetii ninye nejo: Era ene wueji ang'ata narok netaa namutu;

³⁶ ntanapare kulo, pepuo nkuruman o mbat pookin oo ngang'itie, peinyang'aki aten endaa.

³⁷ Nealiki nejoki Yesus ninje: Enjoo ndai ninje endaa. Nejoki ninje ninye: Ke kipuo ainyang'aki ninje ilmkaten loo ndenaria iip are, pikinjo ninje enya?

³⁸ Nejoki ninje: Ke ilmkaten aja iatata? Enjom, eng'orai! Ore peidip aatayolo ninje, nejo: Imiet o singir are.

³⁹ Neitanap ninje, peitoton ninje pookin tʼenkop too nkisotin, tʼolkujita onyori.

⁴⁰ Netoni too lkererin, aa ip ip o aa onom onom.

⁴¹ Neibung' ninye kulo mkaten imiet o kulo singir aare neimariri shumata, nemayan negiligil ilmkaten neisho ninje laiteng'enuok, peitarasaki olorere; neoriki baiki kulo singir aare ninje pookin.

⁴² Nenya pookin neraposho.

⁴³ Nesotu ninje mbelat ilbenia tomon o are oobore o ndung'ot oo singir.

⁴⁴ Ore looinosa endaa, nera leak iip onom.

⁴⁵ Nearaki nabokata laiteng'enuok lenyena meilepakiii engalawa, peituruk aapuo lido kekun metabaiki Betsaida, metabana neitanapare ninye olorere.

⁴⁶ Ore peidip aitanapare ninje, nelo ninye oldonyo asaisho.

⁴⁷ Ore pemutu neaku etii engalawa empolos olbalbal netii ninye openy atua olosho otoiyo.

⁴⁸ Nedol ninye eata ninje osina tʼeyetunoto, amu etii olkutati lorrinyu ninje. Ore tʼerripore e ong'wan e kiarie nelotu enetii ninje, elimana te shumata olbalbal. Neyeu negiroo.

⁴⁹ Ore pedol ninje ninye elimana te shumata olbalbal, nejo ninje era oloip, neyetaki aaishir;

⁵⁰ amu etadua pookin ninye neng'ayung'ayu. Neirorie si ninye ninje nabokata nejoki ninje: Entagoluoto too ltauja, amu nanu, emiureisho!

⁵¹ Neilepaki ninje tiatua engalawa, negira olkutati. Neing'asia ninje naleng' tiatua aten.

⁵² Amu eitu edamu ninje mbaak oo lmkaten, kake etagolito iltauja lenye.

⁵³ Ore peidip aatalang', nebaia olosho le Genesaret neitadoiyo eenet tʼembata.

⁵⁴ Ore pedou ninje tʼengalawa, neyolou ninje ninye nabokata

⁵⁵ nekwetikwet aasioio atua ilo osho pookin neiter aanapu loomoiyaa too rruatin, nepuo wuejitin neetoning'ie, aajo etii ninye.

⁵⁶ Ore ewueji pookin, teni etijing'a ninye ngang'itie kutiti arashu kituak arashu nkuruman, neitaper loomoiyaa too singiran nesai ninye, peporoo ninje tʼenaipukoi olkila lenye; ore pookin lootaporoitie ninye nepok.