Marko 5 - Osotua Ng'ejuk

¹ Nebaiki lido kekun lʼolbalbal, atua olosho loo Lgerasenoi.

² Ore pedou ninye tʼengalawa, nenang'are ninye nabokata oltung'ani otupukuo too nkuraren neata Olmumua duruki,

³ loata ntonat tiatua nkuraren, neitu etumi oltung'ani loidim ateena ninye, baiki too lpisia;

⁴ amu eteenaki ninye aigil kumok too ngoteta o too lpisia, negiligil ninye lelo pisia nepurdupurd ngoteta, neitu eidim o obo atigilu ninye.

⁵ Ore tʼenkiarie o dama pookin netii atua nkuraren o ildonyo, eishir near kion too soito.

⁶ Ore pedol ninye Yesus tʼenelakua, nekwetiki negilaki kung' ninye neishir tʼoltoilo kitok ejo:

⁷ Kainyo aataiye iye, Yesus, Oinoti lʼEngai natii shumata naleng'? Aaiturujie iye Engai, pimikintame!

⁸ Amu etiaka ninye: Tupuku iye, lemumua duruki, tiatua ele tung'ani!

⁹ Neikilikwan ninye: Keji aa engarna ino? Nejoki ninye: Eji engarna ai empuoto, amu kira kumok.

¹⁰ Nesai ninye naleng', pememiraki atua ele osho.

¹¹ Netii ina alo oldonyo emboo oo lbitiro looirrititai.

¹² Nesai ilmeneng'a pookin ninye nejo: Rriwaki yook atua ilbitiro, pikijing' atua ninje.

¹³ Neisho epuo. Nepuku kulo mumuan duruk nejing' atua lelo bitiro, nesulakino emboo asioki tʼemarti atua olbalbal, loobaia iip tikitam, nee tiatua olbalbal.

¹⁴ Nekwet lairritak lenye neibulunye mbaak atua engang' o atua nkuruman. Nepuonu iltung'anak, peing'oraa enataa.

¹⁵ Nepuonu enetii Yesus neing'oraa Oloata opa ilmeneng'a, eton neishopo neata eng'eno naa ninye duo oata empuoto, neureishoi ninje.

¹⁶ Neinosaki ninje kulo lootadua enataa tʼoltung'ani loo lmeneng'a o mbaak oo lbitiro.

¹⁷ Neiter aasai ninye, pepuku tiatua mbatai enye.

¹⁸ Ore peilepaki ninye engalawa, nesai Oloata ilmeneng'a ninye, peruba te nebo.

¹⁹ Neitu eiruk ninye, kake nejoki ninye: Nno engaji ino enetii iltung'anak linono, pinosaki ninje enikinkunaka Olaitoriani nikimbung'aki engoshoke nanana.

²⁰ Nelo ninye aiter ainosu tiatua Manyat tomon eneikunaka Yesus ninye; neing'asia ninje pookin.

²¹ Ore peitoki aidip Yesus atalang'a tʼengalawa, neiturrurrokino ninye esiamu kitok, netii ninye embata olbalbal.

²² Nelotu obo too lkituak lʼengaji Engai, oji Yairos; ore pedol ninye, nebatatakino nkejek enyena

²³ nesai ninye naleng' ejo: Eng'or peno ee entito ai kiti; teni iyeu nilotu ninteleiki ngaik, petum atopua neishiu.

²⁴ Nelo te nebo o ninye. Nesuj ninye esiamu kitok neroosh ninye.

²⁵ Netii eng'oroyoni nabo naata empukunoto osarge enkata oo larin tomon o are,

²⁶ nening' emion naleng' too laishiunok kumok neishooio naata pookin te ina, neitu eretoki hoo nyoo, kake nepona ake eneikununo aaku torrono.

²⁷ Ore pening' ninye mbaak e Yesus, nelotu tekurum tiatua olorere neing'unye olkila lenye;

²⁸ amu etejo ninye: Teni aing'unye ilkilani lenyena ake, napok.

²⁹ Netoi nabokata engong'u osarge lenye nening' tʼosesen lenye, ajo eishiunyeki tʼele sina.

³⁰ Nening' Yesus nabokata tiatua kion, ajo etupukuo engolon te ninye, neibelekenyakino olorere nejo: Ang'ai loing'unye ilkilani lainei?

³¹ Nejoki laiteng'enuok lenyena ninye: Idolita, kirooshita olorere, nijo: Ang'ai liking'unye?

³² Neing'oraa mbat pookin, pedol enataasa ena.

³³ Neureisho ake ena ng'oroyoni neikirikira, eyolo enataa te ninye, nelotu nebatatakino ninye neliki esipata pookin.

³⁴ Nejoki ninye: Naito, kintopua enkirukoto ino, nno ang' tʼeseriani, taa bioto tʼosina lino!

³⁵ Ore epon eirorita, nepuonu iltung'anak, eing'ua engang' olkitok lʼengaji Engai, ejo: Eidipa atua entito ino. Ainyo pintoki aitirik Olaiteng'enani?

³⁶ Nening' Yesus nabokata ilo rorei oiroritai, nejoki ninye olkitok lʼengaji Engai: Miureisho, ruko ake!

³⁷ Neitu eisho oltung'ani o obo losuj ninye neme Petros o Yakobos o Yohanes, olalashe le Yakobos.

³⁸ Nelotu atua aji olkitok lʼengaji Engai neing'oraa enkipushoi oo looishirita o looilishito naleng'.

³⁹ Ore peidip atijing'a atua nejoki ninje: Ainyo pimpushosho ninjirishiri? Eitu ee enkerai, kake eirura. Nekweniye ninye.

⁴⁰ Ore peitupuku iltung'anak pookin, nerik menye lʼenkerai o ng'otonye o lʼemboitei enye, nejing' atua enetii enkerai.

⁴¹ Neibung' enkerai engaina, nejoki ninye: Talita kumi! nera enkitaalata enye: Nairo, aaliki iye, nyototoi!

⁴² Neitashe ina ito nabokata nelimana; nera ninye ake noo larin tomon o are. Neing'asia ninje tʼenking'asiata kitok.

⁴³ Neitanap ninje naleng', pemeyolou oltung'ani o obo ena; neitanapu, peishori ninye endaa.