Marko 2 - Osotua Ng'ejuk

¹ Neitoki ajing' Kapernaum, eishunye ngolong'i naaje; nening'i, ajo etii aji.

² Neiturrurro nabokata ilkumok metaa mekure etii enkigutata te kutuk aji, neliki ninje lomon.

³ Nepuonu neaki ninye oltung'ani onunukito osupetai, enapita iltung'anak ong'wan ninye.

⁴ Ore peitu eidim ninje aatinyikaki ninye tʼolbae lʼolorere, nebol keper aji ene wueji netii ninye; ore peidip aatuud, neitadou erruat nairragie ele tung'ani lonunukito osupetai.

⁵ Ore pedol Yesus enkirukoto enye, nejoki ele loata osupetai: Nakerai ai, kintaikiaki nkitarruot inono.

⁶ Netii ina alo ematua oo layolok lʼesirata oototonitio neibirribir too ltauja lenye:

⁷ Kainyo pemor ele Engai nji? Kang'ai loidim aitau nkitarruot neme obo, nera Engai?

⁸ Neyolou Yesus nabokata tʼolmumua lenye, ajo eibirribirrita nji tiatua ninje, nejoki ninje: Kainyo pimbirribirrirri kuna too ltauja linyi?

⁹ Kaa nalelek, teni ajoki Oloata osupetai: Kintaikiaki nkitarruot inono, arashu: Tudumunye, tudumakinoi erruat ino, tilimanai!?

¹⁰ Kake piyolouu, aajo eata Engerai oltung'ani engolon naitaunye nkitarruot tʼenkop, nejoki ele loata osupetai:

¹¹ Aajoki iye, nyototoi, tudumakinoi erruat ino, nno ang'!

¹² Nedumunye nedumakino nabokata erruat enye nepuku tʼengomom oo pookin, neiputukuny baiki pookin neitadaraa Engai ejo: Eitu ai kata kidol nji tukul.

¹³ Neitoki apuku nelo embata olbalbal; nelotu olorere pookin enetii ninye neiteng'en ninje.

¹⁴ Ore eimita, nedol Levi le Alfayos, eton tʼewueji e kodi, nejoki ninye: Tusujuaki! Nedumunye nesuj ninye.

¹⁵ Neaku ore einosaa endaa tʼengaji enye, netoni laoshok le kodi kumok o laitarruok te nebo o Yesus o laiteng'enuok lenyena; amu etii ilkumok lootusuja ninye.

¹⁶ Ore pedol layolok lʼesirata o Ilfarisayoi, aajo edaa te nebo o laitarruok o laoshok le kodi, nejoki ninje laiteng'enuok lenyena: Kainyo pedaa neokisho ninye te nebo o laoshok le kodi o laitarruok?

¹⁷ Ore pening' Yesus ina, nejoki ninje: Meyeu loora biot olaishiunoni, neme kulo oomoiyaa. Eitu alotu aipot looata esupato, kake laitarruok, petum aataalata.

¹⁸ Neaku epukoo laiteng'enuok le Yohanes o loo Lfarisayoi. Nepuonu looje nejoki ninye: Kainyo pepukoo laiteng'enuok le Yohanes o laiteng'enuok loo Lfarisayoi, kake mepukoo laiteng'enuok linono?

¹⁹ Nejoki Yesus ninje: Kaji eiko teni epukoo nkera enkiama tʼenkata napon etii osanja te nebo o ninje? Meidim aatupukoi ninje te ina kata natii e nebo o osanja.

²⁰ Kake epuonu ngolong'i naaoruni ninje osanja, nepuo aapukoo te ina olong'.

²¹ Metii oltung'ani oripaki erashet olkila ng'ejuk atua olkila musana; teni eripaki, neitarruo ena rashet ng'ejuk ilo musana, nepona empolosata.

²² Nemetii olopik olmarua ng'ejuk atua ilbenia musan; teni epik, nepolos ilo marua ng'ejuk ilbenia, neibukori olmarua nerruoio ilbenia. Kake epik olmarua ng'ejuk atua ilbenia ng'ejuko.

²³ Neaku ore peim ninye tʼengolong' naeng'ieng'areki atua nkuruman endaa, neiter laiteng'enuok lenyena aagilu lukuny entapa.

²⁴ Nejoki Lfarisayoi ninye: Ng'orai kainyo peitobir ninje nemeaku tʼengolong' naeng'ieng'areki?

²⁵ Nejoki ninye ninje: Eitu isomama ndai tukul eneikuna David, eata osina neibung' olamei ninye o lʼemboitoi?

²⁶ Eneikuna nejing' atua engaji Engai tʼenkata olaidasani kitok Abyatar nenya ilmkaten lʼenkitaduaroto nemeaku, peinosi neme too laidasak, neisho si ninye lʼemboitoi enye?

²⁷ Nejoki ninye ninje: Etaa engolong' naeng'ieng'areki tʼolbae lʼoltung'ani, me oltung'ani tʼolbae lʼengolong' naeng'ieng'areki.

²⁸ Nji era Enkerai oltung'ani baiki Olaitoriani lʼengolong' naeng'ieng'areki.