Marko 16 - Osotua Ng'ejuk

¹ Ore peishunye engolong' naeng'ieng'areki, neinyang'u Maria Magdalena o Maria, ng'otonye e Yakobos, o Salome ilat naarropil, pepuonu aael ninye.

² Ore enasirie naleng', tʼengolong' elukunya enjuma, nepuonu ninje enetii enkurare, eilepu engolong'.

³ Nejokino ninje tʼempolos enye: Ang'ai oibelekenyaki yook osoit te kutukaji enkurare?

⁴ Ore peing'oraa ninje, nedol, aajo eidipaki aibelekenyai osoit; amu era kitok naleng'.

⁵ Ore pejing' ninje atua enkurare, nedol olbarnoti otonita te tatene neishopito olkila oibor; neing'asia ninje.

⁶ Nejoki si ninye ninje: Eming'asia! Ing'oruru ndai Yesus le Nasaret otooshokoki esalaba; etopiwuo ninye; metii ene. Eng'orai ewueji neitaperieki ninye!

⁷ Kake enjom, entiakiti laiteng'enuok lenyena o Petros, ajo elaiturukie ndai alo Galilaya; nipuopuo aadol ninye te ina alo anaa petiaka ndai.

⁸ Nepuku ninje aasioio nekwet aaing'ua enkurare, amu eibung'a ninje enkikirikirata o enking'asiata; neitu eliki ninje oltung'ani ororei, amu etureishote.

⁹ Ore peinyototo Yesus enasirie tʼengolong' elukunya enjuma, neng'as aitadol kion Maria Magdalena natimirie ninye ilmumuan torrok oopishana.

¹⁰ Neibung' ninye engoitoi neinosaki mbaak kulo lootaboitare ninye, eilishito neishir.

¹¹ Ore pening' si kulo, aajo eishiu ninye netadua ninye ninye, neitu eiruk ninje.

¹² Ore tekurum oo kuna nelioi ninye tʼengai mua too aare lenye ootilimanate aapuo enkuruma.

¹³ Nepuo kulo neinosaki mbaak lootelekutua; neitu eiruk baiki lelo.

¹⁴ Neitadol kion tʼenkiting'oto kulo tomon o obo, etonita tʼendaata, neilepilepaki ninje, tiaraki neitu eiruk, negol iltauja lenye, aajo eitu eiruk kulo lootadua ninye etopiwuo.

¹⁵ Nejoki ninje: Embung'a engoitoi aapuo atua olmaa pookin, enosakiti lomon lʼeng'ida enkitobirata pookin.

¹⁶ Oloiruk neibatisi, nepok; olemeiruk, nepuoi aadek.

¹⁷ Nepuo aarubare looiruk kulo ponot: nepuo aamir ninje lʼengarna ai ilmeneng'a, nepuo aairo too nkutukie ng'ejuko,

¹⁸ nepuo aadumu lasuria; naa teni eok entoki naarisho, nemear ninje tukul; nepuo aaiteleiki ngaik loomoiyaa, neaku ninje biot.

¹⁹ Akae, ore peidip Olaitoriani airorie ninje, nedumari shumata neton te tatene Engai.

²⁰ Nepuku kulo neinosu lomon lʼEngai too wuejitin pookin; neretoki Olaitoriani ninje too nkyasin enye neitagol ororei too lponot looturubare. Amen.