Marko 15 - Osotua Ng'ejuk

¹ Ore tʼentadekeny neosh enkigwena laidasak kituak te nebo o laigwenak o layolok lʼesirata o enkigwena nalulung'a, neen Yesus nerik neitarasaki Pilatos.

² Neikilikwan Pilatos ninye: Ira iye olkarsis loo Yudayoi? Nealiki ninye nejo: Ijo iye.

³ Neitang'or laidasak kituak ninye too nkumok.

⁴ Neitoki aikilikwan Pilatos ninye ejo: Mialu ororei? Ng'orai, kaja kintang'orie ninje.

⁵ Neitu ealu Yesus toki, neiputukuny baiki Pilatos.

⁶ Neata ninye orregie loo ngolong'i kituak, pelaaki ninje obo loena otayeutuo ninje.

⁷ Netii obo oji Barabas, oteenaki te nebo o laisisak ootara oltung'ani metua tiatua enkitashoto.

⁸ Neilep olorere neiter aasai, peitobiraki ninje anaa oshi ake.

⁹ Nealiki Pilatos ninje ejo: Iyeuu nalaaki ndai ele karsis loo Yudayoi?

¹⁰ Amu etayolouo, ajo eitarasutua laidasak kituak ninye tʼengilata e tau.

¹¹ Neisis laidasak kituak esiamu, peiye eaku enaikash, teni elaaki ninje Barabas.

¹² Neitoki aaiu Pilatos nejoki ninje: Akae, kaa naa aikunaki ele lijojo, era olkarsis loo Yudayoi?

¹³ Neitoki aadar ninje: Tooshoki ninye esalaba!

¹⁴ Nejoki Pilatos ninje: Kaa torroni etaasa ninye? Nepon ninje naleng' aadar: Tooshoki ninye esalaba!

¹⁵ Akae, neyeu Pilatos neitobiraki olorere enanyor nelaaki ninje Barabas neitarasaa Yesus, eidipa ataara too nkeenda, petumi aatooshokiti ninye esalaba.

¹⁶ Nerik isikerin ninye atua engaji enkigwena neipot ninje, peiturrurro oltim olulung'a.

¹⁷ Neishopoki ninje ninye olkila odo neshet olmarisian loo lkikarreta neishopoki ninye elukunya;

¹⁸ neiter aairoroki ninye: Supai, lekarsis loo Yudayoi!

¹⁹ Neosh ninye elukunya tʼolmoloi nenotaki ninye ngamulak negil kung' aaitaa ninye kitok.

²⁰ Ore peidip aatusul ninye, neoru ninye olkila odo neishopoki ninye ilkilani lenyena. Nerik aulo, peoshoki esalaba.

²¹ Neitanap ninje tʼengolon oltung'ani oimita, Simon le Kirene, eing'ua enkuruma, nera menye le Aleksandros o le Rufos, penap esalaba enye.

²² Nerik ninje ninye metabaiki ewueji Golgota, ore enkitaalata enye: ewueji emborbor,

²³ Neisho ninye olmarua oshulare engare naitiming'anisho; neany ninye.

²⁴ Ore peidip ninje aatooshokiti ninye esalaba, neorikino ilkilani lenyena, neoshoki olenkukuo t'olbae lenye, peyolou ang'ai lotum toki.

²⁵ Etaa saa uni, etooshokoki ninye esalaba.

²⁶ Netii shumata enye esirata enkitang'oroto enye: Olkarsis loo Yudayoi.

²⁷ Neoshoki te nebo o ninye laisimak aare esalaba, obo te tatene o obo te kedyanye enye.

²⁸ Nebaia esirata najo: Eikenaiyoki ninye te nebo o laitarruok.

²⁹ Ore kulo ooimita nemor ninye eipiripirito lukuny enye nejo: Kiiti, ologil engaji sinyati neshet ninye too ngolong'i uni!

³⁰ Ntopua kion, tadou tʼesalaba!

³¹ Nesul neijia baiki si ninje laidasak kituak tʼempolos enye te nebo o layolok lʼesirata nejo: Eitopua ilkulekai nemeidim aitopua kion.

³² Njedou taata Kristos, olkarsis le Israel, tʼesalaba, pekitum aatadol, nikiruk. Etamoro si ninje lootooshokoki esalaba te nebo o ninye.

³³ Ore peaku saa ile, neaku enaimin te shumata enkop pookin metabaiki saa enturuj.

³⁴ Nedar Yesus te saa enturuj tʼoltoilo kitok nejo: Eli, Eli lamaa asabtani? neji enkitaalata enye: Engai ai, Engai ai, ainyo pikitung'aiye?

³⁵ Ore pening' ematua oo kulo looitashe tʼenetaana, nejo: Ng'orai, eipotito Eliya.

³⁶ Nekwet oltung'ani obo neigany enjutet engare naitiming'anisho nepik shumata olmoloi neitook ninye, ejo: Entapal, maing'orai, ten ake elotu Eliya, peitadou ninye.

³⁷ Neitupuku Yesus oltoilo kitok, nedung'o tau.

³⁸ Nepolosa olkarash lʼerishata engaji sinyati matuan are, eiter te shumata metabaiki enkop.

³⁹ Ore pedol olkigeluni loitashe tʼeneitoriokinore ninye, ajo nji etudung'e tau, nejo: Esipa, era ele tung'ani Oinoti lʼEngai!

⁴⁰ Netii baiki ng'oroyok ine naaing'orita tʼenelakwa; netii atua ninje Maria Magdalena o Maria, ng'otonye e Yakobos olkiti o ne Yoses, o Salome,

⁴¹ ninje naatusuja ninye, etii Galilaya, neisyayaki ninye, o nkulie kumok naaileputua te nebo o ninye metabaiki Yerusalem.

⁴² Ore peaku teipa, etii engolong' enkitobirakinore nara enaiturukie engolong' naeng'ieng'areki,

⁴³ nelotu Yosef le Arimatia, olaigwenani loataiyeki oloip, nera ninye loanyu enkarsishu Engai, neiteu ninye atijing'aki Pilatos neomonu osesen le Yesus.

⁴⁴ Neiputukuny Pilatos, ajo eidipa atua; neipot olkigeluni neikilikwan ninye, ten ake elakwa etua.

⁴⁵ Ore peyolou tʼolkigeluni esipata, neisho Yosef empopong'.

⁴⁶ Neinyang'u olkarash oibor neitadou ninve neirinaki atua olkarash oibor nepik ninye atua enkurare natabataki tiatua osoit kitok neibeleleng'oki osoit kitok kutukaji enkurare.

⁴⁷ Neing'oraa Maria Magdalena o Maria e Yoses enetipikaki.