Marko 13 - Osotua Ng'ejuk

¹ Ore pepuku ninye tʼengaji sinyati, nejoki obo too laiteng'enuok lenyena ninye: Laiteng'enani, ng'orai, kakua soito kulo o kaa shetata ena!

² Nejoki Yesus ninye: Idolita kuna shetat sapuki? Meleku tene osoit te shumata olekai soit lemerratanyuni.

³ Ore peton ninye tʼOldonyo loo loirienito aitoriokino engaji sinyati, neikilikwan Petros o Yakobos o Yohanes o Andreas ninye tʼewueji enye oopeny:

⁴ Tiaki yook, kanu eaku nena? Kainyo olponoto obaiarie nena pookin?

⁵ Neiter Yesus ajoki ninje: Entaduai aten, pemeitamanimanaa ndai oltung'ani!

⁶ Amu epuo aapuonu ilkumok lʼengarna ai, ejo: Ara nanu Kristos! nepuo aaitamanimanaa ilkumok.

⁷ Teni ipuopuo aaning' njorin o oriri loo njorin, eming'aing'ai! Meata kata nemeaku kuna; kake epon eitu elotu enkiting'oto.

⁸ Amu eladumunye olorere aarare olekai orere o enkarsishu nabo aarare engai arsishu. Nepuo aaku nkikirikirat enkop too wuejitin o wuejitin; nepuo aaku lameitin o nking'asiat. Nera nena enkiterata osina.

⁹ Entaduai ake aten! amu eitarasakini ndai atua ngajijik enkigwena o atua ngajijik Engai; neari ndai neriki ndai ngomomi oo larikok o noo lkarsisi tʼolbae lai, peaku enjakenishu too ninje.

¹⁰ Meata kata nemeng'asi aainosaa lomon Peng'ida tiatua loreren pookin.

¹¹ Ore teni epuoi aarik neitarasari ndai, eming'as aaekenyu eniroro, emimbirribir baiki, kake enaishori ndai te ina kata, ina eroro! amu mirara ndai looirorita, kake Olmumua Sinyati.

¹² Neitarasaki olalashe olalashe lenye atua enkea o menye enkerai enye, nedumakino nkera lootoiutuo nepuo aar ninje metuata.

¹³ Niakuku looiba pookin tʼolbae lʼengarna ai; kake olong'iriaki metabaiki enkiting'oto, ninye olapok.

¹⁴ Naa teni idolidolo entorroni erruoroto eitashe tʼewueji nemeaku, (oloisoma ena, njeyolou), ore lootii Yudaya, njekwetiki ildonyo,

¹⁵ ore Olotii keper aji, njoo medou ajing' atu aji, pedumu entoki tʼengaji enye;

¹⁶ ore Olotii atua enkuruma, njoo meibelekenyakino kurum adumu olkarash lenye.

¹⁷ Ee, kake aiya, naamena o naaitanakisho too nona olong'i!

¹⁸ Entasaishoto, pemeaku kuna tʼenkata oloirujuruj.

¹⁹ Nepuo aaku nona olong'i sinaitin leitu eaku neba tʼenkiterata enkishirata naitobirua Engai, metabaiki taata, nemeitoki aaku tukul.

²⁰ Ten emutu eitu eitadorrop Olaitoriani nona olong'i, anaata mepoku oltung'ani o obo; kake tʼolbae loo lootegeluaki ootegelua ninye, eitadorropa nona olong'i.

²¹ Ore pejoki baiki ndai oltung'ani te ina kata: Eng'orai, etii Kristos ene! arashu: idye! — emiruk!

²² Amu epuo aainyototo ilkristoi lʼelejare o layolounok lʼelejare, nepuo aaitobir ilponot kituak o nkiputukunyot, petum aaitamanimanai, ten ake eidimu, baiki lootegeluaki.

²³ Kake entaduai aten! Aidipa atiaki ndai pookin.

²⁴ Kake ore too nona olong'i, eidipe ilo sina, neopokini engolong' enaimin neiminye olapa enkibor enye

²⁵ neaku esulunye lakir te shumata neing'unung'un ngoloni naatii shumata.

²⁶ Nepuo aadol ninje te ina kata Enkerai oltung'ani elotu t'erukenya tʼengolon kitok o tʼenkitook.

²⁷ Nelairriu te ina kata ilmalaikan nelaiturrur lootegeluaki lenyena, eing'ua nkutat ong'wan, eiter tʼenkiting'oto enkop metabaiki enkiting'oto e shumata.

²⁸ Enteng'enuoto tʼenkitanyanyukiet olng'aboli: Teni enanau engaitubului enye neitupuku mbenek, niyolouu, aajo etataana enkata olodalu.

²⁹ Neijia baiki si ndai, teni idolidolo kuna eaku, entayolo, aajo etataana kutukaji.

³⁰ Japa, aliki ndai, memuta ena kishon tukul, metabana neaku kuna pookin.

³¹ Nepuo aamuta shumata o enkop, kake mepuo aamuta rorei lainei tukul.

³² Ore mbaak e ina olong' arashu e ina saa metii oloyolo, me ilmalaikan le shumata neme Oinoti, kake Papa ake.

³³ Eng'orai, enjololoto, entasaishoto! amu miyololo enkata naaku.

³⁴ Neijia anaa oltung'ani tiatua olototo otung'aiye engaji enye, neisho laisyayak lenyena engolon, peata oltung'ani pookin enkyas enye, neitanap olarriponi le kutukaji, peishololo.

³⁵ Akae, enjololoto, amu miyololo enkata nalotu Olaitoriani lʼengaji, ten aa teipa, arashu empolos enkiarie, arashu eorito olkikusieki, arashu enasirie;

³⁶ pemebau nabokata neinepu ndai irurate.

³⁷ Ore enaliki ndai, naliki pookin: Enjololoto!