Marko 11 - Osotua Ng'ejuk

¹ Ore penyikaki ninje Yerusalem nebaia Betfage o Betania metabaiki Oldonyo loo loirienito, neirriwaa ninye aare too laiteng'enuok lenyena,

² nejoki ninje: Enjom enkiti ang' naitoriokinore ndai; ore nabokata, teni ijing'ijing'i, inepupu enkurrarru osikiria naena nepon eitu eilepaki oltung'ani o obo ninye; entalakutu ninye, entereakaki!

³ Ore pejoki oltung'ani ndai: Ainyo pinkoko nji? entejo: Olaitoriani oyeu ninye; neirriu nabokata ene.

⁴ Nepuo neinepu enkurrarru osikiria naena te kishomi, ti aulo tʼerishata engoitoi, nelaku ninye.

⁵ Nejoki ematua oo kulo ooitashe te ine ninje: Kainyo intobiribiri, ilakuku enkurrarru osikiria?

⁶ Nejoki ninje anaa peitanapua Yesus, neing'uaiki ninje.

⁷ Nereu ninje enkurrarru osikiria enetii Yesus neisalaashaki ninye ilkilani lenye, neton ninye te shumata enye.

⁸ Neisalaash ilkumok ilkilani lenye tʼengoitoi; nedung'u kulekai ilng'osil too ljanito neisalaash tʼengoitoi.

⁹ Ore looiturukie o loosujita neapaa iltoiloi ejo: Hosiana! Njeitadarari ololotu lʼengarna Olaitoriani!

¹⁰ Njeitadarari enkarsishu nalotu e papa lang' David. Hosiana te shumata!

¹¹ Nejing' Yesus Yerusalem atua engaji sinyati; neing'orong'oraa ngaloli pookin; ore pemutu, nepuku nelo Betania te nebo o kulo tomon o are.

¹² Ore enasirie, pepuku ninje te Betania, neibung' olamei ninye.

¹³ Nedol tʼenelakwa olng'aboli oata mbenek nelotu, peiye etum toki te shumata enye. Ore pelotu enetii, neitu etum toki neme mbenek, amu me enkata oo lng'abolo.

¹⁴ Nealu nejoki ninye: Njoo meitoki anya nkatan pookin oltung'ani ilmomo te iye! Nening' laiteng'enuok lenyena ina.

¹⁵ Nepuonu Yerusalem. Nejing' Yesus atua engaji sinyati neiter amir lamirak o lainyang'ak tiatua engaji sinyati neibelekeny naraan oo laitaalak loo ngoshola o lorikaishi loo lamirak loo lmaita,

¹⁶ neitu eisho oltung'ani enap enaret eim engaji sinyati.

¹⁷ Neiteng'enisho nejoki ninje: Keitu esiri: Eipoti engaji ai engaji esayata oo loreren pookin? Kake intaa ndai ninye engapunet oo laisimak.

¹⁸ Nening' laidasak kituak o layolok lʼesirata nona neing'oru eneiko petum aaiminye ninye. Neurei ake ninye amu eing'asiaiye esiamu pookin enkiteng'enare enye.

¹⁹ Ore peaku emutu, nepuku nelo aulo engang'.

²⁰ Ore enasirie egiroo ine, nedol ele ng'aboli etoiyo, eiter too ntonat.

²¹ Nedamu Petros nejoki ninye: Laiteng'enani, ng'orai olng'aboli litedia etoiyo.

²² Nealu Yesus nejoki ninje: Embung'a enkirukoto atua Engai.

²³ Japa, aliki ndai: Ore oltung'ani pookin ojoki ele donyo: Tadotunye, pinang'akino atua olbalbal! nemeing'arrirro tʼoltau lenye, kake eiruk, ajo eaku enajo — neaku te ninye anaa petejo.

²⁴ Onaa aliki ndai: Ore pookin niomonunu tʼesayata inyi, eruko, aajo ing'amumu, neaku eninyi.

²⁵ Ore pintasheshe isaishosho, entung'aikiti, teni iataiyeye oltung'ani entoki, peiye eing'uaiki si ninye, Minyi linyi otii shumata, ndai nkitarruot inyi.

²⁶ Teni ming'uaikiki ndai, nemeing'uaiki baiki ndai Minyi linyi otii shumata nkitarruot inyi.

²⁷ Neitoki aabaia ninje Yerusalem. Ore elimana ninye tiatua engaji sinyati, nepuonu laidasak kituak o layolok lʼesirata o laigwenak enetii ninye,

²⁸ nejoki ninye: Ke ti aa golon intobirita kuna? Kang'ai likinjoo ena golon, pitum aitobira kuna?

²⁹ Nejoki Yesus ninje: Aikilikwan si nanu ndai ororei obo, pikialikiki, tekurum naliki si nanu ndai, ke ti aa golon aitobirita kuna.

³⁰ Kera enkibatisa e Yohanes ne shumata anai noo ltung'anak? Entaalikiaki!

³¹ Neibirribir ninje tʼempolos enye ejo: Teni kijo: Eing'ua shumata! nejo ninye: Ainyo naa peitu irukuruku ninye?

³² Kake teni kijo: Eing'ua atua iltung'anak! — neturia ninje olorere. Amu etejo pookin, ajo era Yohanes olayolounoni tʼesipata.

³³ Nealiki ninje Yesus nejo: Mikiyolo. Nejoki si Yesus ninje: Majoki si nanu ndai, ke ti aa golon aitobirita kuna.