Marko 10 - Osotua Ng'ejuk

¹ Nedumunye te ina alo nelotu rishat e Yudaya tʼolkekun le Yordan. Neitoki aaiturrurrokino ninye siamin, neitoki aiteng'en ninje anaa petamoo.

² Nepuonu enetii ninye Ilfarisayoi neikilikwan ninye: Ke sidai, teni eing'ua olmoruo eng'oroyoni enye? etemita ninje ninye.

³ Nealiki si ninye nejoki ninje: Ainyo eitanapa Mose ndai?

⁴ Nejo si ninje: Eiruko Mose, pesiri empalai erishata, neing'ua ninye.

⁵ Nejoki Yesus ninje: Tiaraki natagolito iltauja linyi, onaa etisiraka ndai ena kitanapata.

⁶ Kake neba tʼenkiterata enkitobirata eitobira Engai olee o eng'oroyoni;

⁷ onaa, eing'ua oltung'ani menye o ng'otonye neibung'are eng'oroyoni enye,

⁸ neaku pokira are osesen obo; nemeitoki aaku aare, kake osesen obo.

⁹ Akae, ore enaidikidiko Engai, njoo merish oltung'ani.

¹⁰ Neitoki aaikilikwan laiteng'enuok lenyena ninye tiatua aji mbaak e ilo rorei.

¹¹ Nejoki ninje: Oloing'ua eng'oroyoni enye neamu engai, near osotua lʼenkidikidikoto olmoruo o eng'oroyoni te ninye;

¹² naa teni eing'ua eng'oroyoni olmoruo lenye neamaa olekai, near osotua lʼenkidikidikoto olmoruo o eng'oroyoni.

¹³ Nerikoki ninje nkera kunyinyi, peiye eporoo ninje. Nebuaki laiteng'enuok lenyena kulo lootorikutuo.

¹⁴ Ore pedol Yesus ena, neisikong' ninye nejoki ninje: Enjoo nkera epuonu enatii, emimitiki ninje, amu era enkarsishu Engai noo loonyanyukie nena.

¹⁵ Japa, aliki ndai: Olemeng'amu enkarsishu Engai anaa enkerai, nemejing' ninye atua tukul.

¹⁶ Nejap ninje nemayan neiteleiki ninje ngaik.

¹⁷ Ore pepuku ninye aim engoitoi, nekwetu oltung'ani obo negilaki ninye kung' neikilikwan ninye: Laiteng'enani sidai, kainyo aitobir, paidim atujung'u empuan nemeiting'?

¹⁸ Nejoki Yesus ninye: Ainyo pikijo sidai? Metii osidai neme obo lora Engai.

¹⁹ Itayolo nkitanapat: Miar metua; miar enkidikidikoto olmoruo o eng'oroyoni; mipurrisho; minjakenoki oltung'ani elejare; misimaa; ntaa kituak minyi o ng'utunyi!

²⁰ Nejoki ninye: Laiteng'enani, aibung'a nena pookin neba tʼenkitishu ai.

²¹ Neing'oraa Yesus ninye nenyorru ninye nejoki ninye: Nabo nikitong'orikia. Nno, timira pookin niata, pinjo laisinak, nilaata masaa te shumata; ore pindip, wou, tusujaki nidumakino esalaba ino!

²² Neilish ninye tʼolbae lʼele rorei, nelo eing'irisa; amu eata masaa kumok.

²³ Neing'orong'oraa Yesus mbat pookin nejoki laiteng'enuok lenyena: Oi egol, pejing' looata masaa atua enkarsishu Engai.

²⁴ Neing'asia laiteng'enuok lenyena too kulo rorei lenyena. Neitoki aliki Yesus nejoki ninje: Nakera, oi egol looirishakino masaa ejing' atua enkarsishu Engai!

²⁵ Elelek eim endames eudoto esindano nelang' oladupani ejing' atua enkarsishu Engai.

²⁶ Neing'asia ninje naleng' nejokino: Ang'ai naa loidim atopua?

²⁷ Neing'oraa Yesus ninje ejo: Meidimai ena too ltung'anak, kake eidimai tʼEngai; amu eidimai ntokitin pookin tʼEngai.

²⁸ Neiter Petros ajoki ninye: Ng'orai, kitung'aitie yook pookin nikisuj iye.

²⁹ Nejo Yesus: Japa, aliki ndai: Metii oltung'ani otung'aiye engaji arashu lalashera arashu nganashera arashu ng'otonye arashu menye arashu nkera arashu nkuruman tʼolbae lai o tʼolbae loo lomon lʼeng'ida,

³⁰ nemeng'amu aigil iip taata tʼena kata ngajijik o lalashera o nganashera o noong'otonye o nkera o nkuruman eshula o sinaitin, o tiatua olmaa olotu empuan nemeiting'.

³¹ Neaku ilkumok lʼelukunya lʼenkiting'oto o lʼenkiting'oto lʼelukunya.

³² Netii ninje engoitoi eilep aapuo Yerusalem; neiturukie Yesus ninje, neing'asia ninje neureishoi esujita. Neitoki aibung' Yesus kulo tomon o are neiter aliki ninje mbaak naapuo aaku te ninye, ejo:

³³ Eng'orai, kishumari metabaiki Yerusalem, neitarasakini Enkerai oltung'ani laidasak kituak o layolok lʼesirata, nepuo aaigwenaki ninye, pee, neitarasaki ninye loreren lemeata Engai;

³⁴ nemor ninje ninye nenotaki ngamulak near too nkeenda near ninye metua, nelapiu ninye, eishunyete ngolong'i uni.

³⁵ Nepuonu Yakobos o Yohanes, nkera e Sebedayos, enetii ninye nejoki ninye: Laiteng'enani, kiyeu nintobiraki yook enikionionu iye.

³⁶ Nejoki ninye ninje: Kainyo iyeuu naitobiraki ndai?

³⁷ Nejoki ninje ninye: Njoo yook kitoni obo te tatene ino o obo te kedyanye ino tiatua enkitook ino.

³⁸ Nejoki Yesus ninje: Miyololo ndai eniomonunu. Indimidimi ndai aatook enkwaru naok nanu, neibatisi ndai tʼenkibatisa naaibatisieki nanu?

³⁹ Nejoki ninje ninye: Ee, kindim. Nejoki Yesus ninje: Ore enkwaru naok nanu nipuopuo aaok, neibatisi ndai tʼenkibatisa naaibatisieki nanu;

⁴⁰ kake entonata te tatene o te kedyanye ai me enai, paisho ndai, kake eishori looitobirakaki.

⁴¹ Ore pening' ena kulo tomon, neiter aagorokino Yakobos o Yohanes.

⁴² Neipotu Yesus ninje enetii ninye nejoki ninje: Iyololo, aajo eitorisho kulo ooikenari aaku ilkarsisi loo loreren neata ilkituak lenye engolon too ninje.

⁴³ Meaku nji too ndai! Kake oloyeu neaku kitok too ndai, njeaku olaisyayani linyi;

⁴⁴ oloyeu tiatua ndai neaku lʼelukunya, njeaku olaisyayani loo pookin.

⁴⁵ Amu eitu elotu si ninye, Enkerai oltung'ani, peisyayakini ninye, kake peisyaisho ninye neishooio empuan enye, peaku elakunoto oo lkumok.

⁴⁶ Nepuonu ninje Yeriko. Ore peibung' ninye engoitoi aing'ua Yeriko te nebo o laiteng'enuok lenyena o esiamu kitok, neton Bartimayos, enkerai e Timayos, ora olmodooni, tʼembata engoitoi eomonisho.

⁴⁷ Ore pening' ninye, ajo ore Yesus le Nasaret ilo, neiter aapaa oltoilo ejo: Yesus, nakerai e David, tokorduaki!

⁴⁸ Nebuaki iltung'anak kumok ninye, pegira. Nepon ninye naleng' aapaa oltoilo: Nakerai e David, tokorduaki!

⁴⁹ Neitashe Yesus nejo: Empoto ninye. Neipot ninje ilo modooni nejoki ninye: Ntagolo oltau, nyototoi, kimpot ninye!

⁵⁰ Neiturraa ninye olkila lenye neipirri nelo enetii Yesus.

⁵¹ Nealiki Yesus ninye nejo: Kainyo iyeu naaitobiraki? Nejoki olmodooni ninye: Laiteng'enani, padolishoi.

⁵² Nejoki Yesus ninye: Nno, kitaretoko enkirukoto ino. Nedolishoi ninye nabokata nesuj ninye tʼengoitoi.