Marko 1 - Osotua Ng'ejuk

¹ Nyena enkiterata oo lomon Peng'ida le Yesus Kristos, Oinoti lʼEngai.

² Anaa petisiraki tiatua sirat oo layolounok: Ng'orai, airriwaa nanu olmalaika lai lukunya engomom ino, oitobir engoitoi ino;

³ etii ang'ata oltoilo lʼoloipotisho: Entobira engoitoi Olaitoriani, entorioi nkiimat enyena!

⁴ Neaku eibatis Yohanes ti angʼata neinosu enkibatisa enkitaalata nʼenkitaunoto oo nkitarruot.

⁵ Neipungʼoki ninye olosho pookin le Yudaya o pookin le Yerusalem neibatis ninye ninje tiatua engare Yordan, neibalu ninje nkitarruot enye.

⁶ Neaku eishopito Yohanes ilpapit lʼendames neata enkimeita enjoni tʼempolos enye nenya ilmaat o naishi oo mulugi;

⁷ neinosu ejo: Elotu tekurum ai ologol naalang' nanu namaiteu airrugoi, palaku nkeenda oo namuka enyena.

⁸ Aibatis nanu ndai tʼengare, kake elaibatis ninye ndai tʼOlmumua Sinyati.

⁹ Neaku too nona olong'i eewuo Yesus aing'ua Nasaret e Galilaya, neibatis Yohanes ninye te Yordan.

¹⁰ Ore peilepu nabokata eingʼua engare, nedol ebolo shumata nedoiki Olmumua ninye anaa olmaitai.

¹¹ Neaku oltoilo eing'ua shumata ajo: Ira iye Oinoti lai lanyor oshipakino oltau lai.

¹² Nearaa Olmumua ninye nabokata atua ang'ata.

¹³ Netii ninye ang'ata ngolong'i artam, etemita satan ninye, netii e nebo o iljangʼit, neisyayaki ilmalaikan ninye.

¹⁴ Ore peidip aaitarasai Yohanes, nelotu Yesus Galilaya, neinosu lomon lʼeng'ida lʼenkarsishu Engai ejo:

¹⁵ Etabaua enkata nenyiku enkarsishu Engai. Entaalata, eruko lomon lʼeng'ida!

¹⁶ Ore peim ninye embata olbalbal le Galilaya, nedol Simon o Andreas, olalashe le Simon, enang'aki rresheta enye atua olbalbal; amu era ninje larreshok loo singir.

¹⁷ Nejoki Yesus ninje: Ewotu, entusujaki tekurum ai, paitaa ndai larreshok loo ltung'anak.

¹⁸ Neing'ua ninje nabokata rresheta enye, nesuj ninye.

¹⁹ Nenyikaa ninye peno nedol Yakobos le Sebedayos o Yohanes, olalashe lenye, ootii atua engalawa, eitobirita rresheta; neipot ninje nabokata.

²⁰ Neing'ua ninje menye lenye Sebedayos tiatua engalawa te nebo o laisyayak, nepuo nesuj ninye.

²¹ Neibung' ninje engoitoi nepuo Kapernaum; nejing' ninye nabokata tʼengolong' naeng'ieng'areki atua engaji Engai neiteng'enisho.

²² Neing'asia ninje tʼenkiteng'enare enye, amu eiteng'ena ninye ninje anaa olopeny engolon, neme neijia anaa layolok lʼesirata.

²³ Netii atua engaji Engai enye oltung'ani oata Olmumua duruki, neapaa ninye oltoilo

²⁴ ejo: Kainyo kiataiye iye, Yesus le Nasaret? Iewuo iye, piminye yook. Ayolo olira iye, Osinyati lʼEngai.

²⁵ Nebuaki Yesus ninye ejo: Tumuka enkutuk, tupuku te ninye!

²⁶ Neipushunye Olmumua duruki te ninye, neishir tʼoltoilo kitok, nepuku te ninye.

²⁷ Neing'asia pookin neikilikwanaro baiki aajo: Kainyo ena? Kaa kiteng'enare ng'ejuk engolon ena? Neitanap ninye ilmumuan duruk nening' ninje ninye.

²⁸ Neibulu mbaak enyena nabokata ewueji pookin nemanita Galilaya.

²⁹ Nepuku ninje nabokata tʼengaji Engai nepuo atua engaji e Simon o Andreas te nebo o Yakobos o Yohanes.

³⁰ Neirrag engaputani e Simon, eata oltikana, neliki ninje ninye mbaak enyena.

³¹ Nelotu neapaa aibung' engaina enye, neing'ua oltikana ninye, neisyayaki ninye ninje.

³² Ore peaku teipa, eidipa atadoi engolong', neaki ninje ninye loomoiyaa pookin o looata ilmeneng'a.

³³ Neiturrurro engang' pookin tʼendaloishi.

³⁴ Neishiunye ninye loomoiyaa kumok, neitupuku ilmeneng'a kumok neitu eisho ilmeneng'a meiroro, amu etayoloutuo ninje ninye.

³⁵ Ore pepej ewuas, eitu ekenyu abaraki, neinyototo ninye nepuku nelo ewueji nemetii iltung'anak, nesaisho te ina alo.

³⁶ Nesuj ninye Simon o lʼemboitei enye.

³⁷ Ore petum ninye, nejoki ninye: King'oru pookin.

³⁸ Nejoki ninye ninje: Maapeti engai wueji tiatua ngang'itie naataana, patum ainosu lomon lʼEngai te ina alo; amu te ina atupukuo.

³⁹ Nelo einosaa lomon lʼEngai tiatua ngajijik Engai enye te Galilaya pookin nemir ilmeneng'a.

⁴⁰ Nelotu enetii ninye oltung'ani loata enkea oo lbolot nesai ninye negilaki kung' nejoki ninye: Teni iyeu, nikindim aisuja.

⁴¹ Neibung'aki Yesus ninye engoshoke nanana neitorioo engaina enye neporoo ninye nejoki: Ayeu, sujai!

⁴² Ore ake eirorita, neing'ua enkea oo lbolot ninye nabokata neisujai.

⁴³ Neitanap ninye tʼengolon nearaa ninye nabokata

⁴⁴ nejoki ninye: Ng'orai, pimiliki oltung'ani ororei, kake nno, pintadol kion olaidasani, pintarasaa nʼenkisujata ino naitanapua Mose, peaku enjakenishu too ninje.

⁴⁵ Ore peidip atupuku ninye, neiter ainosu nkumok neibulunye ororei neijia, ajo eitu eidim ninye atijing'a atua engang' tʼewuas, kake etii aulo, ewueji nemetii iltung'anak; nepuonu enetii ninye, eing'ua wuejitin pookin.