Luka 5 - Osotua Ng'ejuk

¹ Neaku eroosh esiamu ninye, pening' lomon lʼEngai, neitashe ninye tʼembata olbalbal Genesaret,

² nedol ngalawani are naaitashe tʼembata olbalbal; netadoutuo larreshok too ninje, eisujita rresheta enye.

³ Nejing' ninye engalawa nabo nara ne Simon nesai ninye, pelam peno enetoiyo. Ore peidip atotona, neiteng'en isiamin tiatua engalawa.

⁴ Ore peidip airoro, nejoki ninye Simon: Tinyikai metabaiki eneasur, entadoikiti rresheta inyi, pirreshishosho.

⁵ Nealu Simon nejo: Laiturukoni, kiteekenyate enkiarie pookin, neitu kitum toki; kake tʼolbae lʼororei lino alaitadoiki rresheta.

⁶ Ore peidip aaikuna nji, neiturrur enkumoi kitok oo singir, nedung'udung'o rresheta enye.

⁷ Neyuku ninje lʼemboitei enye lootii atua engai alawa, pepuonu aaretoki ninje.

⁸ Ore pedol Simon Petros ena, nebatatakino nkung' e Yesus nejo: Tung'aiyoki, Laitoriani, amu ara nanu oltung'ani aitarruoni!

⁹ Amu eibung'a enking'asiata ninye o pookin ootaboitare ninye tʼolbae lʼerreshore oo singir looinoto ninje,

¹⁰ neijia baiki Yakobos o Yohanes, nkera e Sebedayos, loora lʼemboitei e Simon. Nejoki Yesus Simon: Miureisho! amu inter aaku taata olarreshoni loo ltung'anak.

¹¹ Ore peidip aatereu ngalawani enetoiyo, neing'ua ninje pookin nesuj ninye.

¹² Neaku ore etii ninye atua engang' nabo, naa ng'orai, etii oltung'ani obo oiganya enkea oo lbolot; ore pedol ninye Yesus, nebatata aijululori nesai ninye ejo: Laitoriani, teni iyeu, nikindim aisuja.

¹³ Neitorioo ninye engaina enye neporoo ninye ejo: Ayeu, sujai! Neing'uaiki enkea oo lbolot nabokata.

¹⁴ Neitanap ninye, pemeliki oltung'ani, kake „nno, pintadol kion olaidasani, pinjooio nʼenkisujata ino anaa peitanapua Mose, peaku enjakenishu too ninje“.

¹⁵ Kake nepona aaibulaa mbaak enyena, neiturrurro siamin kumok, pening' ninye neishiunye leyat enye:

¹⁶ kake nerishunye nelo ewueji nemetii iltung'anak asaisho.

¹⁷ Neaku tʼengolong' nabo, eiteng'enisho ninye; etotonitio Ilfarisayoi o layolok lʼesirata ooetuo eing'ua ngang'itie pookin e Galilaya o Yudaya o Yerusalem; ne-tii engolon Olaitoriani e nebo o ninye, neishiunye ninye oltung'ani pookin.

¹⁸ Naa ng'orai, enapita leak ooje te shumata erruat oltung'ani loata osupetai onunukisho, neyeu nenap ninye atua, peitaper tʼengomom enye.

¹⁹ Ore peitu etum eneimie ninye tʼolbae lʼolorere, neilepaki keperaji, neimie atua ilmatofarini neitadoiyo ninye te nebo o erruat enye metabaiki tʼempolos enye, tʼengomom e Yesus.

²⁰ Ore pedol ninye enkirukoto enye, nejo: Letung'ani, kintaikiaki nkitarruot inono!

²¹ Neiter aaibirribir layolok lʼesirata o Ilfarisayoi nejo: Kang'ai lora ele olimu morot Engai? Kang'ai loidim aitau nkitarruot neme Engai openy ake?

²² Ore peyolou Yesus nkibirribirrat enye, nealu nejoki ninje: Kainyo imbirribirrirri too ltauja linyi?

²³ Kaa nalelek ajo: Kintaikiaki nkitarruot inono, arashu: Nyototoi, tilimanai?

²⁴ Kake piyolouu, aajo eata Enkerai oltung'ani engolon tʼenkop, peitau nkitarruot — nejoki ele loata osupetai: Aaliki iye, nyototoi, tudumakinoi erruat ino, nno engaji ino!

²⁵ Neitashe ninye nabokata tʼengomom enye, nedumu enatepetaiye nelo engaji enye, eitadaraa Engai.

²⁶ Neibung' enking'asiata ninje pookin neitadaraa Engai, neigany enkuretishu ninje nejo: Kitadua nkiputukunyot taata.

²⁷ Ore tekurum oo kuna baak nepuku nedol olaoshoni obo le kodi, oji engarna enye Levi, eton tʼeneoshieki kodi, nejoki ninye: Tusujaki!

²⁸ Neing'ua ninye pookin, neinyototo nesuj ninye.

²⁹ Neitobiraki Levi ninye endaa kitok tʼengaji enye, neaku enkiturrurroto kitok oo laoshok le kodi o lkulekai oototonitio te nebo o ninje.

³⁰ Neing'unyung'unyaki Ilfarisayoi o layolok lʼesirata laiteng'enuok lenyena nejo: Ainyo pidaada niokishosho ndai te nebo o laoshok le kodi o laitarruok?

³¹ Nealu Yesus nejoki ninje: Meyeu loora biot olaishiunoni, kake loomoi;

³² eitu alotu nanu, paipot supati, kake laitarruok, petum aataalata.

³³ Nejoki si ninje ninye: Epukoo laiteng'enuok le Yohanes naleng' neitaa sayat, neijia anaa loo Lfarisayoi, kake nenya neokisho ilkulonono.

³⁴ Nejoki Yesus ninje: Mindimidimi aaitupukoi nkera enkiama, epon etii osanja e nebo o ninje.

³⁵ Kake epuo aapuonu ngolong'i naapuoi aaoru ninje osanja, nepuo aapukoo too nona olong'i,

³⁶ Neliki ninje enkitanyanyukiet: Metii o obo lopolosu erashet olkila ng'ejuk nepik atua olkila musana; teni eiko nji, nepolos baiki ele ng'ejuk, nemenyorra erashet olkila ng'ejuk o ilo musana.

³⁷ Nemetii olopik olmarua ng'ejuk atua ilbenia musan; teni eiko nji, nepolos olmarua ng'ejuk ilbenia neibukori ninye, neimin ilbenia.

³⁸ Kake epiki olmarua ng'ejuk atua ilbenia ng'ejuko, nepoku pokira are.

³⁹ Nemetii o obo lotooko olmarua musana neyeu olng'ejuk, amu ejo: Eikash olmusana.