Luka 4 - Osotua Ng'ejuk

¹ Nerrinyo Yesus, eiganya Olmumua Sinyati, eing'ua Yordan, neriki tʼolmumua ang'ata

² netem satan ninye ngolong'i artam. Neitu enya ninye toki too nona olong'i; ore peishunye ninje nening'olamei.

³ Nejoki satan ninye: Teni ira iye Oinoti lʼEngai, tiaki ele soit, peaku olmkate.

⁴ Nealiki Yesus ninye: Etisiraki, ajo: Meishiu oltung'ani tʼolmkate ake, kake tʼororei pookin lʼEngai.

⁵ Nerik satan ninye shumata oldonyo oado neitadol ninye nkarsishuni pookin olmaa nabo kata.

⁶ Nejoki satan ninye: Aalaisho iye ina golon pookin o enkitook enye, amu aaitarasakaki si nanu nalaisho si nanu ninye olayeu;

⁷ akae, teni kiserem tʼengomom ai, neaku pookin nkunonono.

⁸ Nealu Yesus nejoki ninye: Etisiraki: Teserema Olaitoriani, Engai ino, nisyayaki ninye openy ake!

⁹ Nerik ninye Yerusalem neitasheye ninye tʼoldidio lʼengaji sinyati nejoki ninye: Teni ira Oinoti lʼEngai, tusulakinoi enkop,

¹⁰ amu etisiraki: Kintanapaki ilmalaikan lenyena, pikirrip iye,

¹¹ nikinap te shumata oo ngaik, pemikinkob osoit enkeju ino.

¹² Nealiki Yesus nejoki ninye: Etejoki: Mitem Olaitoriani, Engai ino!

¹³ Ore peidip satan enkitasuroto pookin, neng'as aing'ua ninye.

¹⁴ Neitoki alotu Yesus tʼengolon Olmumua Galilaya neibulaa mbaak enyena atua loshon pookin oomanita.

¹⁵ Neiteng'enisho ninye tiatua ngajijik Engai enye neitaa iltung'anak pookin ninye kitok.

¹⁶ Nelotu ninye Nasaret naitubulunyeki ninye, nejing' tʼengolong' naeng'ieng'areki atua engaji Engai, anaa petii orregie lenye, neinyototo, peisoma.

¹⁷ Neishori ninye enkitabu olayolounoni Yesaya. Ore pebol ina kitabu, netum ewueji netisiraki:

¹⁸ Etii Olmumua lʼOlaitoriani shumata ai, onaa aaela, painosaki laisinak lomon lʼeng'ida; aairriwaiye, painosaki looteenaki elakunoto o ilmodook endolishoto; palaku naing'uaiki lootorogonyaki,

¹⁹ painosaki olari lotonyorraki lʼOlaitoriani.

²⁰ Neigen ninye enkitabu neisho olaisyayani neton. Neing'oraa ngonyek pookin tiatua engaji Engai ninye.

²¹ Neiter ninye ajoki ninje: Eitabaiyoki taata ena sirata atua nkiyaa inyi.

²² Neijakenoki pookin ninye neiputukuny tʼolbae loo rorei lʼengaripo ootupukutuo tʼenkutuk enye, nejo: Mera ninye enkerai e Yosef?

²³ Nejoki ninye ninje: Esipa, kipuopuo aaliki ena kitanyanyukiet: Laishiunoni, njiunye kion! Ai kitoning'o ntokitin kituak naataa te Kapernaum! Ntobira baiki nji tene, tiatua olosho le minyi lino!

²⁴ Nejo ninye ake: Japa, aliki ndai: Metii olayolounoni oanyiti tiatua olosho lenye.

²⁵ Naliki ndai tʼesipata: Etii ngolia kumok naatii atua Israel too ngolong'i e Eliya, eigenoki shumata larin okuni o lapaitin ile neaku olamei kitok tiatua olosho pookin,

²⁶ neitu eirriwakini Eliya o nabo too ninje neme atua Sarepta oo Sidonia, enetii eng'oroyoni oliai.

²⁷ Netii ilkumok lʼenkea oo lbolot atua Israel tʼenkata olayolounoni Elisa, neitu eisuji o obo too ninje, neme Naeman, oltung'ani le Siria.

²⁸ Neigany ninje pookin engoro tiatua engaji Engai, etoning'o kuna,

²⁹ neinyototo nerrumoki aulo engang' nerik ninye metabaiki oldidio lʼoldonyo oshetakino engang' enye, pesulaa ninye;

³⁰ kake neim ninye empolos enye, nelo.

³¹ Nedou ninye metabaiki Kapernaum, engang' e Galilaya, neaku eiteng'en ninje too ngolong'i naaeng'ieng'areki.

³² Neiputukuny ninje naleng' tʼenkiteng'enare enye, amu etii rorei lenyena atua engolon.

³³ Netii atua engaji Engai oltung'ani oata Olmumua menengʼani duruki, nedar ninye tʼoltoilo kitok:

³⁴ Oi, kainyo kiataiye iye, Yesus le Nasaret? Iewuo iye, piminye yook, ayolo olira iye, Osinyati lʼEngai.

³⁵ Nebuaki Yesus ninye, ejo: Tumuka enkutuk, tupuku tiatua ninye. Nenang'aki olmeneng'ani ninye polos nepuku te ninye neitu easaki toki.

³⁶ Neaku enkingʼasia too pookin neirorioro tʼempolos enye nejo: Kalo rorei ele? Amu eitanap tʼengolon o tʼenkidimata ilmumuan duruk, nepuku.

³⁷ Neibulu mbaak enyena too wuejitin pookin olosho lomanita.

³⁸ Neinyototo ninye aing'ua engaji Engai nejing' atua engaji e Simon. Neaku eibung'ita oltikana kitok engaputani e Simon, nesai ninje ninye tʼolbae lenye.

³⁹ Neitasheiki ninye nebuaki oltikana, neing'ua ninye, neinyototo nabokata neisyayaki ninje.

⁴⁰ Ore pedoiyo engolong', neaki ninje pookin ninye iltamoiya looata nkeaitin oo muain kumok. Neiteleiki ninye ninje, oltung'ani pookin, ngaik neishiunye ninje.

⁴¹ Nepuku baiki ilmeneng'a too lkumok, edar nejo: Ira iye Oinoti lʼEngai! Nebuaki neitu eisho ninje eiro; amu etayoloutuo ninje, aajo era ninye Kristos.

⁴² Ore peaku dama, nepuku ninye nelo enemetii iltung'anak; neing'oru siamin ninye nepuonu enetii ninye neibok ninye, pemelo aing'ua ninje.

⁴³ Nejoki ninye ninje: Meata kata namainosaki baiki nkulie ang'itie lomon lʼeng'ida lʼenkarsishu Engai, amu te ina bae aairriuaki.

⁴⁴ Neaku einosaa lomon lʼEngai tiatua ngajijik Engai e Yudaya.