Luka 22 - Osotua Ng'ejuk

¹ Netinyikutua ngolong'i kituak oo lmkaten lemeisiiio, naaji pasaka.

² Neing'oru laidasak kituak o layolok lʼesirata eneiko, peiminye ninye; kake eturia olorere.

³ Kake eidipa atijing'a satan atua Yudas lora Iskariotes, nera lʼesiana oo kulo tomon o are.

⁴ Nelo ader oo laidasak kituak o ilkigeluni eneiko, peitarasaki ninje ninye.

⁵ Neng'ida ninje nedung'okino enkishooroto oo ngoshola.

⁶ Neiruk ninye neing'oru enkata sidai naitarasarie ninye, metii olorere.

⁷ Eewuo engolong' oo lmkaten lemeisiijo naidasishoreki pasaka.

⁸ Neirriwaa ninye Petros o Yohanes nejo: Embung'a engoitoi, entobirakiti yook pasaka, pikinya.

⁹ Nejoki ninje ninye: Kaji iyeu nikipuo aaitobirie?

¹⁰ Nejoki si ninye:Eng'orai, ore pijing'ijing'i ndai atua engang', nelatumore ndai oltung'ani obo onapita emoti engare; entusuj ninye metabaiki engaji najing' ninye;

¹¹ entiakiti olopeny engaji: Kitiaka Olaiteng'enani: Kodee engaji oo lomon, panya te ina alo pasaka te nebo o laiteng'enuok lainei?

¹² Nelaitadol ilo ndai olgilata kitok oitobirakaki ntoneta; entobira te ina alo.

¹³ Nepuo neinepu anaa petiaka ninye ninje, neitobir pasaka.

¹⁴ Ore pebau enkata, netoni o lairriwak tomon o are te nebo o ninye.

¹⁵ Nejoki ninye ninje: Tʼeng'warrata atang'warra ainosa ena pasaka te nebo o ndai, epon eitu aaisili.

¹⁶ Amu aliki ndai: Maitoki anya ninye tukul metabana neitabaiari tiatua enkarsishu Engai.

¹⁷ Neibung' ninye enkwaru neliki ashe nejo: Embung'a ena, entoorikinoto tiatua ndai oopeny!

¹⁸ Amu aliki ndai: Maok tukul, eiter taata tʼeishoi enjata olmarua, metabana nelotu enkarsishu Engai.

¹⁹ Neibung' olmkate nejo ashe nebelibel ninye neisho ninje nejo: Era ele osesen lai loishorunyeki ndai. Enkuna ena, pikidamumu nanu.

²⁰ Naa neijia eibung'a ninye enkwaru, eidipa endaa, nejo: Era ena kwaru osotua ng'ejuk tiatua osarge lai oibukorieki ndai.

²¹ Kake eng'orai, etii engaina olaaitarasaa nanu, e nebo o nanu tʼenaraa.

²² Amu eloito Enkerai oltung'ani anaa petayeuoki, kake, ee, kake aiya ilo tung'ani oitarasaa ninye!

²³ Neiter ninje aaikilikwanaro tiatua aten, ang'ai ele too ninje olaitobir ena.

²⁴ Neiter baiki enkitarrikino tiatua ninje, kang'ai too ninje eikenari aa kitok.

²⁵ Nejoki ninye ninje: Eitorisho ilkarsisi loo loreren o looata engolon lenye eipoti laitobirak aripi.

²⁶ Kake me neijia ndai! Amu olkitoklinyi njeaku anaa olkinyi o olaiturukoni anaa olaisyayani.

²⁷ Amu kalo kitok, oloton tʼendaata arashu oloisyaisho? Me oloton tʼendaata? Ara nanu tiatua ndai anaa oloisyaisho.

²⁸ Irara ndai lootobiko te nebo o nanu tiatua nkitasurot ainei.

²⁹ Naisho nanu ndai enkarsishu anaa paaishoo Papa lai nanu,

³⁰ pipuopuo aanya niokioko tʼenaraa tiatua enkarsishu ai, nipuopuo aatoni te shumata oo lorikaishi lʼenkitoria ningwenakiki ntipati tomon o are e Israel.

³¹ Nejo Olaitoriani: Simon, Simon, ng'orai, etayeuo satan nekut ndai anaa engano:

³² kake aatasayaka nanu iye, pemeng'oru enkirukoto ino; ore piala iye, ntagolo lalashera linono.

³³ Nejoki ninye: Laitoriani, aidipakine nanu, palo te nebo o iye atua eenata o enkea.

³⁴ Nejo si ninye: Petros, aajoki iye: Epon eitu eorito taata olkikusieki, nikilo amiki aigil uni, ajo mikiyolo.

³⁵ Nejoki ninye ninje: Ore enkata nairriwaiye ndai, miatata entutua arashu olbene arashu namuka, ketong'orikia ndai toki? Nejo si ninje: Oi me!

³⁶ Nejoki ninye ninje: Akae, ore oloata taata entutua, njeibung' ninye; neijia baiki olbene; ore lemeata toki njemir olkila lenye, peinyang'u olalem.

³⁷ Amu aliki nanu ndai: Meata kata nemaitabaia nanu ena natisiraki: Eikenaiyoki te nebo o laitarruok. Amu enatisiraki te nanu, neata enkitabaiaroto.

³⁸ Nejo si ninje: Laitoriani, ng'orai, etii ene lalema aare. Nejoki ninye ninje: Akae, ebaiki.

³⁹ Nepuku nelo Oldonyo loo loirienito anaa petiu orregie lenye; nesuj laiteng'enuok ninye.

⁴⁰ Ore pebaia ine wueji, nejoki ninje: Entasaishoto, pemijing'ijing'i atua enkitasuroto.

⁴¹ Neigut neing'ua ninje nelo enebaiki osoit negil kung' nesaisho

⁴² nejo: Papa, teni iyeu, ntapaashaki ena kwaru; kake njoo meaku eyeunoto ai, njeaku enino!

⁴³ Nepukoki olmalaika ninye te shumata neitagol ninye.

⁴⁴ Ore eapare kion, nepon asaisho tʼenyuata kitok. Neaku enkinyinyiret enye anaa ilkitong'at lʼosarge oodoiki enkop.

⁴⁵ Ore peinyototo ninye tʼesayata enye, nelotu enetii laiteng'enuok lenyena neinepu ninje eirura tʼolbae lʼenkilishoto,

⁴⁶ nejoki ninje: Ainyo pirurara? Enyoito, entasaishoto, pemijing'ijing'i atua enkitasuroto!

⁴⁷ Ore epon eirorita ninye, ng'orai, eetuo olorere o oloipoti Yudas, obo too kulo tomon o are, oiturukie ninje, nenyikaki ninye Yesus, peiye eng'utut ninye.

⁴⁸ Nejoki Yesus ninye: Yudas, intarasaa Enkerai oltung'ani tʼeng'ututata?

⁴⁹ Ore pedol kulo looturubare ninye enaaku, nejo: Laitoriani, ke kiar ninje too lalema?

⁵⁰ Near obo too ninje olaisyayani lʼolaidasani kitok nedung' enkiyok enye e tatene.

⁵¹ Nealu Yesus nejo: Emimitiki ninje! neing'unye enkiyok enye neishiunye ninye.

⁵² Nejoki Yesus laidasak kituak o ilkigeluni lʼengaji sinyati o laigwenak looetunye ninye: Ietuo ndai too lalema o too lkuman anaa loopuo aaibung' esing'ou.

⁵³ Aidipa atii e nebo o ndai ngolong'i pookin atua engaji sinyati, neitu kielielie ngaik; kake enkata inyi ena o engolon enaimin.

⁵⁴ Neibung' ninje ninye aarik, nerik engaji olaidasani kitok. Nesuj si ninye Petros tʼenelakwa,

⁵⁵ Ore peinok ninje enkima tʼempolos e boo, netoni te nebo; neton Petros tʼempolos enye.

⁵⁶ Nedol engaisyayani ninye, eton tʼenedalita enkima, nejur ninye nejo: Etaboitare si ele ninye.

⁵⁷ Nemiki ninye nejo: Nang'oroyoni, mayolo nanu ninye.

⁵⁸ Ore tʼenkata kinyi nedol olekai ninye nejo: Ira si iye oliatua ninje. Nejo Petros: Letung'ani, mara.

⁵⁹ Ore peishunye anaa esaa nabo, nekurraki olekai ninye nejo: Esipa, eturubare si ele ninye, amu era ole Galilaya.

⁶⁰ Nejo Petros: Mayolo enijoito. Ore nabokata, epon eirorita ninye, neorito olkikusieki.

⁶¹ Neibelekenya Olaitoriani neing'oraa Petros, nedamu Petros rorei lʼOlaitoriani anaa petiaka ninye, ajo epon eitu eorito taata olkikusieki, nikilo amiki aigil uni.

⁶² Nelo ninye aulo, eishirita naleng'.

⁶³ Ore kulo leak looibung'a ninye, nekweniye near ninye

⁶⁴ neop ngonyek enyena near engomom enye neikilikwan ninye nejo: Tumusu olikitaara?

⁶⁵ Nemor ninje ninye too nkulie morot.

⁶⁶ Ore peaku dama, neiturrurro enkigwena olorere, laidasak kituak o layolok lʼesirata, nerik ninje ninye atua enkigwena enye

⁶⁷ nejo: Teni ira iye Kristos, tiaki yook! Nejoki ninye ninje: Teni aliki ndai, nimirukuruku tukul;

⁶⁸ teni aikilikwan, nimialulu tukul nimiking'uaikiki.

⁶⁹ Kake, eiter taata, elaton Enkerai oltung'ani te tatene engolon Engai.

⁷⁰ Nejo pookin: Akae, ira iye naa Enkerai Engai? Nejoki ninye ninje: Ijojo ndai, aajo ara nanu.

⁷¹ Nejo ninje: Kainyo kintoki aayeunye enjakenishu? Amu kitoning'o oopeny tʼenkutuk enye.