Luka 2 - Osotua Ng'ejuk

¹ Neaku nepuku too nona olong'i enkitanapata e kaisar Augustos, pesiri olmaa pookin.

² Nera ena sirata en elukunya nataa, eitore Kirenios olosho Siria.

³ Neibung' iltung'anak pookin engoitoi nepuo, pesiri oltung'ani pookin tʼengang' enye.

⁴ Nedumunye baiki si ninye Yosef, eing'ua Galilaya, engang' Nasaret, neilep alo Yudaya, metabaiki engang' e David, naji Betlehem, tiaraki nara ninye l'engaji o lʼenkishomi e David,

⁵ pesiri ninye te nebo o Maria, eng'oroyoni enye, natasanjana, nemena ninye.

⁶ Neaku ore etii ninje ina alo, nebaia ngolong'i naaishore ninye,

⁷ neiu ninye olkikau lenye neirin ninye too rasheta oo nkera neirragie ninye tiatua embout, tiaraki neitu etum ninje engai wueji tiatua engaji oo lomon.

⁸ Netii lairritak atua ilo osho ooirritita enjoo enye te boo tʼolkamba le kiarie.

⁹ Nepukoki ninje olmalaika lʼOlaitoriani neman enkitook Olaitoriani ailang'aki ninje, neureishoi ninje tʼenkuretishu kitok.

¹⁰ Nejoki olmalaika ninje: Emiureisho! Amu eng'orai, ainosaki ndai eng'ida kitok naaku noo loreren pookin;

¹¹ amu etoikioki ndai taata Olaitopuani, oji Kristos, Olaitoriani, tʼengang' e David.

¹² Naa ele olponoto too ndai: ipuopuo aatum enkerai nairinaki too rasheta oo nkera, eirragieki tiatua embout.

¹³ Nelioi nabokata te nebo o olmalaika oltim kitok le shumata loitadaraa Engai nejo:

¹⁴ Njeata Engai enkitook te shumata, njeaku eseriani tʼenkop, too ltung'anak lʼenyorrata.

¹⁵ Neaku ore peing'ua ilmalaikan ninje, pepuo shumata, nejokino lairritak: Maapeti metabaiki Betlehem, piking'oraa ena bae nataa, naitayolo yook Olaitoriani.

¹⁶ Nesioio ninje aapuo neinepu Maria o Yosef o enkerai, eirrag tiatua embout.

¹⁷ Ore peidip aatadol, neinosaa embae natiakaki ninje tʼolbae lʼena kerai.

¹⁸ Ore pookin lootoning'o, neiputukuny too kuna naatiakitia lairritak ninje.

¹⁹ Neshum Maria kuna baak pookin neibirribir tiatua oltau lenye.

²⁰ Nerrinyo lairritak neitaa kitok neitadaraa Engai too mbaak pookin naatoning'o nedol, neijia anaa petiakaki ninje.

²¹ Ore peishunye ngolong'i isiet, pemurati enkerai, neipoti engarna enye Yesus, anaa peipoto olmalaika eton eitu eng'amuni tiatua engoshoke e ng'otonye.

²² Ore pebau ngolong'i enkisujata enye, anaa ejo nkitanapat e Mose, nenap ninje ninye Yerusalem, peitarasaki Olaitoriani,

²³ neijia anaa petisiraki tiatua nkitanapat Olaitoriani: Ore olee pookin obol enkuset e ng'otonye, njeipoti osinyati lʼOlaitoriani,

²⁴ petum aaishoi enkidasare, neija anaa petejoki tiatua enkitanapata Olaitoriani: ilmaita aare arashu nkera are oo lmaita.

²⁵ Naa ng'orai, etii oltung'ani atua Yerusalem, oji engarna enye Simeon; nera ele tung'ani supat neure Engai neanyu enkilejilejata e Israel, netii Olmumua Sinyati atua ninye;

²⁶ neitayolo Olmumua Sinyati ninye, ajo medol enkea, eitu edol Kristos lʼOlaitoriani.

²⁷ Nelotu ninye tʼerikunoto Olmumua atua engaji sinyati. Ore pepuonu lootoiutuo enkerai Yesus, peitobir anaa petiu orregie loo nkitanapat tʼolbae lenye,

²⁸ neng'amu ninye too ngaik enyena neitadaraa Engai, ejo:

²⁹ Laitoriani, njoo taata olaisyayani lino, pelo tʼeseriani anaa pitejo,

³⁰ amu etadua ngonyek ainei enkitopuata ino,

³¹ nintobira tʼengomom oo loreren pookin,

³² enkilang'et nailang'aki loreren o enkitook olorere lino Israel.

³³ Neiputukuny menye lenye o ng'otonye too rorei looimakaki te ninye.

³⁴ Nemayan Simeon ninje nejoki Maria, ng'otonye enye: Ng'orai, epiki ninye, peaku embatatata o enkitasheito oo lkumok tiatua Israel o olponoto oitemenetari —

³⁵ nikilaim si iye olalem atua oltau —, pebolunye ndamunot oo ltauja kumok.

³⁶ Netii engayolounoni nabo naji Ana, entito e Fanuel, lenkishomi e Aser; naa moruo ninye naleng', etobiko eata olmoruo larin oopishana, eiter entitoishu enye,

³⁷ nera ninye engoliai oo larin ntomoni isiet o ong'wan, neitu eing'ua engaji sinyati neisyayaki Engai dama o kiarie too mpukorot o too sayat.

³⁸ Nelotu si ninye te ina kata neliki Engai ashe neinosaki mbaak enyena kulo pookin ootaanyutua enkitopuata te Yerusalem.

³⁹ Ore peidip ninje aaitabai pookin natii atua nkitanapat Olaitoriani, nerrinyo aapuo Galilaya metabaiki engang' enye Nasaret.

⁴⁰ Nebulu ina kerai negolu tʼolmumua, nebore eng'eno neboitare eng'adunoto Engai ninye.

⁴¹ Nepuo lootoiutuo ninye Yerusalem tʼolari pookin too ngolong'i e pasaka.

⁴² Ore peaku ninye noo larin tomon o are, neilep aapuo ninje Yerusalem tʼorregie loo ngolong'i kituak.

⁴³ Ore peidip aaitabai nona olong i, nerrinyo ninje ang', nebik enkerai Yesus te Yerusalem, neitu eyolou ena lootoiutuo ninye.

⁴⁴ Nejo ninje, aajo etii ninye atua iltung'anak lʼolototo, nepuonu olototo lʼengolong' nabo neing'oru ninye tiatua iltung'anak lʼenkishomi o lʼemboitei;

⁴⁵ ore pelau ninye, nerrinyo metabaiki Yerusalem, eing'oru ninye.

⁴⁶ Neaku ore peishunye ngolong'i uni, netum ninye tiatua engaji sinyati, eton tʼempolos oo laiteng'enak, einining' ninje neikilikwan ninje.

⁴⁷ Neirut naleng' pookin lootoning'o ninye tʼolbae lʼeng'eno enye o tʼolbae loo aleta enyena.

⁴⁸ Ore pedol ninje ninye, neing'asia naleng', nejoki ng'otonye enye ninye: Nakerai, ainyo pinkunaka yook nji? Ng'orai, king'orutua, minyi lino o nanu, tʼosina.

⁴⁹ Nejoki ninye ninje: Ainyo piking'orutua? Miyololo ndai, aajo meata kata namatii atua ne Papa lai?

⁵⁰ Neitu eyolou ninje ele rorei lotiaka ninje.

⁵¹ Nedou ninye te nebo o ninje ne-lotu Nasaret neaku ening' ninje. Neshum ng'otonye enye kulo rorei pookin tiatua oltau lenye.

⁵² Nenyikaa Yesus tiatua eng'eno o tiatua embulunoto o tiatua eng'adunoto tʼEngai o too ltung'anak.