Luka 18 - Osotua Ng'ejuk

¹ Neliki ninye ninje enkitanyanyukiet, peiye edol ninje, aajo meata kata nemesaisho oshi, pemenaura,

² nejo: Etii atua engang' nabo olaigwenani obo leitu eurei Engai nemeshilu oltung'ani.

³ Netii atua ena ang' engoliai nabo, nelotu enetii ninye nejo:Njooki enkigwena sidai tʼolaitang'oroni lai!

⁴ Neitu eyeu ninye te ina kata. Nejo tekurum tiatua kion: Ore teni maurei Engai namashilu oltung'ani,

⁵ kake tiaraki naaisho ena oliai enyamali naleng', nalaisho ninye enkigwena sidai, pemaalotu tʼenkiting'oto aitanaur.

⁶ Nejo Olaitoriani: Entoning' enajo ele aigwenani torrono!

⁷ Ke, meisho Engai enkigwena sidai lootegeluaki lenyena ooishiraki ninye dama o kiarie neng'iriaki ninye ninje tʼeanyunoto?

⁸ Aliki ndai: Elaisho ninye ninje enkigwena sidai nabokata. Kake, teni elotu Enkerai oltung'ani — ketum sa ninye enkirukoto tʼenkop?

⁹ Nejoki ninye ematua oo ltung'unak lootejo tiatua aten, aajo era supati, nemen ilkulekai tung'anak, ena kitanyanyukiet:

¹⁰ Eilepa iltung'anak aare aapuo engaji sinyati, pesaisho; nera obo Olfarisayos o olekai olaoshoni le kodi.

¹¹ Neitashe Olfarisayos nesaisho tiatua kion nji: Engai, aaliki iye ashe, tiaraki namanyanyukie nanu kulekai tung'anak: sing'ouni, laisilok, laarak lʼenkidikidikoto olmoruo o eng'oroyoni arashu anaa ele aoshoni le kodi.

¹² Apukoo nanu aigil are tiatua enjuma naishooio ematua e tomon too pookin natum.

¹³ Neitashe si ninye, olaoshoni le kodi, tʼenelakwa neitu eyeu neapaki ngonyek enyena shumata, kake neosh olgoo lenye nejo: Engai, tang'aduaki nanu, olaitarruoni!

¹⁴ Aliki ndai: Etadoiye ele nelo engaji enye, eitaaki supat, nelang' ilo liare. Amu oltung'ani pookin loitaa kion kitok, neitadouni ninye; ore oloitadou kion, neitaai kitok.

¹⁵ Nerikoki ninje ninye nkera kutiti, peiye eporoo ninje. Ore pedol laiteng'enuok ena, nebuaki ninje.

¹⁶ Neipot Yesus ninje tʼenetii nejo: Einjoo nkera epuonu enatii, emimitiki ninje; amu era enkarsishu Engai noo loonyanyukie ninje.

¹⁷ Japa, aliki ndai: Olemeng'amu enkarsishu Engai anaa enkerai, nemejing' ninye atua tukul.

¹⁸ Neikilikwan olkitok obo ninye nejo: Laiteng'enani sidai, kainyo alaitobir, palajung'u empuan nemeiting'?

¹⁹ Nejoki Yesus ninye: Ainyo pikijo sidai? Metii osidai neme obo, nera Engai.

²⁰ Itayolo nkitanapat: Miar enkidikidikoto olmoruo o eng'oroyoni; miar metua, mipurrisho; minjakenu elejare; ntaa kituak minyi o ng'utunyi!

²¹ Nejo si ninye: Aibung'a nena pookin neba tʼenkitishu ai.

²² Ore pening' Yesus kuna, nejoki ninye: Kitong'orikia nabo; timira pookin niata, pioriki laisinak, nilaata masaa te shumata; ore pindip, wou, tusujaki!

²³ Ore pening' ninye kuna, neilish naleng', amu era oladupani naleng'.

²⁴ Ore pedol Yesus, ajo eilisho ninye naleng', nejo: Oi egol, pejing' looata masaa atua enkarsishu Engai!

²⁵ Elelek eim endames eudoto esindano nelang' ejing' oladupani atua enkarsishu Engai.

²⁶ Nejo lootoning'o kuna: Ang'ai naa loidim atopua?

²⁷ Nejo si ninye: Enemeidim iltung'anak, neidim Engai.

²⁸ Nejo Petros: Ng'orai, kitung'aitie yook nkun ang' pookin nikisuj iye.

²⁹ Nejoki ninye ninje: Japa, aliki ndai: Metii oltung'ani otung'aiye engaji arashu eng'oroyoni arashu lalashera arashu lootoiutuo ninye arashu nkera tʼolbae lʼenkarsishu Engai,

³⁰ nemeng'amu aigil kumok t'ena kata o tiatua olmaa olotu empuan nemeiting'.

³¹ Nerik ninye kulo tomon o are nejoki ninje: Eng'orai, kilep aapuo Yerusalem, neitabaiari pookin natisirakaki Enkerai oltung'ani too layolounok.

³² Amu eitarasakini ninye loreren, nekweniyeki nesuli nenotakini ngamulak,

³³ near ninje ninye too nkeenda near metua, nepiu ninye tʼengolong' e uni.

³⁴ Neitu eyolou ninje toki too kuna, neaku etushumaki kulo rorei too ninje, neitu eyolou enairoroki.

³⁵ Neaku ore penyikaki Yeriko, netotona olmodooni obo tʼembata engoitoi, eomonisho.

³⁶ Ore pening' ninye olorere oimita, neikilikwanu: Kainyo ena?

³⁷ Neitayolo ninje ninye: Yesus le Nasaret oimita.

³⁸ Neapaa ninye oltoilo nejo: Yesus, nakerai e David, tokorduaki!

³⁹ Ore kulo looituruk nebuaki ninye, pegira. Kake nepon ninye adar naleng': Nakerai e David, tokorduaki!

⁴⁰ Neitashe Yesus neitanapu, perikuni ninye enetii ninye. Ore penyikaki ninye, neikilikwan:

⁴¹ Ainyo iyeu naasaki iye? Nejo si ninye: Laitoriani, padolishoi.

⁴² Nejoki Yesus ninye: Tadolishoi! enkirukoto ino nikintopua.

⁴³ Nedolishoi ninye nabokata nesuj ninye, eitadaraa Engai. Ore olorere pookin lotadua ina neisho Engai enkitadararoto.