Luka 17 - Osotua Ng'ejuk

¹ Nejoki ninye laiteng'enuok lenyena: Meata kata nemepuonu mbaak oo nkitarrikinot, kake, e kake aiya oloau ninje!

² Eikash, teni eenikini ninye osoit oituutishoreki emurt enye, penang'akini ninye atua olbalbal, nelang' eitarriki ninye nabo too kuna kutiti.

³ Entagolie aten! Teni eitarruo olalashe lino, toroja ninye; ore peala, tung'aiki ninye.

⁴ Ore pikintarruoki ninye iye kat napishana nabo olong', nikirrinyokino kat napishana nejo: Airridua! tung'aiki ninye!

⁵ Nejoki lairriwak Olaitoriani: Toponiki yook enkirukoto!

⁶ Nejo Olaitoriani: Teni iatata enkirukoto anaa embeu e karadali nijokiki ele reteti: Tadotunye, piun kion tʼolbalbal! anaata etoning'o ndai.

⁷ Kang'ai too ndai loata olaisyayani oturisho arashu oirritisho nejing'u, eing'ua enkuruma, nejoki ninye:Wou asioki, totona tʼenedaareki?

⁸ Kake me neijia ejoki ninye: Ntobira enanya, terretenai nikisyayaki, metabana nanya naok; ore tekurum nilanya nilaok si iye?

⁹ Kye, keliki ninye ilo aisyayani oitobira naitanapaki, baiki ashe? Majo nanu.

¹⁰ Neijia baiki ndai; ore indipa aaitobira pookin naaitanapaki ndai, entejo: Kira yook laisyayak leme toki; kintobira enemeata kata nimikintobir.

¹¹ Neaku etii engoitoi, pelo Yerusalem, eimita ninye empolos e Samaria o Galilaya.

¹² Ore pejing' ninye engang' nabo, nenang'are leak tomon ooata enkea oo lbolot, neitashe ninje tʼenelakwa

¹³ neapaa iltoiloi lenye nejo: Yesus, Laitoriani, tokordu yook!

¹⁴ Ore pedol ninye ninje, nejoki ninje: Enjom, entadua aten laidasak! Neaku ore epuoito ninje, neisuji.

¹⁵ Ore obo lenye otadua, ajo eishiuwo, nerrinyo, eitadaraa Engai tʼoltoilo kitok,

¹⁶ nebatata aijululo too nkejek enyena, eliki ninye ashe; nera ninye Osamareites.

¹⁷ Nealu Yesus nejo: Mera tomon looisujaki? Kaji etii enturuj naa?

¹⁸ Eitu etumi olotorrinyunye, peisho Engai enkitook enye, neme ele omoni?

¹⁹ Nejoki ninye: Nyototoi nno; enkirukoto ino nikintopua!

²⁰ Ore peikilikwan Ilfarisayoi ninye: Kanu elotu enkarsishu Engai? nealiki ninje nejo: Melotu enkarsishu Engai tʼemua nalio;

²¹ nemelimuni: Ng'orai, etii ene! arashu: idye! amu eng'orai, etii enkarsishu Engai atua ndai.

²² Nejoki ninye laiteng'enuok: Epuo aapuonu ngolong'i, pipuopuo aayeu nidolidolo engolong' nabo Enkerai oltung'ani, nimipuopuo aadol.

²³ Nepuo aaliki ninje ndai: Eng'orai ene! eng'orai idye! Emipuo, emisuj!

²⁴ Amu anaa peiwang' enkiwang'ata, eing'ua shumata, neijia elatiu Enkerai oltung'ani tʼengolong' enye.

²⁵ Kake meata kata nemeng'asi aaitame too nkumok, neanyi tʼena kishon.

²⁶ Neijia anaa petaa too ngolong'i e Noa, neijia eaku baiki too ngolong'i Enkerai oltung'ani:

²⁷ nedaa ninje, neokisho, neamisho, neamari, metabaiki ena olong' natijing'ie Noa atua engalawa, nelotu engare kitok neiminye pookin.

²⁸ Neijia anaa petaa too ngolong'i e Lot: edaa ninje, neokisho, neinyang'isho, nemirisho, neunisho, neshetisho;

²⁹ ore te ina olong' natupukuo Lot, eing'ua Sodom, nesha enkima o nkibiritini, eing'ua shumata, neiminye pookin.

³⁰ Neijia eaku baiki tʼengolong' nalioi Enkerai oltung'ani.

³¹ Olotii te ina olong' shumata e keperaji netii masaa enyena atua aji, njoo medou ninye, peau nena. Neijia baiki olotii enkuruma, njoo merrinyo kurum.

³² Entadamutu eng'oroyoni e Lot!

³³ Oloing'oru, peitopok oltau lenye, nelaiminye ninye; ore oloiminye ninye, neitopok.

³⁴ Aliki ndai: Nepuo aatii te ina kiarie aare atua erruat nabo; neng'amuni obo, neing'uari olekai.

³⁵ Nepuo aatii are naaituutisho te nebo; neng'amuni nabo, neing'uari engai.

³⁶ Netii aare enkurruna; neng'amuni obo, neing'uari olekai.

³⁷ Nealu ninje nejoki ninye: Kaji, Laitoriani? Nejoki si ninye ninje: Enetii empopong', neiturrurro ina alo baiki ilmotonyi.