Luka 16 - Osotua Ng'ejuk

¹ Nejoki si ninye laiteng'enuok lenyena: Etii oltung'ani adupani loata olaing'orani lʼengaji; neitang'ori ele te ninye, aajo eisardakie masaa enyena.

² Neipot ninye nejoki ninye: Kaa bae ena naning' te iye? Njooki esiana enking'orare ino e atua aji! amu mintoki aidim ataa olaing'orani.

³ Nejo oladuo aing'orani tiatua kion; Kaji aiko? Amu aaitau Olaitoriani lai tʼenking'orare engaji; namaidim atuturisho, natum enkurruna, teni aomonisho.

⁴ Atayolo enaiko, teni aaitauni tʼenking'orare engaji, paapuo aang'amu ninje nanu tiatua ngajijik enye.

⁵ Akae, neipot ninye iltung'anak pookin looata esile Olaitoriani lenye, nejoki ol elukunya: Kainyo esile Olaitoriani lai niata?

⁶ Nejo ninye: Iltuleta iip lʼeilata. Nejoki ninye: Mbung'a sirat inono, totona asioki, tisira onom.

⁷ Ore peidip, nejoki olekai: o iye, kainyo esile niata? Nejo si ninye: Ntemeta iip engano. Nejoki ninye: Mbung'a sirat inono, tisira ntomoni isiet.

⁸ Neitadaraa Olaitoriani oladuo aing'orani torrono, tiaraki naikuna tʼeng'eno; amu era nkera ele maa ng'eni nelang' nkera enkilang'et tiatua enkishon enye openy.

⁹ Naliki si nanu ndai: Entobirakiti aten iljorueta too masaa torrok, peiye teni iatata osina, neng'amu ninje ndai tiatua ntoneta oo nkatan pookin.

¹⁰ Olora supat tʼentoki kinyi, nera baiki supat tʼentoki kitok; olora torrono tʼentoki kinyi, nera baiki torrono tʼentoki kitok.

¹¹ Teni miakuku supati too masaa torrok, kang'ai loirukoki ndai enara esipata?

¹² Ore pemiakuku supati tiatua masaa olekai, kang'ai olaislio ndai enara eninyi?

¹³ Metii olaisyayani loidim aisyayaki laitoriak aare: amu elaibai obo nelanyorru oliare, arashu elaibung' obo, nelamenu oliare. Mindimidimi aaisyayakiti Engai o mamon (masaa).

¹⁴ Nening' Ilfarisayoi kuna pookin nera ninje loonyor masaa nekweniye ninye.

¹⁵ Nejoki ninye ninje: Irara ndai looitaa aten supati tʼengomom oo ltung'anak, kake eyolo Engai iltauja linyi; amu enara kitok tiatua iltung'anak, nera enkitirikata tʼengomom Engai.

¹⁶ Etii nkitanapat o layolounok metabaiki Yohanes; neinosuni, eiter te ina kata, enkarsishu Engai, nejing' oltung'ani pookin atua ninye tʼengolon.

¹⁷ Elelek emuta shumata o enkop nelang' edoiyo oltili obo loo nkitanapat.

¹⁸ Ore oltung'ani pookin oing'ua eng'oroyoni enye neamu engai, near ninye enkidikikoto olmoruo o eng'oroyoni; o si ninye oloamaa enatung'aiye olmoruo lenye, ear enkidikidikoto olmoruo o eng'oroyoni.

¹⁹ Etii oltung'ani adupani neishop olkila odo o olkila oibor, neitaa eng'ida ngolong'i pookin naalioi.

²⁰ Netii olaisinani obo, oji engarna enye Lasaros, neiturrakini engalo kishomi enye neata mbaldakani

²¹ neyeu neraposho too mbelat naadoiyo tʼenaraa oladupani; metaa epuonu ildiain aamej mbaldakani enyena.

²² Neaku nee olaisinani, neilepie ilmalaikan ninye olgoo le Abraham. Nee si ninye oladuo adupani, nenuki.

²³ Ore etii ninye atua ewueji enkima, neapaa ngonyek enyena, etii atua emion, nedol Abraham tʼenelakwa o Lasaros tʼolgoo lenye.

²⁴ Neipot ninye nejo: Papa Abraham, tokorduaki, rriu Lasaros, peitadoiki elukunya olkimojino lenye atua engare, paarrinyoki olng'ejep lai, amu aameikini tiatua ena kiwuwuoto.

²⁵ Nejo Abraham: Nakerai, tadamu, ajo inoto sidan inono tiatua empuan ino, o Lasaros ntorrok; kake ore taata eilejilejitai ninye tene, o iye, nikintamei.

²⁶ Ore enalang kuna pookin, otipikaki erishata kitok empolos ang' o ndai, peiye ore lootii ene, peyeu nelang'aki ndai, nemeidim, nemelang'u le ina alo enikitii yook.

²⁷ Nejo ninye: Akae, aasai iye, papa, pirriwaki ninye engaji e papa lai;

²⁸ amu aata lalashera imiet, peijakenoki ninje, pemepuonu si ninje atua ene wueji emion.

²⁹ Nejo Abraham: Eata ninje Mose o layolounok; njening' ninje!

³⁰ Nejo ninye: Me neijia, papa Abraham! kake teni elo obo too lootuata enetii ninje, nepuo aala.

³¹ Nejoki ninye: Teni mening' ninje Mose o layolounok, nemepuo aairuk baiki, aajo epiu obo too lootuata.