Luka 1 - Osotua Ng'ejuk

¹ Tiaraki natii ilkumok ootipika ngaik enye aasir aabaraki lomon loo mbaak naataa tiatua yook,

² anaa peakitia yook kulo loora neba tʼenkiterata lootadua too ngonyek enye oopeny nera laisyayak lʼororei,

³ atadua si nanu, ajo era sidai, teni aasiraki iye, Teofilos lanyor naleng', abaraki mbaak pookin nataleeno neba tʼenkion enye osupatei,

⁴ piyolou esipata oo mbaak oo lomon likinteng'enaki.

⁵ Etii tʼenkata e Herodes lora olkarsis tiatua Yudaya olaidasani obo, oji Sakarias, nera lʼolkamba le Abia, o eng'oroyoni enye too ntoiye e Aron, naji engarna enye Elisabet.

⁶ Nera ninje pokira are supati tʼengomom Engai, neibung' nkitanapat pookin o supaton Olaitoriani, meata eleyata.

⁷ Neitu eata ninje enkerai; amu eitasho Elisabet, etaa pokira are moruak too ngolong'i enye.

⁸ Akae, eitobir ninye enkyas enkidasare abaraki tʼolkamba lenye tʼengomom Engai,

⁹ anaa pera orregie lʼenkidasare, netum enkukuo ninye, pejing' engaji sinyati Olaitoriani airisho.

¹⁰ Netii enkumoi pookin olorere boo, esaisho, tʼenkata nairishore.

¹¹ Nelioi te ninye olmalaika lʼOlaitoriani, eitashe tʼematua e tatene olperere oirishoreki.

¹² Ore pedol Sakarias ninye, neng'ayung'ayu, nejing' enkuretishu atua ninye.

¹³ Nejoki olmalaika ninye: miureishoi, Sakarias! amu etoning'oki esayata ino, kilaiki eng'oroyoni Elisabet enkerai, nimpot engarna enye Yohanes;

¹⁴ nilaata eng'ida o engalali, neitoki aang'ida ilkumok tʼeiunoto enye.

¹⁵ Amu eaku ninye kitok tʼengomom Olaitoriani, nemeok olmarua o eokore naitemerisho, neiganyi ninye Olmumua Sinyati, epon etii engoshoke e ng'otonye enye;

¹⁶ nelarrinyoki ninye ilkumok tiatua nkera Israel Olaitoriani, Engai enye;

¹⁷ nelaiturukie ninye tʼengomom enye tʼolmumua o tʼengolon Eliya arrinyoki iltauja loo loomenye nkera, o lemeiruk eng'eno oo supati, peiye eitobiraki Olaitoriani olorere.

¹⁸ Nejoki Sakarias olmalaika: Kainyo ayolounye ina? Anlu ara nanu moruo naa moruo eng'oroyoni ai too ngolong'i enyena.

¹⁹ Nealiki olmalaika nejoki ninye: Ara nanu Gabriel oitashe tʼengomom Engai naairriuaki, paairorie iye, paainosaki iye nena.

²⁰ Ng'orai, ilagira nimindim airoro metabaiki ena olong' napuo aaku kuna, tiaraki neitu iruk rorei lainei loopuoi aaitabaia tʼenkata enye.

²¹ Netii olorere boo neanyu Sakarias, neiputukuny tʼenkimutioto enye tiatua engaji sinyati.

²² Ore pepuku ninye, neitu eidim airorie ninje, neyolou ninje, aajo etadua ninye enkitaduaroto tiatua engaji sinyati. Neaku erojaa ninje nebik meiro.

²³ Neaku ore peidipai ngolong'i enkisyayare enye, nelo engaji enye.

²⁴ Ore peishunye nona olong'i, nemenai eng'oroyoni enye Elisabet, neisudori lapaitin imiet, ejo:

²⁵ Nji aaitobiraka Olaitoriani too nona olong'i naaing'oraiye, paaitaiki enkurruna ai tiatua iltung'anak.

²⁶ Ore tʼolapa le ile neirriwaa Engai olmalaika Gabriel atua engang' nabo e Galilaya, naji engarna enye Nasaret,

²⁷ enetii entito natisira olee obo oji Yosef, lʼengaji e David, neji engarna e ina ito Maria.

²⁸ Ore peidip atijing'a olmalaika enetii ninye, nejo: Takwenia, naishooki eng'adunoto! Kirubare Olaitoriani! Kitamayanaki tiatua ng'oroyok!

²⁹ Ore pedol ninye, neng'ayung'ayu naleng' too rorei lenyena neibirribir: Kaa kirorokinoto ena?

³⁰ Nejoki olmalaika ninye: Miureisho, Maria! amu inoto eng'adunoto tʼEngai.

³¹ Naa ng'orai, ilamenai nilaiu Oinoti, nilaipot engarna enye Yesus.

³² Neaku ele kitok, nepuoi aaipot Oinoti lʼOlotii shumata naleng' nelaisho Olaitoriani Engai ninye olorika lʼenkitoria le menye lenye David,

³³ nelaitore ninye engaji e Yakoob nkatan pookin, nemeata enkarsishu enye enkiting'oto.

³⁴ Nejoki Maria olmalaika: Kaji eiko teni eaku ena, amu mayolo olee?

³⁵ Nealiki olmalaika nejoki ninye: Kiladoiki Olmumua Sinyati nikiopoki engolon Olotii shumata naleng'; onaa epuoi aaipot ele Sinyati loiuni Oinoti lʼEngai.

³⁶ Naa ng'orai, Elisabet, enjoruet ino, emena si ninye tʼenkerai olee tiatua emoruao enye, nera ele olapa le ile te ninye naipoti naitasho;

³⁷ amu metii entoki o nabo nemeidimai tʼEngai.

³⁸ Nejo Maria: Ng'orai, ara nanu engaisyayani Olaitoriani; njeaku te nanu anaa pitejo. Nelo olmalaika aing'ua ninye.

³⁹ Nedumunye Maria to nona olong'i nelo oldonyo tʼesioroto atua engang' e Yuda,

⁴⁰ nejing' atua engaji e Sakarias neiro roki Elisabet.

⁴¹ Neaku ore pening Elisabet enkirorokinoto e Maria, neipid enkerai tiatua engoshoke enye, neiganyi Elisabet Olmumua Sinyati,

⁴² nedar ninye tʼendarata kitok nejo: Kitamayanaki iye tiatua ng'oroyok nemayana eishoi engoshoke ino.

⁴³ Kaji eiko teni eaku ena te nanu, ajo elotu ng'otonye Olaitoriani lai enatii nanu?

⁴⁴ Amu ng'orai, ore etijing'a oltoilo lʼenkirorokinoto ino atua nkiyaa ainei, neipid tʼengalali enkerai tiatua engoshoke ai.

⁴⁵ Ira iye tesh eniruko, amu eidipai enikitiakaki tʼOlaitoriani.

⁴⁶ Nejo Maria: Eitaa oltau lai Olaitoriani kitok

⁴⁷ neng'idakino Olmumua lai Engai, Olaitopuani lai;

⁴⁸ amu etadua ninye enkitadounoto engaisyayani enye. Amu ngʼorai, eiter taata aapuo aaipot nkishomini pookin entesh;

⁴⁹ amu aaitobiraka Oloata engolon ntokitin kituak, naa sinyati engarna enye;

⁵⁰ nebik eng'adunoto enye tiatua nkishomini pookin, too kulo looure ninye.

⁵¹ Neitaa engolon tʼengaina enye neisardakie looata olwuasa too ndamunot oo ltauja lenye;

⁵² nebatat looata engolon too lorikaishi, neitaa kituak looitadou aten;

⁵³ neitaraposh too ntokitin sidan looata olamei; neing'ua ladupak neijia.

⁵⁴ Neretoki Israel lora olaisyayani lenye, nedamu enkordunoto enye,

⁵⁵ neijia anaa petiaka loopapa lang', Abraham o eishoi enye, nkatan pookin.

⁵⁶ Nebik Maria te nebo o ninye enkata oo lapaitin okuni, nerrinyo engaji enye.

⁵⁷ Nebaia enkata Elisabet naishore, neiu enkerai olee.

⁵⁸ Nening' lʼelatia o lʼenkishomi enye, ajo eitaa kitok Olaitoriani enkordunoto enye, neng'ida te nebo o ninye.

⁵⁹ Neaku engolong' e isiet, nepuonu aamurat enkerai nedung'oki ninye engarna e menye lenye Sakarias.

⁶⁰ Nealu ng'otonye enye nejo: Me neija, kake eipoti ninye Yohanes.

⁶¹ Nejoki ninje ninye: Metii o obo lʼenkishomi ino loipotieki ina arna.

⁶² Neroj ninje menye lenye, pelimu enayeu neipotieki ninye.

⁶³ Neyeu ninye osoit nesir nejo: Yohanes engarna enye. Neiputukuny ninje pookin.

⁶⁴ Nelaki nabokata enkutuk enye o olng'ejep lenye, neiro neitadaraa Engai.

⁶⁵ Neaku enkuretishu too pookin lʼelatia enye, neibulu kulo rorei pookin atua ildonyo pookin le Yudaya.

⁶⁶ Neibung' ninje pookin lootoning'o too ltauja lenye nejo: Amaa, keaku ena kerai ng'ai? Amu eturubare engaina Olaitoriani ninye.

⁶⁷ Neigany Sakarias, menye lenye, Olmumua Sinyati neitayolo mbaak e akenya nejo:

⁶⁸ Njeitadarari Olaitoriani, Engai e Israel, tiaraki natijing'aka neitobiraki enkitopuata olorere lenye,

⁶⁹ neunoki yook emowuo enkitopuata tiatua engaji e David, olaisyayani lenye,

⁷⁰ neijia anaa petejo ninye, eiter opa, tʼenkutuk oo layolounok sinyat lenyena:

⁷¹ peitopok yook too lmang'ati lang' o too ngaik oo pookin looiba yook,

⁷² neitobiraki enkordunoto loopapa lang' nedamu osotua lenye sinyati

⁷³ o enkiturujata naiturujaka papa lang' Abraham ajo eisho yook

⁷⁴ kipok too ngaik oo lmang'ati lang', mikiata enkuretishu, pikisyayaki ninye too ngolong'i ang' pookin

⁷⁵ t'esinyatishu o tʼesupato tʼengomom enye.

⁷⁶ O iye, nakerai, kipuoi aaipot olayolounoni lʼOlotii shumata naleng', amu ilaiturukie engomom Olaitoriani, pintobir ngoitoi enyena,

⁷⁷ pinjo olorere lenye eyoloupoto enkitopuata tiatua enkitaunoto oo nkitarruot enye,

⁷⁸ tʼoltau lʼenkordunoto Engai ang' naitijing'ua atua yook enkilepunoto naing'ua shumata,

⁷⁹ peilang'aki lootoni tiatua enaimin o tiatua oloip lʼenkea, nerik nkejek ang' atua engoitoi eseriani.

⁸⁰ Nebulu ena kerai negolu tʼolmumua, netii atua ang'at metabaiki kuna olong'i naaibalakino ninye atua Israel.