Iroma 16 - Osotua Ng'ejuk

¹ Aitanapaki ndai enganashe ang' Foibe, naa ninye engaisyayani esirit natii Kenkerea,

² ping'amumu ninye tʼOlaitoriani anaa peaku too sinyat, ninjosho eretokinoto too ngolati pookin naairishakinore ninye ndai. Amu etaretoko ilkumok, naataretoko baiki nanu.

³ Eroroki Priskila o Akwila, laretok lainei tiatua Kristos.

⁴ Amu etipika tʼolbae lʼempuan ai emurt enye; me nanu ake oliki ninje ashe, kake eiko nji si sirito pookin naatii tiatua loreren lemeata Engai.

⁵ Eroroki si esirit natii tʼengaji enye. Eroroki Epainetos olanyor lai, lora olkikau le Kristos te Asia.

⁶ Eroroki Maria natanyamala naleng' tʼolbae linyi.

⁷ Eroroki Andronikos o Yunias lʼenkishomi ang' looteenaki te nebo o nanu, neyolouni anaa lairriwak loora, naaiturukie nanu aairuk Kristos.

⁸ Eroroki Ampliatos olanyor lai tʼOlaitoriani.

⁹ Eroroki Urbanos, olaretoni lang' o Stakis, olanyor lai.

¹⁰ Eroroki Apeles, otonyorraiyoki te Kristos.

¹¹ Eroroki Herodion lang'. Eroroki lelo loora lʼengang' e Narkisos tʼOlaitoriani.

¹² Eroroki Trifeena o Trifosa, naatanyamala tʼOlaitoriani. Eroroki Perse enanyor, natanyamala naleng' tʼOlaitoriani.

¹³ Eroroki Rufus, olotegeluaki tʼOlaitoriani, o ng'otonye naa yeiyo ai.

¹⁴ Eroroki Asinkritos o Flegon o Hermas o Patrobas o lalashera ootii e nebo o ninje.

¹⁵ Eroroki Filologus o Yulia, Nereus o enganashe enye, o Olimpas o sinyat pookin te nebo o ninye.

¹⁶ Erorokinoto ndai aten tʼeng'ututata sinyati. Eiroroki ndai sirito le Kristos.

¹⁷ Kake adiding' ndai, lalashera, ping'oraara lelo ooau rishat o nkitapong'orot nemeishiaakino ina kiteng'enare ninteng'enuote ndai, nipaasharere aaing'ua ninje.

¹⁸ Amu meisyayaki looba nji, Olaitoriani, kake engoshoke enye, nelej si iltauja loo lemera torrok too rorei lenye oobor naa sidan.

¹⁹ Amu eibale enkirukoto inyi too ltung'anak pookin. Onaa, ashipakino ndai, nayeu niakuku ng'eni tiatua mbaak supati, kake turua tiatua mbaak torrok.

²⁰ Ore Engai eseriani, metororuaki satan abori oo nkejek inyi asioki. Njebik eng'adunoto Olaitoriani Yesus Kristos te nebo o ndai.

²¹ Eiroroki ndai Timoteos, olaretoni lai, o Lukios o Yason o Sosipater lʼenkishomi ang'.

²² Airoroki ndai, nanu Tertius, otisira ena palai, tʼOlaitoriani.

²³ Eiroroki ndai Gayos, olaaitoomono nanu o esirit nalulung'a. Eiroroki ndai Erastos, olopeny masaa engang', o Kwartos, olalashe.

²⁴ Njebik eng'adunoto Olaitoriani lang' Yesus Kristos te nebo o ndai.

²⁵ Ore Engai, naidim aitagolo ndai tʼerisioroto oo lomon lʼeng'ida lainei o nkinosunot e Yesus Kristos, naaibalu emikio naisudoiyoki neba tʼenkiterunoto olmaa,

²⁶ kake etaboluoki neitayolouni taata tiatua sirat oo layolounok, tʼenkitanapata Engai oo nkatan pookin, peuni ening'oto enkirukoto tiatua loreren pookin:

²⁷ Njeata Engai nara openy ake ng'en, enkitook nkatan pookin metabaiki nkatan pookin. Amen.