Ilkolosai 3 - Osotua Ng'ejuk

¹ Akae, teni itopiutuo ndai te nebo o Kristos, eng'orutu ne shumata, enetii Kristos lotonita te tatene Engai.

² Embirribirra nara ne shumata, me nara nʼenkop.

³ Amu ituata ndai netushumaki empuan inyi te nebo o Kristos tiatua Engai.

⁴ Teni elalioi Kristos, empuan ang', nipuopuo aalioi si ndai te nebo o ninye tiatua enkitook.

⁵ Akae, entaar metuata rubat inyi naatii enkop: mbaak torrok oo nkiri o olduruki o enkima o olng'warra torrono o engong'u oo masaa, nara enkisyayare oo nkulie ain.

⁶ Tʼolbae loo kuna baak elotu engoro Engai shumata oo ltung'anak lemeiruk.

⁷ Naa tiatua ninje itilimanate si ndai opa injiuyeye ninje.

⁸ Kake ore taata, entautu pookin too ndai: engoro o enkiba o entorroni o emoroto o ilderrat torrok tʼenkutuk inyi.

⁹ Emilejaro tiatua ndai aten! Entautu oltung'ani musana te nebo o nkyasin enyena,

¹⁰ ninjopishopo oltung'ani ng'ejuk, oitaai ng'ejuk tʼeyolounoto, tʼerisioroto emua e ilo oitobira ninye;

¹¹ nemetii ene Olgriki arashu Oyudayos arashu omurata arashu lememurata arashu olmeeki arashu Oskite arashu osinga arashu ololakuno, kake era Kristos pookin netii atua pookin.

¹² Akae, enjopo anaa lootegeluaki lʼEngai, sinyat o loonyorri, iltauja lʼenkordunoto, emborran, enkitadounoto, enkirobi, olng'iria,

¹³ ninapakinono, ning'uaikinono, teni eata oltung'ani enkitang'oroto tʼolekai; neijia anaa petung'aikia Olaitoriani ndai, neijia si ndai!

¹⁴ ore too kuna pookin, enjopo enyorrata nara eenet enkitabaiaroto.

¹⁵ Njeitorisho eseriani e Kristos tiatua iltauja linyi, ndai looipotokoki atua ninye tiatua osesen obo, niakuku loobore ashe.

¹⁶ Njebik ororei le Kristos tiatua ndai tʼemborei, ninteng'enaroro nididing'aroro tʼeng'eno pookin, niranyakiki Engai too ltauja linyi too singolioitin lʼengauo o too singolioitin lʼenkitadararoto o too singolioitin sidan lʼolmumua.

¹⁷ Ore pookin nintobiribiri tʼororei arashu tʼenkyas, entobira kuna pookin tʼengarna Olaitoriani Yesus, pilikiki ashe Engai Menye te ninye.

¹⁸ Ndai, nang'oroyok, entoning' ilmoruak linyi, anaa peitoriori tʼOlaitoriani.

¹⁹ Ndai, lemoruak, entonyor ng'oroyok inyi, emiaku pushunot too ninje.

²⁰ Ndai, nakera, entoning' lootoiutuo ndai too ntokitin pookin; amu ena naiting'id Olaitoriani.

²¹ Ndai loomenye, emintagor nkera inyi, pemeaku kureti.

²² Ndai, laisyayak, entoning' loora laitoriak linyi loo seseni too pookin, me tʼenkisyayare oo ngonyek anaa looiting'id iltung'anak, kake too ltauja lemeata olosek niurere Olaitoriani.

²³ Ore pookin enintobiribiri, too ltauja entobirakiti anaa Olaitoriani, me anaa iltung'anak,

²⁴ niyololo, aajo ipuopuo aatum elaakinoto enjung'o tʼOlaitoriani; amu isyayakiki Olaitoriani Kristos.

²⁵ Kake ore oloitobir entorroni, nelang'amu entorroni naitobira; amu meing'oraa Engai entemet oltung'ani.