Ilhebrania 2 - Osotua Ng'ejuk

¹ Akae, meata kata nimikinyok kimbung' ororei likitoning'o, pemikimin ai wueji.

² Amu ten aa ele rorei oiroro ilmalaikan, meibelekenya, ore elang'ata o eanyata pookin netum elaakinoto enye,

³ kaji kinko teni kilany yook, teni mikinyor enkitopuata naba nji, natang'asa Olaitoriani alimu, neakitia yook kulo ootoning'o,

⁴ neaku si Engai oljakeni lenye te nebo o ninje, too lponot o nkiputukunyot kumok o nkidimat oo muain kumok, neoriki Olmumua Sinyati tʼerisioroto eyeunoto enye.

⁵ Amu eitu epik ilmalaikan meitoria olmaa olotu, likiimaki yook.

⁶ Kake eijakenu obo aibalunye ajo: Ainyo oltung'ani metaa idamu ninye, o enkerai oltung'ani metaa ishilaa ninye?

⁷ Nintaa iye ninye oti too lmalaikan enkiti kata, ninjopoko ninye enkaja enkitadararoto o nʼenkitook, ninjoo ninye eitore nkitobirat oo ngaik inono,

⁸ nipik ntokitin pookin abori oo nkejek enyena. Tiaraki natipika pookin abori enye, neitu epal o nyoo neitu epiki abori enye. Kake ore taata, eton eitu kidol ntokitin pookin etipikaki abori enye.

⁹ Kake kidol ele, oitaaki oti too lmalaikan enkiti kata, Yesus, tʼolbae lʼenkitamioto enkea, eishopokoki enkaja enkitadararoto o nʼenkitook, peiye, tʼeng'adunoto Engai, einyorrinyor enkea tʼolbae loo pookin.

¹⁰ Amu enare ilo, lotii ntokitin pookin tʼolbae lenye, oitobira ntokitin pookin, netorikoko nkera kumok enkitook, peitabaia olkitok lʼenkitopuata enye too nkitamiot.

¹¹ Amu ore ele osinyaa o kulo oosinyari, neing'ua pookin atua obo; onaa mekurru ninye, teni eipot ninje lalashera,

¹² nejo: Ainosaki engarna ino lalashera lainei, o tiatua esirit aranyaki engarna ino.

¹³ Neitoki: Ayeu nang'idare ninye. Neitoki: Ng'orai, nanu o nkera naaishoo Engai nanu.

¹⁴ Ore petaa nkera etang'ara enkiring'o o osarge, neng'arie si ninye nena, peiminye tʼenkea enkidimata e ilo loata engolon enkea, naa ninye satan,

¹⁵ petum atalaku kulo loora tʼolbae lʼenkuretishu enkea singan ngolong'i enye pookin.

¹⁶ Amu meramat ninye ilmalaikan, kake eishoi e Abraham eramat.

¹⁷ Akae, meata kata nemenyanyukie ninye lalashera lenyena too ntokitin pookin, peaku ninye olobore enkordunoto o olaidasani kitok, oitabaia ntokitin pookin tʼEngai, netum olorere enkitaunoto oo nkitarruot.

¹⁸ Amu ina einotie ninye emion o enkitasuroto, peidim ataretoki kulo ooitasuri.