Ilhebrania 1 - Osotua Ng'ejuk

¹ Ore peidip airorie Engai opa loopapa too layolounok aigil kumok o too muain kumok,

² neirorie ninye yook tʼenkiting'oto oo kuna olong'i tʼOinoti, lotipika, peaku olajung'oni loo pookin, eitobirieki baiki ninye enkop;

³ olora enkibor enkitook o erisioroto entiunoto enye, loirishiu ntokitin pookin tʼororei lʼenkidimata enye, eidipa aitaa enkisujata oo nkitarruot ang' neton te tatene enkitook natii shumata,

⁴ etaa sidai naleng' nelang' ilmalaikan nejung'u engarna kitok nelang' enenye.

⁵ Amu kalo too lmalaikan etiaka ninye aikata: Ira iye Oinoti lai, nanu laatoiwuo iye taata? Neitoki: Alaaku nanu Menye lenye te ninye, nelaaku ninye Oinoti te nanu?

⁶ Neitoki ajo te ina kata nariku olkikau lenye atua olmaa: Nepuo aaserem ninye ilmalaikan lʼEngai pookin.

⁷ Ore tʼolbae loo lmalaikan ejo: Eitaa ilmalaikan lenyena metotiu anaa ilkutat o laisyayak lenyena metotiu anaa ilng'ejepa lʼenkima;

⁸ kake tʼolbae lʼOinoti ejo nji: Olorika lino, iye Engai, obik nkatan pookin; ore eng'udi enkarsishu ino naa eng'udi enkitoriokinoto.

⁹ Itonyorra iye esupato nimbai mesupato. Onaa Engai, kielie iye Engai ino eilata eng'ida, nikintalang' iljorueta linono.

¹⁰ O: Iye, Olaitoriani, otuuno tʼenkiterunoto enkop; ore shumata, naa nkitobirat oo ngaik inono.

¹¹ Neaku erruoio ninje, nibik iye oshi; nepuo aamusanu anaa enkila,

¹² nintaal ninje anaa olkila, nepuo aawala; kake itiu iye anaa oshi ake, nemepuo aaiting' larin linono.

¹³ Kake kalo too lmalaikan etiaka aikata: Totona iye te tatene ai, metabana napik ilmang'ati linono abori oo nkejek inono?

¹⁴ Mera ninje pookin ilmumuan aisyayak looirriwaiyoki tʼolbae lʼenkisyayare oo kulo loopuo aajung'u enkitopuata?