Ilfilipi 2 - Osotua Ng'ejuk

¹ Akae, ten etii atua ndai enkilejilejata tiatua Kristos, ten etii enkitigiraroto enyorrata, ten etii enkidikidikoto Olmumua, ten etii ngoshuak naanana o nkordunot,

² enganyutu eng'ida ai, piatata ndamunot naanyanyuk, niatata enyorrata nanyanyuk, niatata oltau obo, nidamumu nabo,

³ nimintobiribiri toki tʼenkitarrikinoto o enkitook e pesho, kake entaaroto kituak tiatua aten tʼenkitadounoto;

⁴ Njoo meing'oraa oltung'ani nkun enyena ake, kake baiki mbaak oo lkulekai.

⁵ Embung'a nkibirribirrat tiatua ndai, anaa peata ninje Kristos Yesus,

⁶ lotii atua emua Engai, neitu eing'oraa anaa nkyarunot, perisiore Engai,

⁷ kake eitoroka kion neibung' emua osinga, neaku anaa iltung'anak nelioi tʼorregie anaa oltung'ani;

⁸ neitadou kion nening'ishoi metabaiki enkea, metabaiki enkea esalaba.

⁹ Onaa, eitaa Engai ninye kitok naleng' neisho ninye engarna nalang' nkulie arn pookin,

¹⁰ pegila Tengarna e Yesus enkung'u pookin natii shumata o enkop o abori enkop,

¹¹ peibalu olng'ejep pookin, ajo era Yesus Kristos Olaitoriani, peitaa kitok Engai Menye.

¹² Akae, lanyor lainei, anaa pitoning'o oshi, neme enkata ake natii, kake naleng' taata matii, entaa enkitopuata inyi tʼenkuretishu o tʼenkikirikirata.

¹³ Amu Engai naitobir tiatua ndai eyeunoto o enkitabaiaroto tʼenyorrata enye.

¹⁴ Entaas pookin metii enking'unyung'unyata o enking'arrirro,

¹⁵ piakuku nkera Engai nemeata entioto ana esungureishu, nemetii embuakinoto, tiatua ena kishon torrono nariwuo; ore tiatua ninje ilang'ishosho anaa nkilang'eta olmaa,

¹⁶ tiaraki nimbung'arere ororei lʼempuan, paaitadarari tʼengolong' e Kristos anaa oleitu ekwet pesho, neitu eitobirisho pesho.

¹⁷ Ten ake aaibukori shumata enkidasare o enkisyayare enkirukoto inyi, ang'ida nang'ida te nebo o ndai pookin.

¹⁸ Enting'idata si ndai too nena, o te nebo o nanu.

¹⁹ Kake aisilig tʼOlaitoriani Yesus, ajo airriwaki ndai Timoteos asioki, patum si nanu enjipai, ten ayolou enitiuu.

²⁰ Amu maata olekai laanyanyukie nanu, oshilaa tʼolbae linyi tʼenyorrunoto naba nji.

²¹ Amu eing'oru pookin nkun enye, me en e Kristos.

²² Kake iyololo ndai, aajo ninye supat; amu aataretoko anaa enkerai menye too lomon lʼeng'ida.

²³ Ninye aisilig, ajo airriwaa nabo kata, teni ayolou mbaak ainei eneikunari.

²⁴ Kake ang'idare Olaitoriani, ajo alotu si nanu asioki.

²⁵ Kake ajo eishiaakino, teni airriwaki ndai Epafroditos ora olalashe lai neitobir enkyas te nebo o nanu, na osikari lʼematua ai, neitoki aa olairriwani linyi, peisyayaki ngolati ainei.

²⁶ Amu eataiye ndai esing'ati neimuntut naleng', tiaraki nitoning'o ndai, aajo etamoiya.

²⁷ Amu etamoiya naleng' o metinyikaki enkea, kake etang'adua Engai ninye; neme ninye ake, kake si nanu, pamatum osina aitaalie olekai sina.

²⁸ Onaa, airriwaiye ninye aitasioki, peiye, ten intokiki aadol ninye, ing'idada ndai, neitong'ori si osina lai.

²⁹ Akae, entang'amutu tiatua Olaitoriani tʼeng'ida pookin nintaata kituak iltung'anak ooba nji.

³⁰ Amu tʼolbae lʼenkyas e Kristos etinyikaka enkea nemerrip empuan enye, peitabaia enatong'oro tʼenkisyayare inyi tʼolbae lai.