Ilfilipi 1 - Osotua Ng'ejuk

¹ Paulos o Timoteos, isingan le Yesus Kristos: too sinyat pookin tiatua Yesus Kristos ootii engang' e Filipi, te nebo o laing'orak o laisyayak.

² Njeboitare ndai eng'adunoto o eseriani naing'ua Engai Papa lang' o Olaitoriani Yesus Kristos!

³ Aliki oshi Engai ai ashe, teni adamu ndai,

⁴ ngolong'i pookin, too sayat ainei pookin tʼolbae linyi pookin, nasaisho tʼeng'ida,

⁵ tʼolbae lʼenkidikidikoto inyi tiatua lomon lʼeng'ida, eiter tʼengolong' elukunya metabaiki taata,

⁶ nayolo ena toki nabo, ajo oloitera tiatua ndai enkyas sidai, nelaitabaia metabaiki engolong' e Kristos Yesus,

⁷ anaa peitoriori te nanu, paibirribirraki ndai pookin, tiaraki naata ndai tiatua oltau lai tiatua ienat ainei o tiatua emitunoto o enkitagoloto oo lomon lʼeng'ida, amu irara ndai pookin ling'aring'ara te nebo o nanu eng'adunoto.

⁸ Amu era Engai oljakeni lai, ajo aataiye ndai pookin esing'ati tʼenkordunoto e Yesus Kristos.

⁹ Nasayu ena, pepona abulu enyorrata inyi oshi tiatua eyolounoto o tiatua enkitagoluoto pookin,

¹⁰ pindimidimi aataleen enaaku, piakuku berleli, lemeitirikisho metabaiki engolong' e Kristos,

¹¹ iborere too lmomo lʼesupato lootaa te Yesus Kristos, peaku enkitook o enkitadararoto Engai.

¹² Ayeu ake niyolouu ndai, lalashera, ajo ore mbaak nainoto, eaku ninje emponata enkibularoto oo lomon lʼeng'ida,

¹³ neijia ajo etaliote ienat ainei tiatua Kristos tʼengaji enkigwena pookin o too lkulekai pookin,

¹⁴ netum lalashera kumok tiatua Olaitoriani enkitagoloto too ienat ainei, nepon naleng' aaiteu aairoro lomon lʼEngai, metii enkuretishu.

¹⁵ Kake einosu looje Kristos tʼolbae lʼengilata e tau o enkitarrikino, ore ilkulekai tʼoltau sidai.

¹⁶ Einosu lelo Kristos tʼenkitarrikino nemebaraki, amu ejo eponiki ienat ainei enkilishoto;

¹⁷ ore ilkulekai tʼenyorrata, amu eyolo, aajo abik ene tʼolbae lʼemitunoto oo lomon lʼeng'ida.

¹⁸ Ainyo si? Njeinosuni Kristos tʼorregie pookin, tʼenkitaduaroto arashu tʼesipata, nang'ida tiatua ina naitoki alang'ida;

¹⁹ amu ayolo, ajo elaaku ena te nanu enkitopuata tʼolbae lʼesayata inyi o tʼolbae lʼenkitarasunoto Olmumua le Kristos,

²⁰ anaa paibartu naleng' naanyu, ajo makurru tʼentoki o nabo, kake eitadarari Kristos tʼenjipai pookin anaa oshi o taata tiatua osesen lai, ten eaku tʼempuan arashu tʼenkea.

²¹ Amu aishiye nanu Kristos naeiye endupoto.

²² Kake tiaraki naitobir enkyas ai ilmomo, ten aishiu tʼosesen, namayolo enagelu.

²³ Aairony kuna baak pokira are: Aata olng'warra lʼelakunoto, patii e nebo o Kristos, naa sidai ena naleng';

²⁴ kake meata kata namabik tʼosesen tʼolbae linyi.

²⁵ Ore Eng'idaroto kitok ayolo, ajo alabik naitoki aboitare ndai pookin, pitumutumu enjetakinoto o eng'ida enkirukoto,

²⁶ nindimidimi aaitadarai aten tʼolbae lai, teni aitoki alotu enitiiti ndai.

²⁷ Embung'a ake orregie sidai anaa peyeu lomon lʼeng'ida le Kristos, peiye, ten alotu nadol ndai arashu matii naning' mbaak inyi, intasheshe tiatua Olmumua obo o tiatua oltau obo nigilunono te nebo o yook tʼolbae lʼenkirukoto oo lomon lʼeng'ida,

²⁸ niminjosho eiture ndai ilmang'ati linyi tʼentoki o nabo, nera ena too ninje olponoto oibala lʼenkiminata, kake too ndai lʼenkitopuata, neing'ua ena Engai;

²⁹ amu eishooki ndai tʼolbae le Kristos, me pirukuruku ake atua ninye, kake peisili ndai baiki tʼolbae lenye,

³⁰ niatata ina araroto anaa pitadua te nanu nining'ining'i taata te nanu.