Ile Efeso 5 - Osotua Ng'ejuk

¹ Akae, entaa lasujak lʼEngai anaa nkera naanyorri,

² entilimanata tiatua enyorrata anaa petonyorra yook Kristos neishooio kion tʼolbae lang', peaku enkishooroto o enkidasare, nara erropili sidai tʼEngai.

³ Njoo meimakini too ndai tukul mbaak torrok oo nkiri o olduruki pookin o engong'u oo masaa, anaa pemeata kata nemeaku too sinyat,

⁴ baiki nemeata sura o olderra lʼemodaishu o enkitakwenishoto torrono nemeaku too ndai, kake entopon elikinoto e ashe.

⁵ Amu meata kata nimiyololo ena, aajo meata enjung'o tiatua enkarsishu e Kristos o Engai oloitobir mbaak torrok oo nkiri arashu lʼolduruki arashu lʼengong'u oo masaa, lora olaisyayani loo nkulie ain.

⁶ Eminjo eitamanimanaa ndai oltung'ani o obo too rorei le pesho; amu elotu tʼolbae loo kuna engoro Engai shumata oo ltung'anak lemeiruk.

⁷ Akae, emiaku lang'arak o ninje.

⁸ Amu irara opa enaimin, kake itaa taata enkilang'et tiatua Olaitoriani.

⁹ Entobik anaa nkera enkilang'et, amu etii ilmomo lʼenkilang'et atua esidano o esupato o esipata pookin;

¹⁰ entaleen enashipakinoi tʼOlaitoriani.

¹¹ Eming'ar nkyasin enaimin nemeata ilmomo, kake eaku, pingwenakiki ninje.

¹² Amu enaitobir ninje tʼemikio, neata si enkurruna.

¹³ Kake ore kuna pookin eibalunye, teni eigwenaki enkilang'et ninje; amu pookin naibalunye, naa enkilang'et.

¹⁴ Onaa ejo: Nyototoi oloirura, topiu tiatua lootuata nikilailang'aki Kristos.

¹⁵ Akae, eng'orai, pilimanana aabaraki, me anaa ilmoda, kake anaa lang'eni,

¹⁶ ilakuku enkata, amu etaa ngolong'i torrok.

¹⁷ Onaa emiaku ilmoda, kake loodamu enara eyeunoto Olaitoriani!

¹⁸ Emimera tʼolmarua lotii enkibor oo ngonyek, kake njebore ndai Olmumua!

¹⁹ Erorioroto too singolioitin lʼengauo o too singolioitin lʼenkitadararoto o too singolioitin sidan lʼemumuaishu niranyakiki nintadaraara Olaitoriani too ltauja linyi,

²⁰ nilikiki Engai o Papa oshi ashe tʼolbae loo ntokitin pookin tʼengarna Olaitoriani lang' Yesus Kristos,

²¹ ining'ororo too ndai tiatua enkuretishu e Kristos.

²² Njening' ng'oroyok ilmoruak lenye anaa Olaitoriani,

²³ amu era olmoruo elukunya eng'oroyoni, anaa pera Kristos elukunya esirit nera ninye Olaitopuani lʼosesen.

²⁴ Neijia anaa pening' esirit Kristos, neijia njening' ng'oroyok ilmoruak too pookin.

²⁵ Lemoruak, entonyor ng'oroyok inyi anaa petonyorra Kristos esirit neishooio kion tʼolbae lenye,

²⁶ pesinyaa ninye eikishaanye tʼenkisujata engare tiatua ororei,

²⁷ petum aeaki ninye kion esirit enkitook nemeata entibili arashu esototo arashu pookin nijo kuna, kake peaku sinyati o nemeata eleyata.

²⁸ Neijia meata kata nemenyor ilmoruak ng'oroyok enye anaa seseni lenye oopeny. Olonyor enkitok enye, nenyor kion,

²⁹ amu eitu ai kata eibai o obo osesen lenye; kake eitoti neramat ninye, neijia anaa si Kristos esirit enye.

³⁰ Amu kira yook rubat osesen lenye, lʼenkiring'o enye o loo loik lenyena.

³¹ Onaa elaing'ua oltung'ani menye o ng'otonye neibung'are eng'oroyoni enye, neaku pokira are osesen obo.

³² Kitok ena mikio; kake alimu mbaak e Kristos o nʼesirit.

³³ Neijia si ndai, njoo oltung'ani pookin too ndai enyor enkitok enye anaa kion; ore enkitok, njeure olmoruo.