Ile Efeso 4 - Osotua Ng'ejuk

¹ Akae, adiding ndai, nanu oloena tiatua Olaitoriani, pilimanana anaa peaku tʼenkipototo naipotieki ndai,

² tʼenkitadounoto pookin o tʼemborran o tʼolng'iria, pinapakinono tiatua enyorrata,

³ ninyokinyoko aaibung' enaboishu Olmumua tiatua eenet eseriani.

⁴ Etii osesen obo ake o Olmumua obo, anaa peipotokoki baiki ndai tiatua eanyunoto nabo enkipototo inyi;

⁵ netii Olaitoriani obo, enkirukoto nabo, enkibatisa nabo,

⁶ Engai nabo o Menye loo pookin, Olotii shumata oo pookin o too pookin o tiatua pookin.

⁷ Kake eishooki pooki tung'ani lang' eng'adunoto narisiore entemet enkishooroto e Kristos.

⁸ Onaa ejo: Eilepaka shumata neibok engaji oo looena neisho iltung'anak nkishoorot.

⁹ Ore peilepaka shumata, meji si ena ajo etang'asa adou atua wuejitin e abori naleng' enkop?

¹⁰ Ore ninye otadouo, naa ninye si oloilepa alo shumata alang' wuejitin pookin, peigany ntokitin pookin.

¹¹ Eishoo ninye, peaku ematua lairriwak o ilkulekai layolounok o ilkulekai lainosarok loo lomon lʼeng'ida o ilkulekai lairritak o laiteng'enak,

¹² peaku sinyat looidim aaitobira enkyas enkisyayare, pesheti osesen le Kristos,

¹³ metabana nikilep yook pookin atua enaboishu enkirukoto o eyolounoto Oinoti lʼEngai, pikiaku leak ootabaitie nikibaiki entemet embotoro nalulung'a e Kristos,

¹⁴ pimikintoki aaku nkera, pemerikiriki yook idye o idye tʼolkutati pookin lʼenkiteng'enare tiatua olosek loo ltung'anak o tiatua esungureishu, peaku emputokinoto enkitamanimanaroto,

¹⁵ kake pikiata esipata tiatua enyorrata nikibulu tiatua ninye lora elukunya, Kristos, too mbaak pookin;

¹⁶ neidikidikoki te ninye osesen pookin neibung'aro too rubat pookin, peretokino ematua nabo o engai t'entemet enkidimata neitaa, pebulu osesen metaa enjetakinoto enye openy tiatua enyorrata.

¹⁷ Ajo ena naijakenu tiatua Olaitoriani: Emintoki ndai aalimana anaa ilkulekai lemeata Engai tʼempesho oo ndamunot enye.

¹⁸ Eidipaki aatipik enaimin ndamunot enye nelam empuan naing'ua Engai, tiaraki nemetii eng'eno tiatua ninje, etaa modook iltauja lenye.

¹⁹ Naa torrok ninje neishooio aten atua mbaak torrok oo nkiri neas nʼolduruki te nebo o empiani.

²⁰ Kake ore ndai eitu inteng'enuonuo Kristos neijia,

²¹ ten aa itoning'o lomon lenyena neiteng'eni ndai tiatua ninye, anaa petii esipata tiatua Yesus.

²² Onaa, entautu oltung'ani musana tʼorregie lenye lʼelukunya, loiminye kion tʼolng'warra lʼeng'uyan,

²³ niakuku ng'ejuko tiatua Olmumua loo ndamunot,

²⁴ ninjopishopo oltung'ani ng'ejuk oitobiraki tʼemua Engai tiatua esupato o esinyatishu o esipata.

²⁵ Onaa enturrai elejare, eroro esipata, oltung'ani pookin tʼol elatia enye, amu kira rubat tiatua yook.

²⁶ Emigoro, pemintarruoruo; eminjo edoiyo engolong', iatata engoro!

²⁷ Eminjo si satan eng'asiata!

²⁸ Olotupurrishe, njoo meitoki apurrisho, kake njepon anyok aitobir too ngaik enyena sidan, peiye etum aata enaisho Oloata elaunoto!

²⁹ Njoo mepuku olderra torrono tʼenkutuk inyi, kake enara sidai, peaku enjetakinoto neisho looning' enjipai!

³⁰ Emilishie Olmumua Sinyati lʼEngai lotipikieki ndai olmishire lʼengolong' elakunoto!

³¹ Njelakwaniki ndai erokan e oshoke pookin o olmurai le oshoke o engoro o enjangar o emoroto te nebo o entorroni pookin!

³² Entaa tiatua ndai oopeny loobor, looata ngoshuak naanana, looing'uaikino anaa petung'aikia Engai ndai tiatua Kristos.