Ile Efeso 1 - Osotua Ng'ejuk

¹ Paulos, olairriwani le Yesus Kristos tʼolbae lʼeyeunoto Engai: too sinyat ootii Efesos o too lairukok le atua Kristos.

² Metobikie ndai eng'adunoto o eseriani naing'ua Engai Papa o Olaitoriani lang' Yesus Kristos!

³ Njeitadarari Engai o Menye lʼOlaitoriani lang' Yesus Kristos! Etamayana ninye yook tʼemayani pookin emumuaishu te shumata tiatua Kristos.

⁴ Etegelua ninye yook tiatua Kristos, eton eitu epiki entonata olmaa, pikiaku sinyat nimikiata ntibil tʼengomom enye tiatua enyorrata.

⁵ Neituruk apik yook, pekitum enkeraishu e atua ninye te Yesus Kristos, tʼenyorrata eyeunoto enye,

⁶ peitadarari enkitook eng'adunoto enye natang'adunye ninye yook tiatua Olotonyorra.

⁷ Nikiata tiatua ninye elakunoto tʼosarge lenye, enkitaunoto oo nkitarruot tʼendupoto eng'adunoto enye

⁸ natoponikia ninye yook tiatua eng'eno pookin o enjartano.

⁹ Neitayolo ninye yook emikio eyeunoto enye tʼenyorrata enye naiturukie aotiki tiatua ninye,

¹⁰ peitobiri tʼembaiaroto oo nkatan, neiturrur pookin tiatua Kristos, ntokitin naatii shumata o naatii enkop.

¹¹ Kinoto tiatua ninye enjung'o, yook lootipikaki tʼentootiki enye loitaa ntokitin pookin tʼenkigwena eyeunoto enye,

¹² pekiaku yook enkitadararoto enkitook enye, yook likinturuko aanyu Kristos.

¹³ Itiiti si ndai atua ninye, indipa aatoning' lomon lʼesipata, euangelion enkitopuata inyi; eitagoloki baiki ndai lairukok tiatua ninye tʼOlmumua Sinyati lʼenkisiligata,

¹⁴ ora eng'asiata enjung'o ang', pekitum elakunoto nikiaku masaa enyena, neaku enkitadararoto enkitook enye.

¹⁵ Onaa baiki nanu, aidipa atoning'o enkirukoto too ndai tiatua Olaitoriani Yesus o enyorrata e atua sinyat pookin,

¹⁶ mapal eitu ajo ashe tʼolbae linyi nadamu ndai too sayat ainei,

¹⁷ peisho ndai Engai Olaitoriani lang' Yesus Kristos, Menye lʼenkitook, Olmumua lʼeng'eno o embolunoto tiatua eyolounoto enye

¹⁸ o ngonyek oo ltauja linyi naailang'akaki, piyolouu ndai enara eanyunoto enkipototo enye o enara endupoto enkitook enjung'o enye tiatua sinyat

¹⁹ o enara enkitook nemetemai engolon enye e atua yook likiruk tʼenkidimata engolon enye kitok,

²⁰ naitaa ninye tiatua Kristos te ina kata naitopiwuo ninye too lootuata neitoton ninye te tatene enye e shumata,

²¹ peaku shumata enkitook pookin o engolon o enkidimata o enkitoria o engarna pookin naimakini, me tiatua ele maa ake, kake baiki tiatua ololotu;

²² nepik ntokitin pookin abori oo nkejek enyena neisho, peaku ninye elukunya oo pookin tʼesirit

²³ nara osesen lenye nera emborei naigany pookin tiatua pookin.