Iasat 8 - Osotua Ng'ejuk

¹ Nenyorru Saulos metaari ninye metua. Neaku too nona olong'i emirata kitok esirit natii Yerusalem; neisardakakino pookin atua olosho Yudaya o Samaria nemetii lairriwak.

² Nenuk leak looure Engai Stefanos neishiraki ninye naleng'.

³ Neitobiraki Saulos esirit ntorrok naleng', ejing' ngajijik o ngajijik neikurtutaa leak o ng'oroyok apik engaji eenata.

⁴ Ore looisardaka neim idye o idye, einosu lomon lʼeng'ida.

⁵ Nedoiyo Filipos nejing' engang' nabo e Samaria neinosaki ninje Kristos.

⁶ Neinining' siamin tʼoltau obo mbaak naairoro Filipos nening' edolita ntokitin kituak naaitobira ninye.

⁷ Amu etupukutuo ilmeneng'a eishirita tʼoltoilo kitok too lkumok ooitamioki; neishiu ilkumok ootununuko osupetai o looitong'ojin;

⁸ neaku eng'ida kitok tiatua ena ang'.

⁹ Netii oltung'ani obo oji engarna enye Simon oitobira ntasimi enyena oshi ake tiatua ena ang' neing'asiaye iltung'anak le Samaria neitaa kion olora kitok;

¹⁰ neinining'u pookin ninye eiter tʼoloti metabaiki ilbotoro nejo: Eata ele tung'ani engolon kitok Engai.

¹¹ Neing'oraa ninye, tiaraki naing'asiaye ninje ngolong'i kumok too ntasimi enyena.

¹² Ore peiruk ninje Filipos einosu mbaak enkarsishu Engai o engarna e Yesus Kristos, neibatisi leak o ng'oroyok.

¹³ Neiruk baiki Simon openy, ore peibatisi ninye, nerubare Filipos, neiputukuny edolita ntokitin kituak o nkitobirat engolon naataa.

¹⁴ Ore pening' si ninje, lairriwak ootii Yerusalem, aajo eiruko Samaria lomon lʼEngai, neirriwaki ninje Petros o Yohanes.

¹⁵ Ore pebaia ninje, nesayaki ninje, peng'amu Olmumua Sinyati,

¹⁶ amu eton eitu edoiki o obo too ninje, eibatisaki ake tʼengarna Olaitoriani Yesus.

¹⁷ Neiteleiki ninje ngaik enye neng'amu ninje Olmumua Sinyati.

¹⁸ Ore pedol Simon, ajo eishooki Olmumua Sinyati tʼenkiteleikinoto oo ngaik, neitarasaki ninje ngoshola

¹⁹ nejo: Enjooki si nanu ena golon, peaku ore pookin laiteleiki ngaik neng'amu Olmumua Sinyati.

²⁰ Nejoki Petros ninye: Njeimin ngoshola inono o iye, tiaraki ijo iye, ajo einyang'uni enkishooroto Engai too ngoshola.

²¹ Miata eng'arata o ematua tiatua ele rorei, amu meitoriori oltau lino tʼengomom Engai.

²² Akae, taalai tʼena torroni ino, pisai Engai, peiye, ajo nanu, piking'uaikini enkibirribirrata oltau lino;

²³ amu adolita, ajo kibore olodua nikienita ntorrok.

²⁴ Nealu Simon nejo: Entasayakaki tʼOlaitoriani, pamaabaiki kuna baak nitejo ndai.

²⁵ Ore peidip ninje aaijakenutu o aainosutu lomon lʼOlaitoriani, nerrinyo aapuo Yerusalem neinosu lomon lʼeng'ida too ngang'itie kumok e Samaria.

²⁶ Neirorie olmalaika lʼOlaitoriani Filipos nejoki: Nyototoi, pilo, abori metabaiki engoitoi nadoiyo eing'ua Yerusalem metabaiki Gasa, nera ninye ang'ata.

²⁷ Nedumunye nelo. Naa ng'orai, netii oltung'ani le Etiopia ogelema, olkitok le Kandake, enkarsis oo Laitiopoi, ora olarriponi loo masaa enyena pookin, eewuo ninye Yerusalem, pesaisho;

²⁸ neaku errinyo neton tiatua olgarri lenye, eisomita olayolounoni Yesaya.

²⁹ Nejoki Olmumua Filipos: Nno enetaaniki, teshepare ele garri.

³⁰ Nekwetiki Filipos ina alo nening' eisomita olayolounoni Yesaya neirorie: Itayolo enisomita?

³¹ Nejo ninye: Kaji aiko teni aidim, teni metii oltung'ani laaitayolo? Nediding' ninye Filipos, peilepaki, peton o ninye.

³² Ore ewueji neisoma nera ena: Etereaki ninye anaa enker nayeng'i o anaa esuben e ker nemeorito tʼengomom oloisolito ilpapit, neijia eitu ebol si ninye enkutuk enye.

³³ Neitauni tiatua enkitadounoto earata enye. Kang'ai loinosu entipat enye? Amu eitaiyoki empuan enye tʼenkop.

³⁴ Nealiki ninye Filipos nejoki: Aasai iye, kang'ai eimaki olayolounoni too kuna baak? ke kion arashu olekai tung'ani?

³⁵ Nebol Filipos enkutuk enye neinosaki ninye lomon lʼeng'ida le Yesus.

³⁶ Ore epuoito ninje tʼengoitoi, nebaia enetii engare, nejo Olarriponi loo masaa: Ng'orai, nyena engare. Ainyo naamitiki, pamaaibatisi?

³⁷ Nejoki Filipos: Teni iruk tʼoltau pookin, naa sidai. Nealu nejo: Airuk, ajo era Yesus Kristos Oinoti lʼEngai.

³⁸ Neitanapu, peitashe olgarri, nedoiki pokira are atua engare, Filipos o olarriponi loo masaa, neibatisi ninye.

³⁹ Ore pepuku ninje tiatua engare, nea Olmumua lʼOlaitoriani Filipos neitu eitoki adol olarriponi loo masaa ninye, kake eima ninye engoitoi enye eng'ida.

⁴⁰ Netumi Filipos te Asotos neim einosu lomon lʼeng'ida tiatua ngang'itie pookin metabana nebaia Kaisarea.