Iasat 7 - Osotua Ng'ejuk

¹ Nejo olaidasani kitok: Ke neija etiu?

² Nejo ninye: Lelea lalashera o loopapa, entoning'! Eitadua kion Engai enkitook papa lang' Abraham te ina kata etii Mesopotamia, epon eitu eton te Haran;

³ nejoki ninye: Tupuku tʼolosho lino o tʼenkishomi ino, pilo olosho layeu naaitadol iye!

⁴ Nepuku te ina kata tʼolosho loo Lkaldayoi nemany Haran. Ore peidip atua menye lenye te ina alo, neidurrunye Engai ninye metabaiki ele osho litiiti ndai taata,

⁵ neitu eisho ninye enjung'o tʼena alo metabaiki eneroro, neisilig ninye, ajo eisho, metaa enenye o noo nkera enyena, tekurum, eton meata enkerai.

⁶ Neiro nji Engai, ajo eaku embeu enye engomom tʼolekai osho neitaai ninye osinga, neitaasi ninye ntorrok te ina alo larin iip ong'wan.

⁷ Ore olorere oitaa ninye osinga, alaigwenaki nanu, etejo Engai; ore peidipai kuna, nelapuku naalaisyayaki nanu tʼene wueji.

⁸ Neisho ninye enkitobirakinoto emurata; neiu ninye Isaak nemurat ninye tʼengolong' e isiet, neiu Isaak Yakoob neiu Yakoob lakuyani tomon o are.

⁹ Negil tau lakuyani nemir Yosef, pelo olosho Misri; neboitare Engai ninye,

¹⁰ neitupuku ninye too sinaitin lenyena pookin neisho ninye eng'adunoto o eng'eno tʼengomom e Farao, olkarsis le Misri; neitaa ninye olkitok le Misri o engaji enye pookin.

¹¹ Nelotu olamei atua olosho Misri pookin o atua olosho Kanaan, o osina kitok, neitu etum loopapa lang' endaa.

¹² Ore pening' Yakoob, ajo etii endaa Misri, neirriwaa loopapa lang' tʼenkata elukunya.

¹³ Ore tʼengaigil e are neyolou lalashera Yosef, neyolou Farao enkishomi e Yosef.

¹⁴ Neirriwaa Yosef neipot Yakoob, menye lenye, o enkishomi enye pookin, iltung'anak ntomoni naapishana o imiet.

¹⁵ Nedoiyo Yakoob metabaiki Misri nee, ninye o loopapa lang',

¹⁶ nenapi ninye Sikem nenuki tiatua enkurare nainyang'ua Abraham tʼenkinyang'a oo ngoshola too nkera Emor te Sikem.

¹⁷ Akae, ore petaanu enkata enkisiligata naiturujaka Engai Abraham, nepona olorere neaku kumok tʼolosho Misri,

¹⁸ metabana nejing' olekai karsis leitu eyolo Yosef.

¹⁹ Neitobiraki ele olosek enkishomi ang' neitobiraki loopapa lang' ntorrok neisho eiturrari nkera enye kutiti, pemebik eishiu.

²⁰ Neiuni te ina kata Mose neaku nenyorru Engai ninye neitotii enkata oo lapaitin okuni tʼengaji e menye;

²¹ ore peiturrari, nedumu ninye entito e Farao neitubulu ninye anaa enkerai enye.

²² Neiteng'eni Mose tʼeng'eno pookin oo Lmisrin, negolu too rorei o too nkyasin enyena.

²³ Ore peaku ninye loo larin artam, nejing'aa atua oltau lenye, peing'oraa lalashera lenyena, nkera Israel.

²⁴ Nedol oltung'ani oisilitoi, neing'araki neretoki oloinyalitai near Olmisri metua.

²⁵ Nejo, ajo eyolou lalashera lenyena, ajo eisho Engai ninje enkitopuata too ngaik enyena, kake eitu eyolou ninje kuna.

²⁶ Ore tʼengolong' e are neipung'oki looara neitobiraki osotua nejo: Lelea, irara ndai lalashera, ainyo pintobirakinono ntorrok?

²⁷ Ore oloisilito ol elatia enye neiponyaki ninye enelakwa nejo: Kang'ai likintaa iye olkitok o olarishani lang'?

²⁸ Iyeu nikiar matua anaa pitara ola ng'ole Misri?

²⁹ Neisik Mose te ilo rorei neaku olomoni tʼolosho Midian neiu te ina alo nkera are.

³⁰ Ore peishunye larin artam, nelioi te ninye olmalaika lʼOlaitoriani ti ang'ata oldonyo Sinai tiatua enkiwuwuoto enkima tʼolodung'okino.

³¹ Ore pedol Mose, neiputukunyoki enatalie; ore penyikaki ninye, peing'oraa, nebaiki ninye oltoilo lʼOlaitoriani:

³² Ara nanu Engai oo loominyi linono, Engai e Abraham o Engai e Isaak o Engai e Yakoob. Neikirikira Mose neitu eidim aing'orai.

³³ Nejoki Olaitoriani ninye: Talaku namuka too nkejek inono, amu ore ene wueji nintasheiye era enkop sinyati.

³⁴ Enduata atadua osina loo ltung'anak lainei ootii Misri, naning' ang'at enye nadou, paitupuku ninje; onaa wou taata, paairriwaa iye, pilo Misri.

³⁵ Ele Mose otanyaita ninje nejoki: Kang'ai likintaa olkitok o olarishani lang? ninye eirriwaiye Engai, peaku olkitok o Olaitopuani tʼengaina olmalaika otalie te ninye tiatua olodung'okino.

³⁶ Neitupuku ele ninje neitobir nkiputukunyot o ntokitin kituak tʼolosho Misri o tʼOlbalbal odo o tiatua ang'ata, larin artam.

³⁷ Ninye ele Mose otiaka nkera Israel: Elainyeyeki ndai Olaitoriani Engai inyi olayolounoni tiatua lalashera linyi lijo nanu; entoning' ninye!

³⁸ Ninye ele otii atua esirit ti ang'ata te nebo o olmalaika oirorie ninye tʼoldonyo Sinai o loopapa lang', otang'amua rorei lʼempuan, peisho yook;

³⁹ neitu eiruk loopapa lang' aatoning' ninye neiponyaki enelakwa nerrinyo too ltauja Misri

⁴⁰ nejoki Aron: Ntobiraki yook ngain naaiturukie yook, amu mikiyolo enataa tʼele Mose oitupukuo yook tʼolosho Misri.

⁴¹ Neitobir olashe too nona olong'i neaki ena mua enkidasare neng'ida tʼolbae loo nkyasin oo ngaik enye.

⁴² Neibelekenya Engai neisho ninje, peisyayaki oltim le shumata anaa petisiraki tʼesirata oo layolounok: Ke kiakitia nanu yeng'unot o nkidasareitin larin artam tiatua ang'ata, naaji e Israel?

⁴³ Niapupu engaji olototo e Molok o olakira lʼengai inyi Romfa, muain nintobira, pisyayakiki ninje; nalaidurrie nanu ndai metabaiki idya matua e Babel.

⁴⁴ Neata loopapa lang' engaji olototo enjakenishu ti ang'ata anaa peitanapa ninye olotiaka Mose, peshet aitanyanyukie ena mua natadua;

⁴⁵ ore si ninje loopapa lang' ootang'amutua ninye neitijing' te nebo o Yosua atua olosho loo loreren ootimira Engai tʼengomom oo loopapa lang' metabaiki enkata e David

⁴⁶ loinoto eng'adunoto tʼengomom Engai neyeu netumoki ewueji natonie Engai e Yakoob.

⁴⁷ Neshetaki ake Salomo ninye engaji.

⁴⁸ Kake meton Olotii shumata tʼengaji nateshetaki too ngaik anaa pejo olayolounoni:

⁴⁹ Nera shumata olorika lai nera enkop enapik nkejek ainei: kaa aji iyeuu nikishetakiki? ejo Olaitoriani, arashu kaa wueji nera ewueji eng'ieng'ata ai?

⁵⁰ Me engaina ai naitobira kuna pookin?

⁵¹ Ndai loo murto naagol, lememurata too ltauja o too nkiyaa, nitemumu ngolong'i pookin Olmumua Sinyati, anaa loominyi neijia si ndai.

⁵² Kalo ayolounoni eitu einyal loominyi? Etara metuata kulo loinosutua mbaak elotunoto ele oata esupato, ele lintarasaitie niariara ndai metua.

⁵³ Itang'amutua ndai nkitanapat tʼenkirriunoto oo lmalaikan, neitu imbung'ubung'u.

⁵⁴ Ore pening' ninje kuna, nepejoi iltauja lenye neonyiki ninye lala.

⁵⁵ Ore peiganya ninye Olmumua Sinyati, nekurraki ninye ngonyek enyena shumata nedol enkitook Engai o Yesus oitashe tʼengaina e tatene Engai

⁵⁶ nejo: Eng'orai, adolita shumata etabole neitashe Enkerai oltung'ani tʼengaina e tatene Engai.

⁵⁷ Neosh ninje olodoo naleng' nepising' nkiyaa enye neityamaki ninye tʼoltau obo

⁵⁸ neiponyaki aulo engan' nenang' too soito. Nepik iljaken ilkarashi lenye engalo oo nkejek olbarnoti obo oji Saulos.

⁵⁹ Nenang' ninje Stefanos too soito, esaisho nejo: Laitoriani Yesus, tang'amu Olmumua lai!

⁶⁰ Negil kung' nedar tʼoltoilo lʼengolon: Laitoriani, mishumaki ninje ena kitarruoto enye! Ore ejoito kuna nee.