Iasat 3 - Osotua Ng'ejuk

¹ Akae, neaku epuo Petros o Yohanes te nebo engaji sinyati tʼenkata nasaishoreki, tʼesaa enturuj.

² Netii olee obo purpur eiter tʼengoshoke e ng'otonye otanapaki, oitaperoki ngolong'i pookin te kutukaji engaji sinyati naipoti Sidai, peomon kulo loojing' engaji sinyati nkishoorot empuris.

³ Ore pedol ninye Petros o Yohanes ejing'ita engaji sinyati, neomon ninje enkishooroto empuris.

⁴ Neing'oraa ake Petros te nebo o Yohanes ninye nejoki: Ng'orai yook!

⁵ Neing'oraa ninje neanyu, peng'amu entoki too ninje.

⁶ Neiro Petros: Maata ngoshola arashu sahabu, ore enaata ninye aaisho: tʼengarna e Yesus Kristos le Nasaret ntasho, tilimanai!

⁷ Neibung' engaina enye e tatene neapaa; netum nabokata ndapi enyena o rubat oo nkejek engolon,

⁸ neipirriu neitashe nelimana nejing' te nebo o ninje engaji sinyati nelo eityamityam eitadaraa Engai.

⁹ Nedol olorere pookin ninye eloito eitadaraa Engai.

¹⁰ Neyolou, aajo ninye oloshi oton eomonu nkishoorot empuris te kutukaji sidai engaji sinyati, neigany ninje nking'asiat o olputukuny too kuna naataa te ninye.

¹¹ Akae, ore peidikidikore ele purpur loishiunyeki Petros o Yohanes, neiturrurrokino olorere pookin enetii ninje atua enkitala naji ne Salomo, eiputukuny.

¹² Ore pedol Petros ena, nealiki olorere: Lelea le Israel, ainyo pimputukunyokiki kuna? Arashu ainyo pikurrakiki yook ngonyek, anai ijojo tʼengolon ang' arashu tʼesupato ang kinjoo ele, pelimana?

¹³ Engai e Abraham o Isaak o Yakoob, Engai oo lakuyani lang', ninye naitaa kitok Enkerai enye Yesus lintarasaitie ndai, litomikio t'engomom e Pilatos te ina kata naigwenaka, peing'uaiki ninye;

¹⁴ kake itomikio ndai ele Sinyati, olopeny esupato, nisaiyuyu, peishori ndai oltung'ani otaara metua,

¹⁵ niariara Olkitok lʼempuan metua. Eitopiwuo Engai ilo aitung'ua lootuata nikira yook iljaken lenyena.

¹⁶ Ore tʼenkirukoto e atua engarna enye eishooki ele lidolitata niyololo engolon tʼengarna enye; enkirukoto te ilo naishoo ninye ena biotishu tʼengomom inyi pookin.

¹⁷ Akae, lalashera, ayolo, ajo intobira kuna, miyololo, anaa peikuna si ninje, ilkituak linyi.

¹⁸ Kake eitisipa Engai kuna baak naatolimuo ninye opa tʼenkutuk oo layolounok lenyena pookin, ajo eisili Kristos lenye.

¹⁹ Ore taata, entaalata, embelekenyata, pejutori nkitarruot inyi,

²⁰ pepuonu nkatan eng'ieng'are tʼengomom Olaitoriani neirriu ninye Yesus Kristos oiteraki aainosaki ndai,

²¹ olemeata kata nemeng'amu enkitoria e shumata metabana neitobirakini mbaak pookin naairoro Engai t'enkutuk oo layolounok lenyena sinyat neba opa.

²² Etejo baiki Mose: Elo aitopiwuoki ndai Olaitoriani Engai Olayolounoni tiatua lalashera linyi anaa nanu; entoning' ninye too pookin naaliki ndai.

²³ Elaaku ore oltung'ani pookin lemening' ilo ayolounoni, neiminyeki ninye tukul tiatua olorere.

²⁴ Neinosu layolounok pookin eiter te Samuel o kulo lootusuja ninye, kulo pookin ooiroro, mbaak oo kuna olong'i.

²⁵ Irara ndai nkera oo layolounok o nʼosotua oitaa Engai o loominyi linyi te ina kata natiaka ninye Abraham: Emayani tʼeishoi ino ntipati pookin enkop.

²⁶ Eitopiwuoko ndai Engai tʼenkata elukunya enkerai enye Yesus neirriwaki ninye ndai, pemayan ndai, peibelekenyunye oltung'ani pookin aing'ua ntorrok enyena.