Iasat 16 - Osotua Ng'ejuk

¹ Nebaia ninje Derbe o Listra. Naa ng'orai, etii ina alo olaiteng'enuoni oji engarna enye Timoteos, engerai eng'oroyoni nabo oo Yudayoi nairuko, nera menye lenye Olgriki;

² Neijakenu lalashera ootii Listra o Ikonion te ninye sidan.

³ Neyeu Paulos, perubare ele ninye, neibung' nemurat ninye tʼolbae loo Yudayoi lootii atua kuna wuejitin, amu etayolo pookin, aajo era menye Olgriki.

⁴ Ore peim atua ngang'itie, neitarasaki kuna sipat, naaitanaputua lairriwak o laigwenak ootii Yerusalem, perrip ninje.

⁵ Negolu sirito tiatua enkirukoto nepona aaku kumok too ngolong'i pookin.

⁶ Neim Frigia o olosho Galatia nemitiki Olmumua Sinyati ninje einosu lomon tiatua Asia.

⁷ Ore pebaia Misia, netem aapuo Bitinia, neitu eisho Olmumua le Yesus epuo;

⁸ neim Misia nebaia Troas.

⁹ Nelioi enkitaduaroto kiarie te Paulos: etii oltung'ani obo le Makedonia oitashe nesai ninye nejoki: Talang'u Makedonia, piretoki yook!

¹⁰ Ore peidip atadua ena kitaduaroto, nikiyeu nabokata nikipuku aapuo Makedonia nikidol, aajo esipa eipoto yook Olaitoriani, pikinosaki ninje lomon lʼeng'ida.

¹¹ Nikidotu eenet te Troas nikibaia engoitoi naitoriori Samotrake o tʼengolong' e are Neapolis,

¹² o te ina alo metabaiki Filipi nara engang' kitok olosho Makedonia, engang' oo Romayoi. Nikitoni tiatua ena ang' ngolong'i naaje.

¹³ Ore tʼengolong' naeng'ieng'areki nikipuku tʼengang' aapuo embata engare, ewueji nasaishoreki, nikitoni nikirorie ng'oroyok naaiturrurrote.

¹⁴ Nening' eng'oroyoni nabo, naji engarna enye Lidia, engamirani oo lkarashi oodo, nʼengang' Tiatira, naure Engai; nebol Olaitoriani oltau lenye neibung' nairoro Paulos.

¹⁵ Ore peibatisi ninye o engaji enye, nesai yook nejo: Teni kitadua, aajo ara engairukoni Olaitoriani, entijing' engaji ai, pitonini tiatua; nediding'aki yook!

¹⁶ Neaku ore pikipuo ewueji nesaishoreki, neinepu yook engaisyayani nabo naata Olmumua loitayolo mbaak e akenya, enainotoko laitoriak lenyena endupoto kitok tʼenkinosunoto oo mbaak e akenya.

¹⁷ Nesuj ninye Paulos o yook neosh olodoo nejo: Era kulo leak laisyayak lʼEngai natii shumata neinosaki ndai engoitoi enkitopuata.

¹⁸ Neiko neijia ngolong'i kumok. Negoro Paulos neibelekenya nejoki Olmumua: Aaitanap iye tʼengarna e Yesus Kristos, pipuku te ninye. Nepuku te ninye te ina kata ake.

¹⁹ Ore pedol laitoriak lenyena, aajo eimina eanyunoto endupoto enye, neibung' ninje Paulos o Silas neyetaki osingira engomom oo lkituak,

²⁰ nerik ninje enetii larikok loo sikerin nejoki: Enyaul kulo tung'anak engang' ang' nera ninje Yudayoi,

²¹ neiteng'en irregiei lemeaku, piking'amu aaitobir ninje, tiaraki nikira Romayoi.

²² Negoroki esiamu ninje, neitanapu larikok loo sikerin, peoruni ilkarashi lenye neari.

²³ Ore peidip aataara ninje naleng', nenang'aki ninje atua engaji erripore neitanap olarriponi lʼengaji, perrip ninje naleng'.

²⁴ Ore peishori ninye ena kitanapata, nenang'aki ninje atua engaji erripore, olgilata liatua tukul, neitirrish nkejek enye too nkeek.

²⁵ Ore tʼempolos e kiarie nesaisho Paulos o Silas neranyaki Engai, neinining' ninje ilkulekai ooena.

²⁶ Neaku nabokata enkikirikirata kitok enkop neing'unung'un baiki entonata engaji erripore; nebolo nabokata kutukajini pookin nedoiyo eneta enye pookin.

²⁷ Ore pepiu olarriponi lʼengaji too njok nedol, ajo etabolote kutukajini engaji erripore, neshitu olalem neyeu near kion metua, amu etejo, ajo ekweta looena.

²⁸ Neapaa Paulos oltoilo tʼengolon nejoki: Miasaki kion entorroni, amu kitii pookin ene!

²⁹ Neyeu enkilang'et neilang'aki atua eikirikira, nebatatakino Paulos o Silas

³⁰ nerik ninje boo nejo: Laitoriak, kaji aiko, patum atopua?

³¹ Nejo ninje: Ruko Olaitoriani Yesus Kristos, nipok iye o engaji ino.

³² Neinosaki ninye lomon lʼOlaitoriani te nebo o pookin lootii atua engaji enye.

³³ Neitoomon ninje te ina kata e kiarie neisuj oshot enye, neibatisi nabokata ninye o ilkulenyena pookin;

³⁴ neriku ninje engaji enye neisho ninje endaa, neng'ida ninye o engaji enye, tiaraki nairuko Engai.

³⁵ Ore pekenyu, neirriwaa ilkituak ilmurran lenye ejo: Metalaki kulo tung'anak meshomo!

³⁶ Neinosaki olarriponi lʼengaji erripore Paulos lelo rorei: Eirriutua ilkituak, pelakuni ndai. Akae, enyoito taata, pipuopuo tʼeseriani.

³⁷ Nejoki Paulos ninje: Etaaraki yook too ngonyek olorere, eitu eigwenakini yook, nikira yook Romayoi, etanang'akitia yook engaji erriporej o taata neitupuku ninje yook tʼesungureishu? Me neijia! Njepuonu ake oopeny aarik yook boo!

³⁸ Neliki ilmurran ilkituak kulo rorei. Neureishoi etoning'o, aajo era ninje Romayoi,

³⁹ nepuonu neirorie ninje, nerik boo nesai, pepuku tʼengang'.

⁴⁰ Nepuku tʼengaji erripore nepuo engaji e Lidia; ore pedol ninje lalashera, neitagol ninje nepuku.