Iasat 11 - Osotua Ng'ejuk

¹ Nening' lairriwak o lalashera ootii Yudaya, aajo etang'amutua si ninje loreren lomon lʼEngai.

² Ore peilep Petros Yerusalem, negilunore ninye loora lʼemurata

³ ejo: Itijing'a atua iltung'anak lememurata ning'arie endaa.

⁴ Neiter Petros ainosaki ninje mbaak tʼolkereri ejo:

⁵ Atobiko tiatua engang' Yope asaisho neururu Olmumua lai nadol enduaroto: nedou engusa anaa erridata olkarash, neitadouni te shumata too mowuarak ong'wan, nelotu enatii nanu;

⁶ ore pakurraki aing'oraa, nadol ng'wesi lʼenkop naata nkejek ong'wan o iljang'it lʼosero o naaikurtutari o ntaritik e shumata.

⁷ Naning' oltoilo laajoki: Nyototoi, Petros, teyeng'a, nosa!

⁸ Najo si nanu: Me neijia, Laitoriani, amu ore entoki naiduruk arashu enemera sidai eton eitu ejing' enkutuk ai tukul.

⁹ Naaitoki aliki nanu oltoilo oing'ua shumata: Ore naaitisidana Engai, mintaa iye torrok.

¹⁰ Neaku kuna aigil uni, neitokini ailepie pookin shumata.

¹¹ Ore nabokata eitasheito iltung'anak okuni te boo engaji natii nanu laairriwakaki eing'ua Kaisarea.

¹² Naajoki ake Olmumua: Nno te nebo o ninje, ming'arrirro! Nikiruba te nebo o kulo alashera ile nikijing' engaji e ilo lee.

¹³ Neinosaki ninye yook eneikuna teni edol olmalaika oitasho tiatua engaji enye nejoki ninye: Rriwai iltung'anak, pepuo Yope neipot Simon oata engai arna Petros,

¹⁴ likiliki rorei likintopok iye o engaji ino pookin.

¹⁵ Ore paiter nanu airo, nedoiki Olmumua Sinyati ninje anaa petadoikio yook tʼenkiterata.

¹⁶ Nadamu te ina kata ororei lʼOlaitoriani otejo: Eibatisishe Yohanes tʼengare, kake eibatisi ndai tʼOlmumua Sinyati.

¹⁷ Akae, ore peishoo Engai ninje ena kishooroto anaa yook looiruko Olaitoriani Yesus Kristos: kara nanu ng'ai oidim atomitiki Engai?

¹⁸ Ore pening' ninje kuna, negira neitadaraa Engai nejo: Eishoo Engai baiki loreren lemeata ninye enkitaalata, petum empuan.

¹⁹ Ore kulo ooisardaka tʼolbae lʼosina otupukuo too mbaak e Stefanos, nepuo metabaiki Foinike o Kupros o Antiokia neitu einosaki ororei olekai tung'ani neme Yudayoi ake.

²⁰ Etii ake ilkulekai ooje atua ninje, leak le Kupros o le Kirene. Ore pebaia ninje Antiokia, neirorie ninje baiki Ilgrikini neinosaki ninje Olaitoriani Yesus.

²¹ Netii engaina Olaitoriani e nebo o ninje neiruk esiana kitok neibelekenyakino Olaitoriani.

²² Nebaiki kuna baak nkiyaa esirit natii Yerusalem, neirriwaa Barnabas, pelo metabaiki Antiokia.

²³ Ore peidip atabai ninye nedol eng'adunoto naishorua Engai, neng'ida nediding' pookin, pebik ninje tiatua Olaitoriani osupatei too ltauja lenye.

²⁴ Amu era ninye oltung'ani supat nebore Olmumua Sinyati o enkirukoto. Nerikokini esiamu narrish Olaitoriani.

²⁵ Nepuku Barnabas alo Tarsos, peing'oru Saulos,

²⁶ ore petum ninye, neriku Antiokia. Neaku eiturrurro ninje o esirit olari olulung'a neiteng'en esiamu narrish. Neipoti laiteng'enuok tʼenkata elukunya te Antiokia ilkristianoi.

²⁷ Nedou to kuna olong'i layolounok eing'ua Yerusalem nepuonu Antiokia.

²⁸ Neitashe obo too ninje oji engarna enye Agabos neitayolo ninye tʼenkidimata Olmumua, ajo elotu olamei kitok atua olmaa pookin; neaku neijia too ngolong'i e kaisar Klaudios.

²⁹ Nenyorru aaitobira laiteng'enuok, oltung'ani pookin anaa peidim, enkishooroto, peakini lalashera ootii Yudaya;

³⁰ neiko nji neirriwaki laigwenak too ngaik e Barnabas o Saulos.