Iasat 10 - Osotua Ng'ejuk

¹ Etii oltung'ani obo atua Kaisarea neji engarna enye Kornelios, olkitok lʼendung'oti empuoto naji Italia,

² supat neure Engai te nebo o engaji enye pookin, neisho olorere nkishoorot kumok nesai Engai ngolong'i pookin,

³ nedol tiatua enduaroto abaraki, tʼenkata esaa enturuj dama, ejing'aki olmalaika lʼEngai ninye tʼengaji enye nejoki ninye: Kornelios!

⁴ Neing'oraa ninye neureishoi nejo: Kainyo natii, Laitoriani? Nejoki ninye: Eilepa sayat o nkishoorot inono engomom Engai nedamu ninje.

⁵ Akae, rriwai iltung'anak, pepuo Yope neipot Simon oata engai arna enye Petros,

⁶ otii engang' oltung'ani oji engarna enye Simon, ora oladotoni loo lonito, etii engaji enye embata olbalbal; kilaliki ninye enintobir.

⁷ Ore peidip ashomo ele malaika oirorie Kornelios, neipot ninye laisyayak lenyena aare lʼengaji enye o osikeri lenye obo supat too kulo looisyayaki ninye oshi;

⁸ ore peidip ainosaki ninje mbaak pookin, neirriwaa ninje, pepuo Yope.

⁹ Ore tʼengai olong', epon etii ninje engoitoi netaaniki engang', neilepaki Petros keper aji alo asaisho, tʼenkata, naunore engolong'.

¹⁰ Netum olamei kitok neyeu nedaa, kake ore epon eitobirakini endaa, neururu tʼolmumua

¹¹ nedol shumata etabole nedoiki engusa anaa erridata olkarash nateenaki too matuan ong'wan, neitadouni enkop.

¹² Ore atua enye netii muain pookin oo ng'wesi naata nkejek ong'wan o iljang'it lʼosero o naaikurtutari o ntaritik e shumata.

¹³ Nening' oltoilo ojoki ninye: Nyototoi, Petros, teyeng'a, nosa!

¹⁴ Nejo Petros: Me neijia, Laitoriani, amu eitu aikata anya tukul enaiduruk o enemera sidai.

¹⁵ Neitoki aning' ninye oltoilo en e are: Ore naaitisidana Engai, mintaa iye torrok.

¹⁶ Etaa kuna aigil uni; ore tekurum o kuna nerrinyori engusa shumata.

¹⁷ Ore epon eitu eyolou Petros tʼoltau lenye eneiko tʼolbai lʼenduaroto natadua, ng'orai, neing'oru kulo tung'anak looirriwaiye Kornelios, engaji e Simon, neitashe te kishomi,

¹⁸ neipotisho neikilikwan anake etii Simon oata engai arna Petros ene anaa olomoni.

¹⁹ Ore te ina kata eibirribirrita Petros enduaroto, nejoki Olmumua ninye: Ng'orai, etii iltung'anak okuni liking'oru;

²⁰ tudumunye, tadoi abori, nno te nebo o ninje, ming'arrirro, amu nanu oirriua ninje.

²¹ Nedoiki Petros kulo tung'anak ooirriwaka Kornelios enetii ninye nejoki: Eng'orai, nanu ilo oling'oruru. Ke tʼolbae le nyoo itiiti ene?

²² Nejo ninje: Kornelios, olkitok loo sikerin, oltung'ani supat, oloure Engai, oata enkitadararoto sidai tiatua olorere pookin loo Yudayoi, einoto ninye olkilikwai lʼolmalaika sinyati, pikiriku engaji enye, pikinining'u rorei linono.

²³ Neitijing' neitoomon ninje. Ore tʼengai olong' nedumunye te nebo o ninje nerubare ninye lalashera ooje ootii Yope.

²⁴ Ore tʼengolong' e are nejing' Kaisarea; neanyu Kornelios ninje eiturrurro enkishomi enye o iljorueta lenyena.

²⁵ Ore ejing'ita Petros, nenang'are Kornelios ninye nebatatakino nkejek enyena neitaa ninye kitok.

²⁶ Neapu Petros ninye nejoki: Ntasho, amu ara si nanu oltung'ani.

²⁷ Ore peidip airorie ninye, nejing' nedol ilkumok ooiturrurrote.

²⁸ Nejoki ninje: Iyololo ndai, aajo me sidai tʼoltung'ani lora Oyudayos, teni eder arashu elotu enetii loora loo kulekai oreren; kake aaitadua Engai, pamaipot oltung'ani o obo anaa oloiduruk arashu oltorrono.

²⁹ Onaa aewuo neitu aany aaipotoki. Akae, aikilikwan taata: ke tʼolbae le nyoo kimpoto?

³⁰ Nejo Kornelios: Engolong' e ong'wan taata eitu anya endaa metabaiki ena kata, ore tʼesaa enturuj nasaisho tʼengaji ai, naa ng'orai, neitashe oltung'ani tʼengomom ai oata ilkarashi ooilang'isho,

³¹ nejo: Kornelios, etoning'oki sayat inono nedamuni nkishoorot inono tʼengomom Engai.

³² Akae, rriwai iltung'anak, pepuo Yope, peipot te ine Simon oata engai arna Petros, otii engaji e Simon, oladotoni loo lonito, natii embata olbalbal: teni elotu ninye, nikilairorie.

³³ Nairriwaa nabokata enitii iye nintobira sidai iewuo. Akae, kitii yook pookin taata ene engomom Engai, pikining' mbaak pookin nikintanapa Engai.

³⁴ Nebol Petros enkutuk enye nejo: Esipa, atayolo abaraki, ajo meing'oraa Engai emua oo ltung'anak,

³⁵ kake ore tiatua loreren pookin enyor oloure ninye o oloitobir esupato.

³⁶ Itayoloutuo ndai ele rorei loirriwaka Engai nkera Israel, peinosu eseriani te Yesus Kristos ora Olaitoriani loo pookin,

³⁷ oibulu atua Yudaya pookin neiter te Galilaya, tekurum enkibatisa nainosua Yohanes,

³⁸ ajo eela Engai Yesus le Nasaret tʼOlmumua Sinyati o tʼengolon, oima idyalo o idyalo eitobir sidan, eishiunye pookin looitamio satan, amu etaboitare Engai ninye.

³⁹ Nikira yook iljaken loo mbaak pookin naaitobira ninye tiatua olosho loo Yudayoi o Yerusalem. Near ninje ninye metua neik tʼenjata.

⁴⁰ Eitopiwuo Engai ele tʼengolong' e uni neitadolu ninye tʼewuas,

⁴¹ me tʼolorere pookin, kake too ljaken ooitera Engai agelu nera yook likitadaate nikiokisho te nebo o ninye, eidipa atopiu too lootuata.

⁴² Neitanap ninye yook, pikinosaki olorere nikinjakenoki, aajo ninye eitanapua Engai, peaku olaigwenani loo looishiu o loo lootuata.

⁴³ Eijakenu te ninye layolounok pookin, aajo eishori oltung'ani pookin loiruk, enkitaunoto oo nkitarruot tʼengarna enye.

⁴⁴ Ore epon eirorita Petros kulo rorei, nedoiki Olmumua Sinyati pookin ootoning'o ena bae.

⁴⁵ Neiputukuny kulo airukok lʼemurata ooetuo te nebo o Petros, tiaraki natubukokoki baiki loreren lemeata Engai enkishooroto Olmumua Sinyati;

⁴⁶ amu etoning'o eirorita ninje too nkutukie neitadaraa Engai. Nejo Petros:

⁴⁷ Keidim oltung'ani atomito engare, pemeibatisi kulo lootang'amutua Olmumua Sinyati, neijia ake anaa yook?

⁴⁸ Neitanapisho, peibatisi ninje tʼengarna e Yesus Kristos. Nesai ninye, pebik ngolong'i naaje.