Iasat 1 - Osotua Ng'ejuk

¹ Aidipa atisira, Teofilos lanyor, tiatua enkitabu elukunya mbaak pookin naaitera Yesus aitobir neiteng'enu

² metabaiki ena olong' naidipa aitanapa tʼengolon Olmumua Sinyati lairriwak lootegelua neilepieki shumata;

³ neitadol ninje kion eishiu eidipa osina lenye too rregiei kumok nelioi too ninje enkata oo ngolong'i artam neinosu nara nʼenkarsishu Engai.

⁴ Ore peidip aiturrurro ninje, neitanap ninje, pemepuku te Yerusalem, kake peanyu enkisiligata e Papa enitoning'o (nejo ninye) ndai te nanu;

⁵ amu eibatisishe Yohanes tʼengare, kake eibatisi ndai tʼOlmumua Sinyati, teni eishunye kuna olong'i kuti.

⁶ Ore kulo ooiturrurrote neikilikwan ninye nejo: Laitoriani, ke te ina kata ilarrinyoki Israel enkarsishu enye?

⁷ Nejoki ninye ninje: Me entoki inyi, piyolouu enkopa arashu enkotata natipika Papa tiatua enkidimata enye;

⁸ kake ipuopuo aang'amu engolon Olmumua Sinyati olotu shumata inyi niakuku iljaken lainei tiatua Yerusalem o tiatua Yudaya o Samaria pookin o metabaiki enkiting'oto enkop.

⁹ Ore peidip atejo kuna, eing'orita kulo, neapari neshum erukenya ninye too ngonyek enye.

¹⁰ Ore eduaia ninje eloito ninye shumata, ng'orai, neitasheiki ninje leak aare looishopito ilkilani ooibor

¹¹ ootejo: Ndai, lelea le Galilaya, ainyo pintasheshe nimaririri shumata? Ore ele Yesus oitung'aiyoki ndai nelo shumata eitoki alotu neijia anaa pitaduaitie eloito ninye shumata.

¹² Ore peidipai, nerrinyo aapuo Yerusalem eing'ua oldonyo oji Loo loirienito, otaaniki Yerusalem ebana olototo lʼengolong' naeng'ieng'areki.

¹³ Ore peidip aatijing', neilep shumaroto engaji netoni te ina alo Petros o Yohanes o Yakobos o Andreas o Filipos o Tomas o Bartolomayos o Matayos o Yakobos le Alfayos o Simon Selotes o Yudas le Yakobos.

¹⁴ Ore kulo pookin neisyaisho tʼoltau obo tiatua esayata te nebo o ng'oroyok o Maria, ng'otonye e Yesus, o lalashera lenyena.

¹⁵ Ore too nona olong'i neitashe Petros tʼempolos oo lalashera (ore esiana oo kulo looiturrurrote ebaia iip nabo o tikitam) nejo:

¹⁶ Lelea, lalashera, meata kata nemeitabaiari esirata naitera alimu Olmumua Sinyati tʼenkutuk e David tʼolbae le Yudas lotaa olaiturukoni loo kulo ooibung'a Yesus.

¹⁷ Amu eikenaiyoki te nebo o yook neng'amu enkyas ena kisyayare anaa yook.

¹⁸ Neinyang'u ele enkuruma tʼolkwaje torrono nesulunye tʼengomom nedanya tʼempolos neitiakunye engoshoke pookin.

¹⁹ Neyolou ena pookin ootii Yerusalem neipoti baiki ena kuruma tʼenkutuk enye Akeldama, nera enkitaalata enye Enkuruma osarge.

²⁰ Amu etisiraki tiatua enkitabu oo Singolioitin: „Njeing'uari ntonat enyena, njoo metii oltung'ani oton tiatua“, ore kat are: „Njeng'amu olekai enkyas enking'orare enye“.

²¹ Akae, ore tiatua leak ootaboitare yook tʼenkata pookin natijing'a nepuku tʼempolos ang' Olaitoriani Yesus Kristos

²² eiter tʼenkibatisa e Yohanes metabaiki ina olong' naitung'aiyoki yook, ore obo too lelo meata kata nemeaku oljakeni lʼempiunoto enye te nebo o yook.

²³ Neitasheye ninje aare: Yosef oipotoki Barsabas, neata engai arna Yustos, o Matias;

²⁴ nesaisho nejo: Iye Laitoriani, oyolo iltauja lenye pookin, ntadolu obo Etegelua too kulo pokira are,

²⁵ peng'amu ewueji ena kisyayare o enkirriwaroto natung'aiye Yudas nelo ewueji enye.

²⁶ Neosh olenkukuo netum enkukuo Matias neikenari ninye te nebo o lairriwak tomon o obo.