Filimon 1 - Osotua Ng'ejuk

¹ Paulos, oloena le Yesus Kristos, o Timoteos, olalashe: te Filemon olikinyor o olaitobirani lʼenkyas te nebo o yook,

² o te Apia, enganashe, o te Arkipos, olong'ar enjore te nebo o yook, o tʼesirit natii atua engaji ino.

³ Njeboitare ndai eng'adunoto o eseriani naing'ua Engai, Papa lang', o Olaitoriani Yesus Kristos.

⁴ Aliki Engai ai ashe enkata pookin, teni aadamu iye tʼeomonoto ai,

⁵ teni aning' mbaak enyorrata ino o enkirukoto niata tiatua Olaitoriani Yesus Kristos o too sinyat pookin,

⁶ petum enkirukoto ino niking'ar, engolon tʼeyolounoto oo ntokitin pookin sidan nikiata tiatua Kristos Yesus.

⁷ Kake kiata eng'ida kitok o enkilejilejata tʼenyorrata ino; amu intaraposho iltauja loo sinyat, lalashe lai.

⁸ Onaa, ten ake aata enkiteunoto pookin tiatua Kristos, paaitanap iye mbaak naaku,

⁹ aadiding' iye tʼenyorrata ake, nanyanyukie Paulos olpaiyan, ore taata ara si oloena le Yesus Kristos.

¹⁰ Aadiding' iye tʼolbae lʼenkerai ai natoiwuo tiatua nkeenda, Onesimos,

¹¹ neitu kitumoki opa, kake ore taata aaretoki nanu o iye.

¹² Amu airriwaa ninye meeu enitii iye, tang'amu ninye anaa ijo oltau lai openy.

¹³ Amu atayeuo nebik ninye te nebo o nanu, paaisyayaki tʼewueji ino tiatua nkeenda oo lomon lʼeng'ida;

¹⁴ kake eitu ayeu neitobir ninye toki, metii enyorrata ino, pemetiu anaa eikonyuni sidan inono, kake pinyor iye openy.

¹⁵ Ebaiki te ina kitoorunyeki tʼenkiti kata, piata ninye nkatan pookin,

¹⁶ nemekure enyanyukie osinga, kake elusoo tʼosinga, anaa olalashe kirotet, naa olalai o naleng' olino, too pokira are, tʼosesen o tiatua Olaitoriani.

¹⁷ Onaa, teni kinkenaki nanu olora liking'ar, tang'amu ninye anaa nanu kion.

¹⁸ Kake teni kintarruoiye toki arashu eata entoki esile, tipika atua esiana ai.

¹⁹ Nanu, Paulos, otisiraka tʼengaina ai openy, ajo alak nanu; pamaajoki iye, ajo iye openy laa esile ai.

²⁰ Ee, lalashe lai, njooki mainoto eng'ida tʼolbae lino tiatua Olaitoriani; eng'ieng'ie oltau lai tiatua Kristos!

²¹ Aatisiraka iye, amu airuk ajo kining' iye nanu, nayolo, ajo intobir iye nalang' enajo.

²² Kake te nebo o nona, ntobirakaki ewueji nabikie; amu airuk ajo tʼolbae loo omonot inyi, naaishori nanu ndai.

²³ Kiroroki Epafras, oloena te nebo o nanu tiatua Yesus Kristos,

²⁴ o Markos o Aristarkos o Demas o Lukas, looisyaisho te nebo o nanu.

²⁵ Njebik eng'adunoto Olaitoriani lang' Yesus Kristos tʼolmumua linyi. Amen.