Embolunoto 4 - Osotua Ng'ejuk

¹ Ore peidipai kuna baak, nadol kutukaji natabole te shumata. Ore oltoilo lʼenkiterata latoning'o, netiu anaa oltoilo lʼemowuo laairorie nanu nejo: lepu ene, naaitadol iye mbaak nemeata kata nemeaku akenya.

² Ore nabo kata natii tʼolmumua. Naa ng'orai, etipikaki te shumata olorika lʼenkitoria netii obo otonita ilo orika.

³ Ore olotonita, neya tʼeng'or anaa osoit yaspis o sarder, nemanita olakira Ai olorika lʼenkitoria otiu anaa smaragid.

⁴ Netii si kulekai orikan tikitam o ong'wan oomanita ilo orika, natadua too lelo orikan ilpaiyani tikitam o ong'wan ootonita, ooishopokoki ilkilani ooibor, neata shumata oo lukuny enye ilkarandan lʼenkitoria le sahabu.

⁵ Nepuku tiatua olorika lʼenkitoria nkiwang'at o nkikurrukurrot o iltoiloi, netii nkilang'eta naapishana naaiwuwu tʼengomom olorika, naa ninje ilmumuan oopishana lʼEngai.

⁶ Netii engomom olorika enaiposha e bilauri nailiil anaa kristal; ore tʼempolos olorika lʼenkitoria o mbat, nemanita ng'wesi ong'wan naabore ngonyek tʼengomom o tekurum.

⁷ Ore ena ng'wes elukunya, netiu anaa olng'atuny, ore engai ng'wes e are, netiu anaa olashe, ore eng'wes e uni, neata engomom anaa oltung'ani, ore eng'wes e ong'wan, netiu anaa olkelerua oipirri te shumata.

⁸ Neata eng'wes pookin too kuna ong'wan naipuko ile, nebore ninje oriong' o tiatua ngonyek, nemeeng'ieng'a dama o kiarie ejo: Sinyati, sinyati, sinyati Engai Olaitoriani, tʼengolon pookin, otii opa, netii taata, naa ninye olotu!

⁹ Ore peaki ng'wesin enkitadararoto o enkitook o ashe ilo otonita olorika lʼenkitoria neishiu nkatan pookin o nkatan pookin,

¹⁰ nebatatakino kulo paiyani tikitam o ong'wan ilo oton tʼolorika neserem oloishiu nkatan pookin o nkatan pookin, nenang' ilkarandan lʼenkitoria lenye tʼengomom olorika nejo:

¹¹ Eaku, Olaitoriani o Engai ang', ping'amu enkitook o enganyit o engolon; amu iye oitobira ntokitin pookin, ore tʼolbae lʼeyeunoto ino, peitobiraki.