Embolunoto 1 - Osotua Ng'ejuk

¹ Embolunoto e Yesus Kristos naishoo Engai ninye meitadua singan lenyena mbaak nemeata kata nemeaku aasioki, neutaki neirriwaki tʼolmalaika lenye osinga lenye Yohanes,

² oijakenuo ororei lʼEngai o enjakenishu e Yesus Kristos natadua.

³ Teshi oloisoma o looning' ororei lʼenkitayolounoto nerrip enatisira tiatua; amu etinyikua enkata.

⁴ Yohanes: too kuna sirito naapishana naatii Asia. Njebik eng'adunoto te nebo o ndai o eseriani naing'ua ilo otii taata, naa ninye opa otii, naa ninye olotu, neing'ua kulo mumuan oopishana ootii tʼengomom olorika lenye,

⁵ neing'ua Yesus Kristos lora oljakeni supat o olkikau loo lootuata o olkitok loo lkarsisi tʼenkop. Ninye otonyorra yook neisuj yook too nkitarruot tʼosarge lenye,

⁶ neitaa yook ilkarsisi o laidasak tʼengomom Engai o Menye lenye, oishori enkitook o engolon nkatan pookin o nkatan pookin. Amen.

⁷ Ng'orai, elotu too ng'atambo e shumata, nepuo aadol ninye ngonyek pookin o lootaremo ninye; nepuo aaishir tʼolbae lenye njomito pookin enkop. Ee, esai!

⁸ Ara nanu A o O, ejo Olaitoriani Engai otii taata, naa ninye opa otii, naa ninye olotu, tʼengolon pookin.

⁹ Nanu Yohanes, lora si olalashe linyi ong'arie ndai osina o enkarsishu o olng'iria le Yesus Kristos, atii napari oloigeruno lʼenaiposha oji Patmos, tʼolbae lʼororei lʼEngai o lʼenjakenishu e Yesus Kristos.

¹⁰ Natii atua Olmumua tʼengolong' Olaitoriani naning' tekurum ai oltoilo sapuk laijo ol emowuo,

¹¹ ojo: Ara nanu A o O, ol enkiterata o ol enkiting'oto: Tisira nena nidolita tiatua enkitabu nirriwaki nekua sirito naapishana naatii Asia, atua Efesos o Smirna o Pergamos o Tiatira o Sardes o Filadelfia o Laodikea.

¹² Nashuko nanu, ajo paing'oraa ilo toilo laairorie. Ore paidip atushukoi, nadol nkilang'eta naapishana e sahabu,

¹³ o tʼempolos oo nekua kilang'eta naapishana obo, onyanyukie Oinoti lʼoltung'ani, oishopo olkila oado, nerretena enkimeita e sahabu olgoo lenye.

¹⁴ Ore elukunya o ilpapit lenyena neibor anaa enaileri naibor, anaa esiret, netiu ngonyek anaa ilng'ejepa lʼenkima.

¹⁵ Netiu nkejek enyena anaa suia ooika tʼenkima, naijo oltoilo lenye oloo ngariak kituak;

¹⁶ neata lakir oopishana tʼengaina enye e tatene, nepuku tʼenkutuk enye olalem opi ngaloli pokira are, neilang'isho engomom enye anaa engolong' nailiil.

¹⁷ Ore padol ninye, nabatata too nkejek enyena anaa olotua; naaiteleiki ninye engaina enye e tatene, naajoki: Miureisho, ara nanu ol enkiterata o ol enkiting'oto

¹⁸ o oloishiu. Ataa olotua, o ng'orai, aishiu nkatan pookin o nkatan pookin naata ieneta enkea o ine wueji enkima.

¹⁹ Tisira naa kuna baak nitadua, o naatii o naapuo aaku akenya.

²⁰ Ore emikio oo lelo akir oopishana litadua t'engaina ai e tatene o nena kilang'eta naapishana e sahabu: Ore lakir oopishana, naa ilmalaikan loo sirito naapishana; ore nkilang'eta naapishana nitadua, naa sirito naapishana.