2 Timoteo 4 - Osotua Ng'ejuk

¹ Onaa, aijakenu tʼengomom Engai o Olaitoriani Yesus Kristos, olotu aigwenaki looishiu o lootuata tʼelioroto enye o tʼenkarsishu enye:

² Nosu ele rorei, tonyua tʼenkata sidai o neme sidai, ngwenaki, ntureishoi, tuutu tʼolng'iria pookin o tʼenkiteng'enare.

³ Amu elotu enkata nemeyeu ninje enkiteng'enare naishiuniisho, kake tʼerisioroto oo lng'warraitin lenye oopeny eing'oru laiteng'enak ootiu anaa peyeu nening' nkiyaa enye,

⁴ neibelekeny nkiyaa enye pemening' esipata, neibelekenyakino natinin elejare.

⁵ Ore iye, torripo kion too pookin, ting'iria too ntorrok, ntobira enkyas olainosunoni loo lomon lʼeng'ida, ntabai enkisyayare ino!

⁶ Amu atioyo aidasishoreki netinyikua enkata elakunoto ai.

⁷ Atigilunore engilunoto sidai, aidipa enkwetata, aiboiye enkirukoto;

⁸ eng'or aarripokini olkaranda tʼesupato, laalaisho Olaitoriani te ina olong', olaigwenani supat, neme nanu ake, kake pookin lootonyorra elioroto enye.

⁹ Tonyua naleng', tasioku enatii nanu!

¹⁰ Amu natung'aiye Demas, nenyor mbaak ele maa, neshomo Tesalonike, neshomo Kreskens Galatia, neshomo Titos Dalmatia.

¹¹ Lukas ake openy otii e nebo o nanu. Iao Markos enitii, toriku ene wueji, amu ninye laaretoki nanu enkisyayare.

¹² Amu airriwaiye Tukikos meshomo Efesos.

¹³ Au ele kila liopore latung'aiye te Troas too ngaik e Karpos, teni ilotu, o nkitabuni, naleng' nena naaitobiraki too ndapan.

¹⁴ Ore Aleksandros, ele kunoni, aaikunaka ntorrok kumok; njelaaki Olaitoriani ninye, anaa perisiore nkyasin enyena.

¹⁵ Kake torripo si iye kion naleng' te ninye, amu etanya rorei lang' naleng'.

¹⁶ Tʼemitunoto ai elukunya eitu aaitasheiki o obo engalo ai, kake aatung'aitie pookin. Njoo meikenakini ninje.

¹⁷ Kake aaitasheikio Olaitoriani naaitagolie, peitabaiari enkinosunoto te nanu, nening' lemeata Engai pookin; naatang'adieki nanu enkutuk olng'atuny,

¹⁸ Aalo ang'adie Olaitoriani enkyas torrono pookin naalo aitopok tiatua enkarsishu enye e shumata. Njeishori ninye enkitook nkatan pookin o nkatan pookin. Amen.

¹⁹ Roroki Priska o Akwila o engaji e Onesiforos.

²⁰ Etobiko Erastos te Korintos; ore Trofimos atung'aiye ninye te Miletos emoi.

²¹ Tasioku wou eton eitu ebau enkata enkirobi. Kiroroki Oibulos o Prudens o Linos o Klaudia o lalashera pookin.

²² Njebik Olaitoriani te nebo o Olmumua lino. Njebik eng'adunoto te nebo o ndai. Amen.