2 Timoteo 2 - Osotua Ng'ejuk

¹ Ore iye, nakerai ai, tagolo tiatua eng'adunoto e atua Kristos Yesus.

² Kuna limot nitoning'o te nanu too ljaken kumok, njoo kulekai tung'anak supati, ooata eyolounoto, peiteng'en si ilkulekai.

³ Tang'ara enkisiloto te nebo o nanu anaa olmurrani supat le Yesus Kristos.

⁴ Metii osikari olo enjore oitushulaki kion mbaak ena kop, amu eyeu neitiship ilo otisiraka ninye enkyas osikari.

⁵ Ore tʼenkiguran, baiki teni eapare oltung'ani, nemetum enkaja, neme teni eapare osupatei.

⁶ Meata kata nemetum olaturoni lotur enkuruma, ilmomo tʼenkiterata. Tumuso naleng' enajo!

⁷ Amu kinjo Olaitoriani eng'eno tiatua mbaak pookin.

⁸ Tadamu Yesus Kristos, otopiwuo too lootuata, lʼeishoi e David, tʼeuangelion ai;

⁹ naaisilieki ena metabaiki too nkeenda anaa oloitobira ntorrok, kake meenai ororei lʼEngai.

¹⁰ Onaa, ang'iriaki pookin tʼolbae loo lootegeluaki, peiye etum si ninje enkitopuata tiatua Kristos Yesus te nebo o enkitook oo nkatan pookin.

¹¹ Esipa ele rorei: Teni kie te nebo o ninye, nikipuo aaishiu te nebo o ninye,

¹² teni kimiki, nelamiki si ninye yook;

¹³ teni mikiruk, nebik ninye aa supat, amu meidim ninye atomikio kion.

¹⁴ Ntadamu iltung'anak kuna baak, ninjakenu tʼengomom Olaitoriani, pemeishangarrare rorei, amu medupai, neibelekenyari ake kulo looning'.

¹⁵ Tonyua aitadol kion tʼEngai anaa olaitobirani supat lemeata eleyata, looriki ororei lʼesipata abaraki.

¹⁶ Ntalama kion mbaak enderrare oo mpeshoi entung'anishu; amu epon ina ake orregie torrono,

¹⁷ nenya ilo rorei anaa enkea nayeng'i; tiatua kulo etii Humenayos o Filipos,

¹⁸ ootapong'ori aaing'ua esipata, nejo eidipa ataa empiunoto oo lootuata, neibelekenya enkirukoto oo kulekai tung'anak.

¹⁹ Kake ebik entonata nagol Engai neata ele ponoto: Eyolo Olaitoriani loora ilkulenyena — o: Njepaash entorroni oltung'ani pookin oipot engarna Olaitoriani.

²⁰ Ore tʼengaji kitok, metii ake ntokitin e sahabu arashu nʼosuiai oibor, kake baiki noo nkeek o nʼesarng'ab, neata kulie enganyit, neata kulie enkurruna.

²¹ Kake teni eisuja oltung'ani apaash nona, neaku entoki sinyati naata enganyit, netumoki olopeny, neidipakinore enkyas pookin sidai.

²² Lanya ilng'warraitin torrok enkitishu! kake tusuja esupato, enkirukoto, enyorrata, eseriani te nebo o pookin ooipot Olaitoriani tʼoltau oibor.

²³ Tanya nkikilikwanat naatii emodaishu nemedupa; amu iyolo, ajo eiu ake olarrabal.

²⁴ Kake ore olaisyayani lʼOlaitoriani, me sidai, teni eilepilep, kake meata kata nemebor too ltung'anak pookin, neyolo aiteng'enisho, neng'iriaki iltorrok,

²⁵ odiding' tʼemborran lelo ooata engogong'i, an ake eisho Engai ninje enkitaalata, peyolou esipata,

²⁶ neng'enu neidim aatupukutu tiatua erreshet e satan, oteena ninje, peitobir enayeu ninye.