2 Timoteo 1 - Osotua Ng'ejuk

¹ Paulos, olairriwani le Yesus Kristos tʼeyeunoto Engai tʼerisioroto enkisiligata empuan tiatua Kristos Yesus:

² en ino, Timoteos, enkerai ai nanyor, eng'adunoto o enkordunoto o eseriani naing'ua Engai Papa o Kristos Yesus, Olaitoriani lang'.

³ Aliki Engai ashe naomon neba opa tʼentonai oo lakuyani lang' too ndamunot sidan, anaa enaadamu iye namapal dama o kiarie,

⁴ nayeu naadol iye, teni adamu ilkiyo linono, paaigany eng'ida;

⁵ amu adamu enkirukoto ino nasipa natii atua iye, naitera opa amany tiatua koko ino Lois o tiatua ng'utunyi Oinike, nayolo, ajo tiatua iye si.

⁶ Te ina bae aaitadamu iye, pinyeye enkishooroto Engai natii atua iye tʼenkiteleikinoto oo ngaik ainei.

⁷ Amu eitu eisho Engai yook Olmumua lʼenkuretishu, kake Olmumua lʼengolon o lʼenyorrata o lʼenkitoriokinoto.

⁸ Onaa, mining' enkurruna te nanu, oloena lenye, kake ting'iria too nkisilot tʼolbae lʼeuangelion, anaa nanu, tʼerisioroto engolon Engai,

⁹ naitopua neipotoki yook tʼenkipototo sinyati, me tʼolbae loo nkitobirat ang', kake tʼeotikinoto enye o eng'adunoto naishooki yook tiatua Kristos Yesus, eton eitu eiteruni olmaa;

¹⁰ neibalunyeki taata tʼelioroto Olaitoriani lang' Yesus Kristos, oiminye engolon enkea neitupukoki atua enkilang'et empuan o entiinoto nemerruoio tʼeuangelion,

¹¹ naatipikaki nanu, mataa olainosunoni o olairriwani o olaiteng'enani loo loreren lemeata Engai.

¹² Te ilo bae atum kuna kisilot; kake maning' enkurruna too ninje, amu ayolo olairuk, naaitisipuni, ajo aaidim atorripoki nena naaishooki, metabaiki ina olong'.

¹³ Mbung'a naleng' enkiteng'enare oo rorei ooishiuniisho Etoning'o te nanu, tiatua enkirukoto o enyorrata natii atua Kristos Yesus.

¹⁴ Ina kishooroto sidai torripo tʼeretokinoto Olmumua Sinyati, omany tiatua yook.

¹⁵ Iyolo ele rorei, ajo aatalamare nanu pookin ootii Asia; naa too ninje si Filipos o Ermogenes.

¹⁶ Metokordu Olaitoriani engaji e Onesiforos, amu aaitishipa aigil kumok neitu ening' enkurruna too nkeenda ainei;

¹⁷ kake ore etii Roma, aaing'orua naleng' naainoto.

¹⁸ Njeisho Olaitoriani, petum ninye enkordunoto tʼOlaitoriani te ina olong'; iyolo si iye, keba aa nkyasin aaisyayaka te Efesos.