2 Petero 3 - Osotua Ng'ejuk

¹ Ena empalai e are nasiraki ndai, lanyor lainei, naitadamunye ndai nainyeye ndamunot inyi sidan,

² pidamumu kulo rorei ootang'asa aaliki ndai layolounok sinyat, o enkitanapata ang', likira lairriwak lʼOlaitoriani o Olaitopuani.

³ Entayolo tʼenkata elukunya ena, aajo epuo aapuonu too ngolong'i enkiting'oto lamorok tiatua emoroto luopuoito anaa peyeu ilng'warraitin lenye oopeny,

⁴ nejo: „Kaji etii enkisiligata elotunoto enye? Amu neba eiruate loopapa etobiko pookin anaa tʼenkiterata enkitobirata“.

⁵ Kake eshuma too kulo loojo ena, ajo etii shumata neba opa o enkop nataa tʼengare nepuku tʼengare tʼororei lʼEngai;

⁶ Onaa neiminyeki enkop te ina kata tʼoloirrag lʼengare.

⁷ Neijia eitaanyitai shumata e taata o enkop tʼororei lenye, nerripokini enkima metabaiki engolong' enkigwena o enkiminata oo ltung'anak lemeure Engai

⁸ Njoo meshumakini ndai, loonyorri, ena nabo, ajo enyanyukie engolong' nabo tʼOlaitoriani anaa laritin iip tomon, o laritin iip tomon anaa engolong' nabo.

⁹ Moimutie Olaitoriani eitabaia enkisiligata enye, anaa pejo looje enkimutioto, kake eng'iri too yook nemeyeu, peimin oltung'ani, kake pebaiki pookin enkitaalata.

¹⁰ Kake elalotu engolong' Olaitoriani anaa olapurroni te kiarie, nepuo aamuta shumat tʼoriri, nepuo aashola ntokitin tʼeikan, nepuo aamuta enkop o nkitobirat naatii atua,

¹¹ Ore pelolong'u kuna pookin, kaji inkoko teni meata kata nimimbung'ubung'u orregie sinyati o orregie lʼenkuretishu Engai,

¹² pianyunyu nikwetikiki elotunoto engolong' Engai, napuoi aamutie shumat tʼenkima nepuoi aasholie neikieki ntokitin!

¹³ Kake kianyu yook shumata ng'ejuk o enkop ng'ejuk tʼenkisiligata enye namanyie esupato.

¹⁴ Onaa, loonyorri, entonyok ianyunyu kuna, pedoli ndai tʼeseriani t'engomom enye miatata ntibil o entorroni,

¹⁵ ninkenikene olng'iria lʼOlaitoriani lang' enkitopuata inyi, anaa petisira si olalashe lang' likinyor Paulos tʼeng'eno enye naishooki ninye,

¹⁶ anaa peirorie nona tiatua mpala enyena pookin; ore tiatua ninje etii kulie baak naagol nemeyolounoi, naaitaai kulo lemeyolo nemeunokino, neijia anaa nkulie sirat, neaku nʼenkiminata enye.

¹⁷ Kake ore ndai, loonyorri, tiaraki niyololo nona tʼenkiterata, entorrip aten, pemerikori ndai tʼenkitapong'oroto oo ltung'anak torrok te nebo o ninje, mbatatata aaing'ua ewueji inyi neikarraro.

¹⁸ Kake entubul tiatua eng'adunoto o eyolounoto Olaitoriani lang o Olaitopuani Yesus Kristos. Njeata ninye enkitook taata o metabaiki ngolong'i oo nkatan pookin. Amen.