2 Petero 1 - Osotua Ng'ejuk

¹ Simon Petros, osinga o olairriwani le Yesus Kristos: too lelo ooinoto ena nabo kirukoto kirotet te nebo o yook, tiatua esupato naisho Engai ang' o Olaitoriani Yesus Kristos.

² Njeisho Engai ndai eng'adunoto o eseriani kitok tʼeyolounoto Engai o Olaitoriani lang' Yesus Kristos.

³ Tiaraki naidipaki aaishoo yook tʼeyolounoto oloipoto yook tʼenkitook o tʼenkishaa enye engolon pookin engaishu enye naeaki yook empuan o enkuretishu Engai,

⁴ naishorieki yook nkisiligat naaikishaan naa kituak naleng', peiye itumutumu aatang'ar too nona entiunoto Engai, ikwetikwete olng'warra lʼerruoroto lotii enkop:

⁵ onaa entonyok te ina naleng', pintaduaiaia tiatua enkirukoto inyi enkishaa o tiatua enkishaa eyolounoto

⁶ o tiatua eyolounoto emitikinoto o tiatua emitikinoto olng'iria o tiatua olng'iria enkuretishu Engai

⁷ o tiatua enkuretishu Engai enyorrata oo lalashera o tiatua enyorrata oo lalashera enyorrata oo pookin.

⁸ Ore piatata nona osupatei, meisho ninje ndai ishalulu nimiatata ilmomo tiatua eyolounoto Olaitoriani lang' Yesus Kristos;

⁹ kake olemeata nona, nera modooni neirrapirrapisho nerikino enkisujata oo nkitarruot enyena e opa.

¹⁰ Onaa, lalashera, entopon aanyok, pintagoligolo enkipototo o engelunoto inyi; amu teni intobiribiri nona, nimipuopuo aaitoki aaikobo.

¹¹ Amu nji epuoi aadup aaisho ndai enjing'ata e atua enkarsishu oo nkatan pookin Olaitoriani lang' naa Olaitopuani Yesus Kristos.

¹² Akae, mayeu napai, paitadamu ndai oshi kuna baak, ten aa iyololo neitagolieki ndai tiatua esipata natii.

¹³ Nadol ajo eitoriori, eton atii atua ena aji, paitadamu nainyeye ndai;

¹⁴ amu ayolo, ajo meata kata namaitau engaji ai asioki, anaa enaaitadua Olaitoriani lang' Yesus Kristos.

¹⁵ Kake ayeu nanyokita, peiye, teni aidipa ashomo, itumutumu aatadamutu kuna baak.

¹⁶ Amu eitu kisuj yook natinin eng'eno te ina kata nikintayolo ndai engolon o elotunoto Olaitoriani lang' Yesus Kristos, kake kitadua too ngonyek ang' enkitook enye,

¹⁷ te ina kata nainoto ninye tʼEngai Menye enganyit o enkitook tʼoltoilo oakaki ninye eing'ua enkitook kitok: Nyele Oinoti lai lanyor oshipakino oltau lai.

¹⁸ Kitoning'o yook ele toilo lotaa eing'ua shumata, kiboitare ninye tʼoldoinyo sinyati.

¹⁹ Nikiata si ororei ogol lʼeyolounoto, nintobiribiri sidai, teni ing'oraara ninye anaa enkilang'et nailang'isho tiatua ewueji emiso, metabana neiter endama neilepu olakira lʼengakenya tiatua iltauja linyi.

²⁰ Meata kata niming'asing'asa aayolou ena, aajo meaku eyolounoto o nabo esirata tʼenkitaalata enye openy;

²¹ amu eitu eauni eyolounoto o nabo tʼeyeunoto oltung'ani, kake eiroro iltung'anak sinyat lʼEngai, eutakini tʼOlmumua Sinyati.