2 Ilsesalonike 3 - Osotua Ng'ejuk

¹ Ore enang'or, lalashera, entasayaki yook, pesioki ororei lʼOlaitoriani aponari, neitadarari anaa too ndai,

² neng'adieki yook iltung'anak moda o torrok; amu me en oo lkumok enkirukoto.

³ Kake supat Olaitoriani! elaitagol nerrip ndai tʼentorroni.

⁴ Kiruk tiatua Olaitoriani ndai, aajo enikintanap ndai, ninkoko nipuopuo aaiko.

⁵ Njeitorioki Olaitoriani iltauja linyi enyorrata Engai o olng'iria le Kristos.

⁶ Kake kintanap ndai, lalashera, tʼengarna Olaitoriani Yesus Kristos, pipaasharere olalashe pookin lemeibung' orregie oitoriori neme tʼenkiteng'enare nitang'amutua too yook.

⁷ Amu iyololo ndai oopeny eninkoko, pisujusuju yook; amu eitu kimposha too ndai,

⁸ neitu kinya endaa oltung'ani o obo pesho, kake kintobira dama o kiarie nkyasin tʼenyamali o tʼosina, pimikiroshiki obo linyi,

⁹ me, tiaraki nimikiata engolon, kake pikinjo ndai enkiteng'enare, pisujusuju yook.

¹⁰ Amu te ina kata nikitii atua ndai, kintanapa ndai ena, ajo teni meyeu neitobir oltung'ani enkyas, njoo medaa.

¹¹ Amu kining', aajo etii atua ndai looibung' orregie lemeitoriori nemeitobir enkyas, kake eitobir mbaak nemeaku.

¹² Kake kintanap lelo nikididing' ninje tiatua Olaitoriani Yesus Kristos, peitobir enkyas tʼolgira nenya endaa enye openy.

¹³ Ndai, lalashera, eminaura intobiribiri sidan.

¹⁴ Teni etii oltung'ani lemening' ororei lang', entayolo ele tung'ani nimiatata eng'arata o ninye, pekurru ninye.

¹⁵ Kake eminkenaki ninye anaa olmang'atinda, kake entididing' anaa olalashe linyi.

¹⁶ Ore ninye, Olaitoriani lʼeseriani, njeisho ndai eseriani oshi too ngoitoi kumok. Njebik Olaitoriani te nebo o ndai!

¹⁷ Enkirorokinoto tʼengaina ai nanu Paulos; naa ilo olponoto lai tiatua mpala pookin; asir aiko nji.

¹⁸ Njebik eng'adunoto Olaitoriani lang' Yesus Kristos tiatua ndai pookin. Amen.