2 Ilkorintio 9 - Osotua Ng'ejuk

¹ Ore mbaak e ina kisyayare naitaasi sinyat, mayeu nasiraki ndai.

² Amu ayolo eyeunoto inyi sidai, naitadararie too kulo le Makedonia, ajo ebik eitobirakino Akaia olari le ng'ole; neisis enyuata inyi ilkumok.

³ Nairriwaa lalashera, pemeaku enkitadararoto ang' tʼolbae linyi en e pesho te ina toki, nintobirakinono ndai anaa pairorie tʼolbae linyi;

⁴ pemeaku, teni epuonu iltung'anak le Makedonia te nebo o nanu, nedol ndai, aajo eitu ianyishosho, nikikurru yook (pamajo; ndai) te ina kitadararoto.

⁵ Akae, atejo, meata kata namadiding' lalashera, peiturukie aabaiki ndai neitobir ena mayani nitang'asa ndai aaisilig opa, peidipakino anaa emayani, neme anaa empiani.

⁶ Ajo nanu ena: Oloisuaia eng'or, nelaisambu eng'or; oloisuaia osupatei, nelaisambu osupatei.

⁷ Njeisho oltung'ani pookin anaa penyor tʼoltau, me tʼenkilishoto arashu tʼengolon; amu enyor Engai olaishooroni oshipa.

⁸ Eidim aitaa Engai, petii eng'adunoto pookin atua ndai, peiye iatata oshi embaikinoto pookin tʼentoki pookin, niponana naleng' tʼenkyas sidai pookin,

⁹ anaa petisiraki: Eitarasaiye ninye naleng' neisho laisinak, ebik esupato enye nkatan pookin.

¹⁰ Oloitarasaki embeu olaisuaroni, nelaitarasaki baiki endaa nainosi, nepon embeu inyi nelaitubulu ishot esupato inyi,

¹¹ pidupaii tiatua entoki pookin e atua emborrakinoto, naitaaki Engai ashe too yook.

¹² Amu ore enkisyayare ena sotore nemeidip ake enang'oriki sinyat, kake epon si ina, peliki ilkumok Engai ashe tʼolbae lʼena kisyayare supat,

¹³ amu eitaa ninje Engai kitok tʼolbae lʼening'oto inyi nimbalunyenye euangelion e Kristos, o tʼolbae lʼemborrakinoto e ina ng'arata ninjosho ninje o pookin;

¹⁴ neng'war ndai tʼengomono enye neomonoki ndai tʼolbae lʼenkumoi emunyani Engai too ndai.

¹⁵ Njeishori Engai ashe t'enkishorunoto enye nemeimakinoi.