2 Ilkorintio 8 - Osotua Ng'ejuk

¹ Aitadamu ndai, lalashera, eng'adunoto Engai naishooki tiatua sirito e Makedonia.

² Ten ake etaa sapuk osina otetemieki ninje, nepona naleng' eng'ida enye; ore ten aa ninje aisinak loora, neishooio nkumok tʼesupato.

³ Aijakenoki ninje, ajo tʼenkidimata enye, kake enalang' enkidimata enye, eitobirakinote,

⁴ nesai yook tʼenkilejilejata kitok, peking'amu enkishooroto o eng'arata enkisyayare, naitobirakitia sinyat.

⁵ Neme anaa pikitaanyutua, kake etang'asa aaishooio aten Olaitoriani, ore tekurum yook, tʼeyeunoto Engai.

⁶ Onaa, nikididing' Titos, peiye, anaa petang'asa asotu too ndai, eitabaia si ina kishooroto.

⁷ Kake neijia anaa piatata enkumoi oo mbaak pookin, tiatua enkirukoto o ororei o eyolounoto o enyuata o enyorrata inyi too yook, neijia entonyok piponana si tʼena munyani.

⁸ Mairo aitanapu toki, kake tiaraki natonyua ilkulekai, natem si enyorata inyi, anake eitoriori.

⁹ Amu iyololo eng'adunoto Olaitoriani lang' Yesus Kristos, ajo ninye adupani, kake etaa aisinani tʼolbae linyi, piakuku adupak tʼesinaishu enye.

¹⁰ Nyena eng'eno ai naliki ndai, amu etumoki ndai, tiaraki ninterutua tʼolari le ng'ole pokirare: me enkitobirata ake, baiki eyeunoto.

¹¹ Ore taata, entabai enkitobirata inyi; anaa pitonyorra opa aatayeu, neijia entaas si tʼerisioroto oo masaa inyi.

¹² Amu teni enyorru oltung'ani, neshipakinoi te ina naata, me te ina nemeata.

¹³ Majo ena, peiteneneng'i ilkulekai neiroshieki ndai, kake perisioi.

¹⁴ Onaa, enjoo etumoki endupoto inyi enang'oriki ninje ena kata, petumoki si akenya endupoto enye enyorrata inyi, perisioroi,

¹⁵ anaa petisiraki: Ore ele oiturrurro nkumok, nemeata enaleku; ore elde oiturrurro nkuti, nemeng'oriki toki.

¹⁶ Ashe Engai naishorua enyuata naba nji tiatua oltau le Titos too ndai.

¹⁷ Amu etang'amua ninye eutata ang', kake eisarisara tʼenyorrata enye openy, pelotu enitiiti ndai.

¹⁸ Kirriwaitie olalashe te nebo o ninye, oitadarari tʼolbae lʼeuangelion tiatua sirito pookin.

¹⁹ Neme neijia ake, kake etegelutua sirito ninye, perubare yook t'olototo lang' tʼolbae lʼena munyani nikintobir, peitaai Engai kitok nelioi olokiyo lang'.

²⁰ Nikimitiki te ina, pemeduaki oltung'ani yook ntorrok tʼolbae lʼena sotore nikintobir.

²¹ Amu king'as aadamu mbaak sidan, neme tʼengomom Olaitoriani ake, kake tʼengomom oo ltung'anak si.

²² Kirriwaitie te nebo o ninje ilo alashe lang', likitujurro too mbaak kumok aigil kumok, aajo enyokita naleng', kake epon taata anyok.

²³ King'idare ndai naleng', ten aa tʼolbae le Titos ora lʼemboitei ai neretoki ndai te nebo o nanu, arashu tʼolbae loo lalashera lang' oora lairriwak loo sirito, naa enkitook e Kristos.

²⁴ Akae, entaduai ninje enaibalunye enyorrata inyi o enkitadararoto ang' tʼolbae linyi, baiki too ngomomitie oo sirito.