2 Ilkorintio 7 - Osotua Ng'ejuk

¹ Akae, ore pikiata kuna kisiligat, lanyor, maisuja aten tʼentibilishu pookin enkiring'o o en olmumua, pikibaiki esinyatishu tiatua enkuretishu Engai.

² Entang'amu yook. Eitu kintarriki oltung'ani, neitu kiony olekai, neitu kinkonyu olekai.

³ Majo nena aigwenaki ndai. Atang'asa duo ajo, njere itiiti atua iltauja lang', pikie anai kipok te nebo.

⁴ Airorie ndai tʼenjipai kitok; naata nkitadararot kumok tʼolbae linyi; aaiganya enkilejilejata, napon aata eng'ida naleng' tiatua osina lang' pookin.

⁵ Amu ore kietuo yook atua Makedonia, eitu eata enkiring'o ang' eng'ieng'ata tukul, kake eilishieki yook too ngaloli pookin: etii boo arat netii atua nkuretishuitin.

⁶ Kake eilejileja yook Engai nailejilej looitadou aten, tʼembaunoto e Titos;

⁷ me t'embaunoto enye ake, kake baiki tʼenkilejilejata nailejilejieki ninye too ndai, neinosaki ninye yook errimata inyi, enkishirata inyi, enyuata inyi tʼolbae lai, napon baiki ang'ida.

⁸ Amu teni ailishie ndai tiatua embarua, mairridu; ten ake airridu, tiaraki nadol, ajo eilishie ndai ina barua enkiti kata ake,

⁹ nang'ida taata, me tiaraki nilisho, kake tiaraki nilisho pialala; amu eilishieki ndai anaa peyeu Engai, peiye mitumutumu entorroni o nabo too yook.

¹⁰ Amu eishoru enkilishoto anaa peyeu Engai enkitaalata e atua enkitopuata nemeirriduni; kake eishoru enkilishoto olmaa enkea.

¹¹ Eng'orai, tiaraki neilishieki ndai anaa peyeu Engai, keba aa enyuata natupukunye, te nebo o emitikinoto, o engoro o enkuretishu o errimata o engilata e tau o elaakinoto; intadua ndai aten aa supati tukul tʼena bae.

¹² Ore patisiraka ndai, eitu asiraki ndai tʼolbae le ilo oitarruoiye, anai tʼolbae le ilo otemenaiyoki, kake peibalunye enyuata inyi tʼolbae lang' tʼengomom Engai;

¹³ too nona baak eilejilejaki yook iltauja lang'. Tʼenkilejilejata ang' etopone eng'ida ang' tʼolbae lʼeng'ida e Titos; amu eeng'ieng'ieki Olmumua lenye too ndai pookin.

¹⁴ Amu ore enaitaa ndai kituak te ninye, neitu akurru; kake anaa esipata pookin natolikio nanu ndai, neijia eitisipaki si enkitadararoto ang' tʼengomom e Titos.

¹⁵ Ore enyorrata oltau lenye, naa kitok naleng' atua ndai, teni edamu ninye enkirukoto inyi pookin, enitang'amutua ninye tʼenkuretishu o tʼenkikirikirata.

¹⁶ Ang'ida, amu aanyunye ndai ntokitin sidan pookin.