2 Ilkorintio 2 - Osotua Ng'ejuk

¹ Kake atejo, paiko neijia, pamaitoki alotu tʼenkilishoto enitiiti ndai.

² Amu teni ailishie nanu ndai, ang'ai laaiting'id nanu, teni me ilo lailishie?

³ Onaa, atisiraka ndai nona, peiye, teni alotu, matum enkilishoto too lelo lemeata kata namang'idare ninje; amu airukore ndai pookin, ajo ore eng'ida ai, naa eng'ida inyi si.

⁴ Amu tʼosina kitok o emion oltau atisiraka ndai, o too lkiyo kumok: neme pitumutumu ndai enkilishoto, kake piyolouu enyorrata kitok naata too ndai.

⁵ Ore teni eishoo oltung'ani enkilishoto, neitu aailishie nanu, kake eilishie tʼematua, — pamairoshiye — ndai pookin.

⁶ Kake ebaiki oltung'ani otiu neijia, teni einoto ninye earata naba nji too ltung'anak kumok;

⁷ enaikash, teni iponipono aapalaki ndai ninye nilejilejeje oltau lenye pemeimisori ninye tiatua enkilishoto nalang'.

⁸ Akae, adiding' ndai, pintokiki ndai aanyor ninye.

⁹ Amu atisiraka ndai, patum atujurro ndai, ten aa iruko ndai tiatua mbaak pookin.

¹⁰ Ore ele ling'uaikiki ndai toki, naing'uaiki si nanu. Amu ore nanu, teni aing'uaiki oltung'ani toki, naing'uaiki tʼolbae linyi tʼengomom Olaitoriani;

¹¹ pemegilu yook satan; amu metiu, ajo mikiyolou yeunot enyena.

¹² Ore palotu Troas ainosu euangelion e Kristos, aatabolokoki kutukaji tiatua Olaitoriani,

¹³ neitu aeng'ieng'a tʼolmumua lai, tiaraki neitu atum Titos, olalashe lai; kake kintanapate o ninje, naing'ua ninje ajing' Makedonia.

¹⁴ Nikiliki Engai ashe naisho yook oshi ake engilunoto tiatua Kristos, nebolu erropili eyolounoto enye too yook too wuejitin pookin.

¹⁵ Amu tʼEngai kira yook erropili sidai e Kristos tiatua lelo oopok o tiatua lelo ooimin:

¹⁶ Too kulo kira erropili naing'ua enkea atua enkea, kake too lekua erropili naing'ua empuan atua empuan. Naa ang'ai oidipakine too kuna baak?

¹⁷ Amu mikitiu yook anaa ilkumok, ooitarruo ororei lʼEngai, kake kinosu anaa lʼesipata ooing'ua Engai nikitii tʼengomom Engai atua Kristos.