2 Ilkorintio 12 - Osotua Ng'ejuk

¹ Medupa, paitadaraa kion, kake ainosu peno nduarot o mbolunot Olaitoriani.

² Ayolo oltung'ani tiatua Kristos, neba too larin tomon o ong'wan — ten aa tiatua osesen, mayolo; Engai nayolo — etanapaki ele metabaiki shumata e uni.

³ Nayolo ele tung'ani — ten aa tiatua osesen, ten aa metii atua osesen, mayolo; Engai nayolo —,

⁴ ajo etanapaki atua emparadis nening' rorei lemeiroroi, lemeidim oltung'ani aimaki.

⁵ Aitadaraa kion tʼele, kake maitadaraa kion te nanu, neme tʼemenatishu ai.

⁶ Amu ten emut ayeu naitadaraa kion, anaata mamoda, anaata alimu esipata; kake aitore kion, pamaaitaa o obo kitok nelang' enadolita te nanu arashu enaning'ito te nanu.

⁷ Ore pamaikarrikar tʼolbae lʼenkumoi oo mbolunot, aaishooki olkikarret tiatua osesen, olmalaika le satan, paaar too ndapi, pamatum aikarrikarra.

⁸ Ore te ilo aidipa atasaya Olaitoriani aigil uni, paaing'ua ninye nanu.

⁹ Naajoki ninye nanu: Kibaiki eng'adunoto ai, amu ebaia engolon ai tiatua emenatishu. Onaa, eikash naleng', teni aitadarrarie kion emenatishu ai, pemany engolon e Kristos atua nanu.

¹⁰ Onaa, ang'ida tiatua menatishuitin, tiatua menat, tiatua nkisilot, tiatua mirat, tiatua sinaitin, tʼolbae le Kristos. Amu teni aaku menati, naata te ina kata engolon.

¹¹ Ataa olmodai tʼenkitadararoto, nikiarakiki ndai nanu. Kake anaata eikash, paaitaai kitok too ndai. Amu mara oti too lelo airriwak „kituak“, ten ake mara toki.

¹² Amu eitobiraki ilponot lʼolairriwani tiatua ndai tʼolng'iria pookin, o too nkitaduat, o too nkiputukunyot, o too nkidimat.

¹³ Ainyo natong'orikia ndai too nona kulie sirito, neme ilo rorei ake, ajo eitu airoshiki ndai? Entung'aiyoki nanu ena torroni.

¹⁴ Eng'orai, aidipakino palotu enkata e uni enitiiti ndai, namairoshiki nanu ndai. Amu maing'oru nkun inyi, kake ndai oopeny. Amu meiteng'elaki nkera lootoiutuo masaa sidan, kake lootoiutuo nkera enye.

¹⁵ Nayeu naishooio ntokitin ainei naitoki aishooio nanu kion t'eng'ida kitok tʼolbae lʼenkishui inyi; ten aa anyor nanu ndai naleng', nikinyorrinyorro nanu aaitong'or.

¹⁶ Kake njeaku neijia, peitu aek nanu ndai; kake tiaraki nara osunguroi, aibung'a ndai tʼolosek.

¹⁷ Arashu kaikonyaiye entoki oltung'ani tʼengaina e obo loo kulo lairriwaka ndai?

¹⁸ Atididing'a Titos nairriwaa olalashe obo te nebo o ninye. Keikonyarie Titos ndai toki? Eitu kilimana tʼolmumua obo? Ana eitu kipuoiye eroruata nabo?

¹⁹ Intokiki aajo ndai, njere kimitu yook too ndai? Kirorie tiatua Kristos tʼengomom Engai; kake eaku kuna pookin, lanyor lainei, pesheti ndai.

²⁰ Amu aureisho, teni alotu, pamainepu ndai anaa payeu, nimikinepupu si ndai nanu anaa piyeuu: netii too ndai enjangar, olom, engoro, enkitarrikino, enkurrata, elikioroto, olwuasa, enkiposhiposhata;

²¹ neaku, teni aitoki alotu enitiiti, naaitadou Engai ai too ndai, natum ailishoki ilkumok looitarruoitie opa neitu eala aaing'ua olduruki o entalare o enkimali-mal naataasa.