2 Ilkorintio 1 - Osotua Ng'ejuk

¹ Paulos, olairriwani le Yesus Kristos tʼeyeunoto Engai, o olalashe Timoteos: en esirit Engai natii Korintos ena palai, te nebo o sinyat pookin tiatua Akaia nalulungʼa.

² Njeboitare ndai engʼadunoto o eseriani naingʼua Engai, Papa lang', o Olaitoriani Yesus Kristos.

³ Njeitadarari Engai o Menye lʼOlaitoriani lang' Yesus Kristos, lora Papa lʼeng'adunoto o Engai enkilejilejata.

⁴ Eilejilej yook tiatua enkilishoto ang' pookin, pikindim aailejileja si yook kulo lootii atua enkilishoto pookin tʼenkilejilejata nailejilejie Engai yook.

⁵ Amu anaa pepona sinaitin le Kristos too yook, neijia nepona si enkilejilejata nailejilejie yook Kristos.

⁶ Teni kitum yook enkilishoto, neaku enkilejilejata o enkitopuata inyi; teni eilejileji yook, neaku enkilejilejata inyi, teni ing'iriri lelo sinaitin anaa pking'iri si yook.

⁷ Nikiata eng'idaroto nagol tʼolbae linyi, tiaraki nikiyolo, aajo anaa ping'aring'ara nkisilot, neijia si enkilejilejata.

⁸ Amu mikiyeu nimiyololo, lalashera, mbaak osina lang' nikinoto te Asia, njere einepua yook olemikindimaa, peking'arrirrore empuan ang' si,

⁹ nikiata yook enkigwena enkea tiatua aten. Etaa nona, pemiking'idare yook aten, kake Engai naitopiu lootuata;

¹⁰ eitopua yook tʼenkea naba nji, neton eitopok yook engolong' pookin; nikianyita ninye ajo elaitopok yook baiki akenya,

¹¹ tʼeretokinoto inyi, teni isayakiki yook, peliki iltung'anak kumok ashe tʼolbae lʼeng'adunoto naishooki yook.

¹² Ore enkitadararoto ang' naa ina: eijakenu oltoilo lʼoltau lang', aajo tʼesinyatishu o tʼesipata Engai, neme tʼeng'eno entung'anishu, kake tʼeng'adunoto Engai, kitilimanate tiatua ele maa, naleng' too ndai.

¹³ Amu eitu kisiraki ndai nkulie neme nena nisomama ana niyolouu, nairuk ajo ipuopuo aatayolou yook metabaiki enkiting'oto, neijia anaa pitayoloutuo yook tʼematua.

¹⁴ Amu kira yook enkitadararoto inyi, neijia anaa pirara si ndai enkitadararoto ang' atua engolong' Olaitoriani Yesus.

¹⁵ Ore tiatua ena ng'idaroto najo te ina kata alotu enitiiti, pintokiki aatum enkishooroto,

¹⁶ naimaa ndai alo Makedonia, naitoki arrinyokino ndai aing'ua Makedonia, pikintarere aaitabaiki Yudaya.

¹⁷ Ore adamu nena, kaing'ashaiye? Arashu ketaa noo nkiri natayeuo? Me neijia. Kake era ee ee, ore me naa me, te nanu.

¹⁸ Kake supat Engai, tiaraki neitu eaku nikirorie ndai ee o me,

¹⁹ kake ore Oinoti lʼEngai likinosutua nanu o Silvanos o Timoteos too ndai, neitu eaku ee o me, kake etaa ee tiatua ninye.

²⁰ Amu era nkisiligat Engai pookin ee te ninye, neaku Amen te ninye, peitadarari Engai tʼolbae lang'.

²¹ Kake Engai ninye naitagolo yook te nebo o ndai tiatua Kristos, neel yook,

²² nepik ninye yook olmishire neisho yook enkiterunoto Olmumua tiatua iltauja lang'.

²³ Naipot nanu Engai, peaku oljakeni te shumata oltau lai, ajo aing'urrie ndai, tiaraki neitu aitoki alotu enitiiti ndai engalo Korintos.

²⁴ Neme, pikintore yook enkirukoto inyi, kake kira laretok Eng'ida inyi, amu intasheshe ndai tiatua enkirukoto.