1 Yohana 2 - Osotua Ng'ejuk

¹ Nakera ainei, asiraki ndai kuna, peiye mintarruorruo; naa teni eitarruo obo, kiata olomitu yook te Papa, Yesus Kristos, ora supat.

² Nera ninye enkitobirakinoto too nkitarruot ang', neme too nkitarruot ang' ake, kake too nʼolmaa pookin.

³ Ena nikiyolounye, aajo kiyolou ninye, teni kimbung' nkitanapat enyena.

⁴ Ore olojo: Ayolo ninye, nemeibung' nkitanapat enyena, naa olalejani, nemetii esipata atua ninye.

⁵ Kake ore oloibung' ororei lenye, neitabaiyoki enyorrata Engai tiatua ninye, esipa. Ina kiyolounye, aajo kitii atua ninye.

⁶ Ore olojo, ebik tiatua ninye, meata kata nemelimana neijia anaa petilimane ninye.

⁷ Lanyor lainei, eitu asiraki ndai enkitanapata ng'ejuk, kake enkitanapata musana, niatata neba tʼenkiterata. Ore enkitanapata musana, naa ilo rorei Etoning'o tʼenkiterata.

⁸ Naitoki asiraki ndai enkitanapata ng'ejuk, nasipa tiatua ninye o tiatua ndai; amu etinyikaiye enaimin, neilang'isho eong'an nasipa.

⁹ Ore olojo, etii atua eong'an neiba olalashe lenye, neton etii ninye atua enaimin.

¹⁰ Ore olonyor olalashe lenye, nebik tiatua eong'an nemetii enkitapong'oroto atua ninye.

¹¹ Ore oloiba olalashe lenye, netii ninye atua enaimin nelimana tiatua enaimin nemeyolo, enelo; amu eitamodono enaimin ngonyek enyena.

¹² Asiraki ndai, nakera kutiti, ajo eitaikiaki ndai nkitarruot tʼolbae lʼengarna enye.

¹³ Asiraki ndai, loopapa, ajo Itayoloutuo ele lora neba tʼenkiterata. Asiraki ndai, le murran, ajo itigilutua oltorrono.

¹⁴ Atisiraka ndai, nakera, ajo itayoloutuo Minyi. Atisiraka ndai, loopapa, ajo itayoloutuo ele lora neba tʼenkiterata. Atisiraka ndai, le murran ajo irara ndai oogol nebik lomon lʼEngai tiatua ndai nitigilutua oltorrono.

¹⁵ Eminyor olmaa, baiki naatii atua olmaa. Teni enyor oltung'ani olmaa, metii enyorrata e Menye atua ninye.

¹⁶ Amu ntokitin pookin naatii atua olmaa: olng'warra lʼenkiring'o o olng'warra loo ngonyek o olwuasa lʼempuan, mera naaing'ua Menye, kake era naaing'ua olmaa.

¹⁷ Nelamuta olmaa o olng'warra lenye; kake oloitobir eyeunoto Engai, ninye lobik nkatan pookin.

¹⁸ Nakera kutiti, esaa enkiting'oto ena; anaa enitoning'o ndai, aajo elotu olmang'atinda le Kristos, neijia eetuo ilmang'ati le Kristos kumok. Te ina kiyolou, aajo etaa esaa enkiting'oto.

¹⁹ Eshomo ninje aaing'ua atua yook, kake me ilkulalang' ninje. Amu ten emut aa ninje ilkulalang', anaata etobiko te nebo o yook. Kake meata kata nemeibalunye, ajo me ilkulalang' pookin.

²⁰ Eelieki ndai eilata te ilo ora Sinyati niyololo ndai mbaak pookin.

²¹ Eitu asiraki ndai anaa lemeyolo esipata, kake iyololo ninye, nintokiki aayolo, aajo meing'ua elejare esipata.

²² Kang'ai olalejani, leme elde omiki, ajo era Yesus ele Kristos? Naa ilo olmang'atinda le Kristos omiki Menye o Oinoti.

²³ Ore olomiki Oinoti, netomikio si Menye; ore oloibalu Oinoti, neata si Menye.

²⁴ Ore nena nitoning'o tʼenkiterata, njebik tiatua ndai. Teni ebik tiatua ndai, enitoning'o tʼenkiterata, nipuopuo aabik si ndai te nebo o Oinoti o Menye.

²⁵ Naa ena enkisiligata naishoo ninye yook: empuan nemeiting'.

²⁶ Kuna baak atisiraka ndai tʼolbae loo lelo oorik ndai aaitapong'oo.

²⁷ Ore eelare nitang'amutua ndai te ninye, nebik tiatua ndai, nimiyeuu olekai tung'ani, peiteng'en ndai; kake enaiteng'ena ndai eelare pookin, nesipai nemetii elejare; ore anaa peiteng'ena ndai, entobik tiatua ninye.

²⁸ Ore taata, nakera ainei kutiti, entobik tiatua ninye, pekiata enkiteunoto, teni eboluni ninye, nimikikurru tʼelotunoto enye.

²⁹ Teni iyololo, aajo ninye supat, nintokiki aayolou, aajo ore oloitobir esupato, naa ilo etoiwuo ninye.