1 Yohana 1 - Osotua Ng'ejuk

¹ Enataa neba tʼenkiterata, enikitoning'o, enikitadua too ngonyek ang', eniking'oraitie neirrapirrap ngaik ang', mbaak ororei lʼempuan, —

² etalie empuan nikitadua nikinjakenu nikinosaki ndai ena puan nemeiting', enataboitare Menye nelioi too yook —:

³ kinosaki ndai enikitadua, enikitoning'o, peiye ing'aring'ara si ndai o yook; nera eng'arata ang' nabo o Papa o Oinoti lenye Yesus Kristos.

⁴ Nikisir yook nona, peiganyi eng'ida ang'.

⁵ Nyena enkinosunoto nikitoning'o yook naing'ua ninye, nikinosaki ndai, aajo era Engai eong'an, nemetii enaimin atua ninye katukul.

⁶ Teni kijo yook, aajo kiata eng'arata te nebo o ninye nikipuo tiatua enaimin, nikilejisho nimikintobir esipata.

⁷ Kake teni kipuo tiatua eong'an anaa petii ninye atua eong'an, nikiata yook eng'arata tiatua aten, neisuj osarge le Yesus Kristos, Oinoti lʼEngai, yook too nkitarruot pookin.

⁸ Teni kijo, mikiata enkitarruoto, nikilej aten, nemetii esipata atua yook.

⁹ Teni kimbalu nkitarruot ang', nera ninye airukoni naa supat, peiye eitaiki yook nkitarruot neikishaanye yook tʼentorroni pookin.

¹⁰ Teni kijo, eitu kintarruo, nikintaa ninye olalejani, nemetii ororei lenye atua yook.